বৰ্তমান তেওঁৰ বয়স ৩৬ বছৰ। তেওঁ ২০০৭ চনৰ পৰা প্ৰথম শ্ৰেণীৰ ক্ৰিকেট খেলি আছে। আনহাতে, ২০১১ চনৰ পৰা খেলিছে আন্তৰ্জাতিক ক্ৰিকেট। তেওঁ একেৰাহে ১৬ বছৰ ধৰি প্ৰথম শ্ৰেণীৰ ক্ৰিকেট খেলি আহিছে। ৩৫ বছৰ অতিক্ৰম কৰা এৰন ফিঞ্চে এতিয়া আৰু ইমান চাপ ল’বলৈ সক্ষম নহয়।
সেয়েহে তেওঁ আন্তৰ্জাতিক ক্ৰিকেটক বিদায় জনালে। টী-২০ ক্ৰিকেটত আটাইতকৈ দীঘলীয়া সময়ৰ বাবে অষ্ট্ৰেলিয়াক নেতৃত্ব দি এই সংস্কৰণত দেশৰ আটাইতকৈ সফল অধিনায়ক হিচাপে পৰিগণতি ফিঞ্চ।
যোৱা বছৰ ছেপ্টেম্বৰত এদিনীয়া ক্ৰিকেটৰ পৰা অৱসৰ গ্ৰহণ কৰা ফিঞ্চে কৈছে যে তেওঁ আন্তঃৰাষ্ট্ৰীয় ক্ৰিকেটক বিদায় দিলেও সমগ্ৰ বিশ্বৰ ফ্ৰেঞ্চাইজি লীগত খেলা অব্যাহত ৰাখিব। অষ্ট্ৰেলিয়াৰ ২০২১ চনৰ টী-২০ বিশ্বকাপ বিজয়ী অধিনায়কগৰাকীয়ে অষ্ট্ৰেলিয়াৰ ঘৰুৱা টী-২০ লীগ বিগ বেছ দল মেলবৰ্ণ ৰেনেগেডছৰ সৈতে এক বছৰৰ চুক্তি নিশ্চিত কৰিছে।
তেওঁৰ ১২ বছৰীয়া আন্তৰ্জাতিক কেৰিয়াৰত ফিঞ্চে বগা বলৰ ক্ৰিকেটত ২৪৯ খন মেচ খেলিছিল (১৪৬ খন এদিনীয়া, ১০৩ টী-২০)। তেওঁ টী-২০ত তেওঁৰ ১০৩ খন খেলৰ কেৰিয়াৰৰ ৭৬ খনত অধিনায়কৰ ভূমিকাত আছিল। ফিঞ্চে এই সংস্কৰণত অধিনায়ক হিচাপে ৪০ খন মেচ জিকিছে। তেওঁৰ আটাইতকৈ ডাঙৰ সাফল্যটো হ’ল অষ্ট্ৰেলিয়াৰ ইতিহাসত প্ৰথমবাৰৰ বাবে টী-২০ বিশ্বকাপ জয় কৰা।
অৱশ্যে, ফিঞ্চে এদিনীয়াত মাত্ৰ ৫৫ খন খেলত দলটোক নেতৃত্ব দিছে। আনহাতে, তেওঁ মাত্ৰ ৫ খন টেষ্ট খেলিছে।
ফিঞ্চৰ বেছিভাগ সফলতা আহিছে অৱশ্যে টী-২০ত। তেওঁ টী-২০ আন্তৰ্জাতিক খেলত সৰ্বাধিক ব্যক্তিগত ৰাণৰ অভিলেখ গঢ়িছে। ২০১৮ চনত তেওঁ হাৰাৰেত জিম্বাবোৱেৰ বিৰুদ্ধে ৭৬ টা বলত ১৭২ ৰাণ সংগ্ৰহ কৰিছিল। অষ্ট্ৰেলিয়াৰ ক্ৰিকেটাৰসকলৰ মাজত সৰ্বাধিক টী-২০ মেচ খেলা আৰু ৰাণ সংগ্ৰহ কৰা বেটছমেন হৈছে ফিঞ্চ। তেওঁ ১০৩ খন খেলত ৩১২০ ৰাণ সংগ্ৰহ কৰিছে। ডেভিদ ৱাৰ্ণাৰ (২৮৯৪ ৰাণ) তেওঁৰ পিছত দ্বিতীয় সৰ্বাধিক ৰাণ সংগ্ৰহকাৰী।
