আজিৰ পৰা ধাৰাবাহিক আন্দোলনৰ কাৰ্যসূচী ঘোষণা কৰিছে সদৌ অসম অনুসূচিত জাতি ছাত্ৰ সন্থাই। শিৱসাগৰৰ উপায়ুক্ত কাৰ্যালয়ৰ সন্মুখত দিনৰ ১২ বজাৰ পৰা ২ বজালৈ সংগঠনটোৱে অৱস্থান ধৰ্মঘট কাৰ্যসূচী ৰূপায়ণ কৰে।
উল্লেখযোগ্য যে সংগঠনটোৱে তেওঁলোকৰ ন-দফিয়া দাবী পূৰণৰ বাবে বিভিন্ন সময়ত আন্দোলন কৰি আহিছে। কিন্তু চৰকাৰে কোনো গুৰুত্ব নিদিয়াত তেওঁলোকে ধাৰাবাহিক আন্দোলনৰ সিদ্ধান্ত ল’বলৈ বাধ্য হয় বুলি কয় শিৱসাগৰ জিলা সমিতিৰ সভাপতি পৰশ জ্যোতি দাসে।
আজিৰ অৱস্থান ধৰ্মঘটৰ কাৰ্যসূচীত অনুসূচীত জাতি ছাত্ৰ সন্থাৰ কেন্দ্ৰীয় সমিতিৰ সদস্য সত্যনাৰায়ণ দাস, শিৱসাগৰ জিলা সমিতিৰ সম্পাদক মৃদুল দাস, উপ সভাপতি মতিক্য প্ৰসাদ দাসকে ধৰি শতাধিক সদস্যই অংশগ্ৰহণ কৰে।
অনুসূচিত জাতিৰ ৰাজ্যিক আয়োগ গঠন, জাতিগত প্ৰমাণপত্ৰ পুনৰ নবীকৰণ, ছাত্ৰ বৃত্তি নিয়মীয়াকৰণ আৰু ধনৰ পৰিমাণ দুগুণ বৃদ্ধি, অনুসূচিত জাতিৰ ভূমিহীন লোকক সংস্থাপন, ভূমি প্ৰদান আৰু পট্টা প্ৰদান, বেকলগ পদ পূৰণ, সংৰক্ষণ আৰু অনুসূচিত জাতি জনজাতি অৱমাননা প্ৰতিৰোধ আইন কঠোৰভাৱে প্ৰণয়নকে ধৰি ন টা দাবী সম্বলিত এখন স্মাৰকপত্ৰ শিৱসাগৰ জিলা উপায়ুক্তৰ জৰিয়তে মুখ্য মন্ত্ৰীলৈ প্ৰেৰণ কৰে।
পৰশ জ্যোতি দাসে চৰকাৰক হুংকাৰ দি কয় যে পৰৱৰ্তী সময়ত ৰাজ্যৰ বিভিন্ন স্থানত ধাৰাবাহিকভাৱে আন্দোলনৰ কাৰ্যসূচী গ্ৰহণ কৰা হ’ব আৰু যদি চৰকাৰে বিষয়টোক গুৰুত্ব নিদিয়ে তেতিয়া আন্দোলনে জংগী ৰূপ ধাৰণ কৰিব।