বয়সৰ দিশৰ পৰা আপুনি অতিক্ৰম কৰিছে নেকি ৩০ বছৰ? তেন্তে সাৱধান হওক। সজাগ হওক নিজৰ স্বাস্থ্যৰ প্ৰতি। কিয়নো ৩০ বছৰৰ পাছৰে পৰা শৰীৰ পূৰ্বৰ দৰে ফিট হৈ নাথাকে।
এনেকুৱা বয়সত পুৰুষ তথা মহিলাৰ শৰীৰত এনে বহু পৰিৱৰ্তন ঘটি থাকে, যাৰ ফলত ফিট হৈ থকাটো প্ৰত্যাহ্বান হৈ পৰে।
হৰম’নৰ পৰিৱৰ্তনৰ প্ৰভাৱত দৃষ্টি শক্তি হ্ৰাস পোৱাৰ লগতে চুলিতো ৰূপালী ৰঙে দেখা দিবলৈ ধৰে।
পুষ্টি বিশেষজ্ঞসকলে ইয়াৰ আঁৰত আমাৰ বিভিন্ন খাদ্যাভাসকে জগৰীয়া কৰে। তেওঁলোকৰ মতে, ৩০ বছৰ বয়সৰ পাছত কিছুমান বস্তু খাদ্য তালিকাৰ পৰা অঁতৰাই ৰাখিব লাগে বা সাৱধানে খোৱা উচিত।
কেম্ব্ৰিজ বিশ্ববিদ্যালয় এক প্ৰতিবেদনত কোৱা হৈছে যে এগৰাকী ব্যক্তিয়ে প্ৰতিদিনে ২৩০০ মিলিগ্ৰামতকৈ অধিক ছ’ডিয়াম গ্ৰহণ কৰা উচিত নহয়।
বজাৰত উপলব্ধ কেন চুপত ৪০শতাংশ ছ’ডিয়াম থাকে। ই ছালৰ বাৰ্দ্ধক্যজনিত সমস্যা তথা ৰক্তচাপৰ বাবে সাংঘাতিক সমস্যাৰ সৃষ্টি কৰিব পাৰে।
বয়স ৩০ বছৰৰ দিশে আগবঢ়াৰ লগে লগে সকলোৱে চেনি খোৱা কমোৱা উচিত। পুষ্টি বিশেষজ্ঞসকলে কয় যে বয়সৰ লগে লগে মানুহৰ টোপনি হ্ৰাস পায়।
তদুপৰি, দিনৰ ভাগত অধিক পৰিমানে শৰ্কৰা জাতীয় খাদ্য খালে ই মেদবহুলতাৰ সমস্যাৰ সৃষ্টি কৰিব পাৰে।
বিশেষজ্ঞসকলে লগতে জানিবলৈ দিয়ে যে গোটেই দিন অতি বেগুণীয়া ৰশ্মিৰ সংস্পৰ্শত অহাৰ বাবে ছাল ক্ষতিগ্ৰস্ত হয়। নিশা শোৱাৰ সময়ত সেয়া বহু পৰিমানে ঠিক হৈ যায়। কিন্তু নিশাৰ পিনে যদি কোনোৱে কফি থায়, তেতিয়াহ’লে ই টোপনি নষ্ট কৰিব পাৰে আৰু ফলত সমস্যা বঠোৱাৰ সম্ভাৱনা থাকে।
আনহাতে, ৰাতিপুৱাৰ খোৱাৰ বাবে ব্যৱহাৰ কৰা আটাৰ পৰা বনোৱা ৰুটি শৰীৰৰ বাবে অনিষ্টকাৰী। ইয়াত প্ৰচুৰ পৰিমানে চেনি, কাৰ্বহাইড্ৰেইড তথা ফ্যাট থাকে। ইয়াৰ ফলত কোষ্ঠকাঠিন্য তথা হজমৰ সমস্যা বৃদ্ধি কৰিব পাৰে।
সেইদৰে, ৩০বছৰৰ পাছত বেছিভাগ মানুহে খেলাধূলা বা অন্য শাৰীৰিক কাৰ্যকলাপৰ ক্ষেত্ৰত সক্ৰিয় নাথাকে। সেয়ে, জ্যাংক ফুড বা ভজা খাদ্য হজম কৰাটো টান হৈ পৰিব পাৰে।
সাধাৰণতে মানুহে এনে বয়সৰ পৰা আঁহযুক্ত খাদ্য খোৱাৰ অভ্যাস কৰিব লাগে।
