কাজিৰঙা ৰাষ্ট্ৰীয় উদ্যানৰ পুব বনাঞ্চল অগৰাতলিৰ গাতে লাগি থকা ধোবাআটি গাওঁত আজি বন বিভাগৰ উদ্যোগত এক বিশেষ সজাগতা সভা অনুষ্ঠিত হয় ৷ ৰাজ্যৰ আগশাৰীৰ সংগঠন আৰণ্যক আৰু স্থানীয় সংগঠন ভূমিৰ সহযোগত আয়োজিত এই সভাত গাওঁবাসীৰ মাজত বানপানীত ল’বলগা বিভিন্ন সাৱধানতা আৰু বন্যপ্ৰাণী সংৰক্ষণৰ বাবে সজাগতা সৃষ্টিৰ ব্যৱস্থা কৰা হয় ৷
ধোবাআটি প্ৰাথমিক বিদ্যালয়ত স্থানীয় জ্যেষ্ঠ নাগৰিক হলিৰাম পাটগিৰিৰ পৌৰহিত্যত অনুষ্ঠিত সভাত আগৰাতলি বনাঞ্চলৰ বনাঞ্চলিক বিষয়া বিদ্যুত বিকাশ বৰা, গোলাঘাট জিলাৰ ৱাইল্ড লাইফ ৱাৰ্ডেন উত্তম শইকীয়া,বিদ্যালয়ৰ প্ৰধান শিক্ষক বিৰিঞ্চি কামান ,পাৰিপাৰ্শ্বিক উন্নয়ন সমিতিৰ সভাপতি মঞ্জিল পেগু , উপদেষ্টা কমল পাটগিৰি, জ্যেষ্ঠ ব্যক্তি লক্ষীৰাম কুটুম, নখৰাম দলে আৰু অতুল পেগু, উপস্থিত থাকে ৷
সভাত ধোবাআটি প্ৰাথমিক বিদ্যালয়ৰ ছাত্ৰ ছাত্ৰীৰ লগতে গাওঁবাসী আৰু পাৰিপাৰ্শ্বিক উন্নয়ন সমিতিৰ সমুহ সদস্যই অংশগ্ৰহণ কৰে ৷ সভাত বানপানীৰ সময়ত ল’বলগা সাৱধানতাৰ উপৰিও কাজিৰঙাৰ পৰা ওলাই অহা বন্যপ্ৰাণীৰ সুৰক্ষাৰ বাবে সকলোকে আহ্বান জনোৱা হয় ৷
উক্ত সভাত গাওঁখনৰ আৰ্থ-সামাজিক উন্নয়নৰ বিষয়েও আলোচনা কৰা হয় ৷ মঞ্জিল পেগুয়ে আঁত ধৰা সভাখনত বন বিষয়া বিদ্যুত বিকাশ বৰা আৰু উত্তম শইকীয়াই সমল ব্যক্তি হিচাবে বক্তব্য আগবঢ়ায় ৷
