প্ৰায় তিনিমাহ ধৰি মণিপুৰত চলি থকা অবিৰত হিংসা আৰু অশান্তিৰ পৰিপ্ৰেক্ষিতত অসম নাগৰিক সমাজে পৰিস্থিতিক লৈ গভীৰ দুখ আৰু উদ্বেগ প্ৰকাশ কৰিছে।
মণিপুৰৰ মুখ্যমন্ত্ৰী এন বীৰেণ সিঙে ৰাজ্যত হিংসা ৰোধ কৰি শান্তি ঘূৰাই অনাত ব্যৰ্থ হোৱাৰ বাবে চৰকাৰক জগৰীয়া কৰি পদত্যাগ কৰিবলৈ আহ্বান জনাইছে অসম নাগৰিক সমাজে।
মণিপুৰৰ পৰিস্থিতি ভয়াৱহ হৈ পৰিছে, যোৱা তিনিমাহত ১০০ৰো অধিক লোকৰ মৃত্যু হোৱাৰ লগতে ৫০ হাজাৰৰো অধিক লোক গৃহহীন হৈ পৰিছে।
ৰাজ্যৰ আৰক্ষীয়ে কুকি জনগোষ্ঠীৰ বিৰুদ্ধে হিংসাত্মক ঘটনাত জড়িত হোৱাৰ খবৰে সংকটৰ ভয়াৱহতা বৃদ্ধি কৰিছে।
অসম নাগাৰিক সমাজে “ডাবল ইঞ্জিন” বিজেপি চৰকাৰে শান্তি বজাই ৰাখিব নোৱাৰাৰ বাবে সমালোচনা কৰে আৰু ঘৃণা সম্প্ৰসাৰিত কৰি ক্ষমতালৈ অহাৰ অভিযোগ উত্থাপন কৰে। এনে হিংসা আৰু মৃত্যুৰে জুৰুলা ৰাজ্য এখনক শাসন কৰিবলৈ মুখ্যমন্ত্ৰীয়ে সকলো নৈতিক কৰ্তৃত্ব হেৰুৱাইছে বুলি সংগঠনটোৱে মত প্ৰকাশ কৰে।
কেন্দ্ৰীয় চৰকাৰেও তীব্ৰতৰ হৈ পৰা পৰিস্থিতিৰ মোকাবিলা কৰিবলৈ ক্ষিপ্ৰ ব্যৱস্থা গ্ৰহণ নকৰাৰ বাবে সমালোচনাৰ সন্মুখীন হৈছে।
ৰাষ্ট্ৰপতিৰ শাসন জাপি দিয়া আৰু মুখ্যমন্ত্ৰীক আগতীয়াকৈ অপসাৰণ কৰাৰ আহ্বানক গুৰুত্ব দিয়া নহ’ল, যাৰ ফলত আৰু অধিক নিৰীহ লোকে প্ৰাণ হেৰুৱাবলগীয়া হ’ল।
শেহতীয়াকৈ দুগৰাকী মহিলাক উলংগ কৰি খোজ কঢ়াই নিয়া আৰু দলবদ্ধ ধৰ্ষণৰ ভয়ানক কাণ্ডক প্ৰতিফলতি কৰা ভাইৰেল ভিডিঅ’টোৱে অধিক হিংসাত্মক পৰিস্থিতিৰ বাবে ইন্ধন যোগাইছে।
প্ৰধানমন্ত্ৰীৰ সঁহাৰিত বিলম্ব আৰু পৰিস্থিতিৰ প্ৰতি উদাসীনতা প্ৰদৰ্শন চোকা সমালোচনাৰ সন্মুখীন হৈছে।
অসম নাগৰিক সমাজে দৃঢ়তাৰে কয় যে এনে ঘটনাই বিজেপি নেতৃত্বাধীন চৰকাৰৰ উত্তৰ-পূব অঞ্চলৰ প্ৰতি প্ৰকৃত চিন্তাৰ অভাৱকে উদঙাইছে।
মণিপুৰত সংঘটিত হিংসাত্মক ঘটনাৰ মূল কাৰণৰ তদন্তৰ বাবে ভাৰতৰ উচ্চতম ন্যায়ালয়ৰ নিৰ্দেশ অনুসৰি ন্যায়িক তদন্তৰ আহ্বান জনায় সংগঠনটোৱে।
দাবী কৰা হৈছে যে ধন আৰু ঘৃণাই ৰাজনৈতিক মেৰুকৰণ আৰু নিৰ্বাচনী জয়ত সহায় কৰিব পাৰে যদিও সমাজৰ মাজত আইন-শৃংখলা বজাই ৰখাৰ ক্ষেত্ৰত ই পৰ্যাপ্ত নহয়।
তদুপৰি, মণিপুৰৰ হিংসাত্মক ঘটনাক লৈ মৌনতা অৱলম্বন কৰাৰ বাবে অসমৰ মুখ্যমন্ত্ৰী তথা নেডাৰ আহ্বায়কগৰাকীও গৰিহণাৰ সন্মুখীন হৈছে। শেহতীয়াকৈ অসমৰ মুখ্যমন্ত্ৰীয়ে ধৰ্ষণ কাণ্ড সন্দৰ্ভত কৰা মন্তব্যক নিন্দনীয় বুলি গণ্য কৰা হৈছে, কিয়নো ইয়াৰ দ্বাৰা অপৰাধৰ ভয়াৱহতাক তুচ্ছজ্ঞান কৰা যেন লাগে।
মেইটেই আৰু মিজোৰ মাজত সৃষ্টি হোৱা উত্তেজনা সন্দৰ্ভতো অসম নাগৰিক সমাজে উদ্বেগ প্ৰকাশ কৰি মিজোৰাম আৰু কেন্দ্ৰীয় চৰকাৰক মিজোৰামৰ পৰিস্থিতিৰ আৰু অধিক অৱনতি ৰোধৰ বাবে নিৰ্ণায়ক ব্যৱস্থা গ্ৰহণ কৰিবলৈ আহ্বান জনায়।
