চাওঁতে চাওঁতে জনপ্ৰিয় শিল্পী জুবিন গাৰ্গ আমাৰ মাজৰ পৰা নোহোৱা হোৱাৰ এবছৰ হ’ল। যোৱা বছৰৰ ১৯ ছেপ্টেম্বৰত সংঘটিত সেই দুৰ্ঘটনাটোৱে সমগ্ৰ অসমৰ জনসাধাৰণক মৰ্মাহত কৰিছিল। শিল্পীগৰাকীৰ প্ৰতি ৰাজ্যবাসীয়ে প্ৰকাশ কৰা প্ৰতিক্ৰিয়া আছিল একক আৰু অনন্য। অসমৰ ইতিহাসত সি সদায় স্মৰণীয় হৈ থাকিব।
অহা ১৯ ছেপ্টেম্বৰৰ দিনটোত জুবিন গাৰ্গক শ্ৰদ্ধাৰে সুঁৱৰিবলৈ আহ্বান জনাইছে ‘অসম নাগৰিক সন্মিলন’য়ে। সংগঠনটোৰ তৰফৰ পৰা বিশিষ্ট ব্যক্তিসকলে এক বিবৃতিত কয় যে জুবিন সদায় জীয়াই থাকিব তেওঁৰ সংগীতত, সুৰত, লয়ত, তেওঁৰ সৃষ্টিত আৰু গণমুখী শিল্পীসত্তাত।
সেইদিনা শদিয়াৰ পৰা ধুবুৰীলৈ পুৱাৰ পৰা সন্ধিয়ালৈ ৰাজ্যৰ প্ৰতিগৰাকী নাগৰিকক নিৰৱচ্ছিন্নভাৱে জুবিনৰ গীত শুনিবলৈ আহ্বান জনোৱা হৈছে যাতে অসমৰ আকাশে-বতাহে চৌদিশে জুবিনৰ গীতৰ প্ৰতিধ্বনি শুনা যায়।
অসম নাগৰিক সন্মিলনৰ হৈ হীৰেন গোহাঁই হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, শান্তনু বৰঠাকুৰ আৰু আব্দুল মান্নানে এই আহ্বান জনাই কয় যে জুবিনৰ শিল্পীসত্তা আৰু শিল্পাদৰ্শ অমৰ হওক! জুবিনৰ কন্ঠই আমাক সকলোকে একতাৰ ডোলেৰে বান্ধি ৰাখক!
