ধৰ্ষণৰ গোচৰত দোষী সাব্যস্ত ডেৰা সাচা সৌদাৰ মুৰব্বী গুৰমিত ৰাম ৰহিম সিং পুনৰবাৰ কাৰাগাৰৰ পৰা বাহিৰলৈ ওলাই আহিছে। ২০ বছৰীয়া কাৰাদণ্ডৰে দণ্ডিত ৰাম ৰহিমক সোমবাৰে পুৱা হাৰিয়ানাৰ সুনৰিয়া কাৰাগাৰৰ পৰা ৪০ দিনৰ পেৰোলত মুক্তি দিয়া হয়। ২০১৭ চনত ধৰ্ষণৰ গোচৰত দোষী সাব্যস্ত হোৱাৰ পিছত এইটো তেওঁৰ ১৫ সংখ্যক মুক্তি। উল্লেখযোগ্য যে, যোৱা আঠ বছৰৰ কাৰাবাসৰ সময়ছোৱাত তেওঁ ইতিমধ্যে মুঠ ৪০৫ দিন কাৰাগাৰৰ বাহিৰত কটাইছে।
সোমবাৰে দিনৰ প্ৰায় ১১.৪৫ বজাত কঠোৰ নিৰাপত্তাৰ মাজত এখন বিশেষ বাহনত উঠি কাৰাগাৰ চৌহদ ত্যাগ কৰে বাবা ৰাম-ৰহিমে। পেৰলৰ এই সময়ছোৱাত তেওঁ চিৰসাৰ ডেৰা সদৰত থাকিব বুলি জানিব পৰা গৈছে।
ডেৰাৰ দ্বিতীয়জন গুৰু সৎনাম সিঙৰ জন্ম জয়ন্তী উপলক্ষে এই পেৰল মঞ্জুৰ কৰা হৈছে। প্ৰতি বছৰে ২৫ জানুৱাৰীত চিৰসাত ডেৰা সাচা সৌদাৰ এই আটাইতকৈ ডাঙৰ উৎসৱটি পালন কৰা হয়, য’ত দেশৰ বিভিন্ন প্ৰান্তৰ পৰা হাজাৰ হাজাৰ অনুগামীৰ সমাগম ঘটে।
২০১৭ চনৰ আগষ্ট মাহত চিবিআইৰ বিশেষ আদালতে দুগৰাকী শিষ্যক ধৰ্ষণ কৰাৰ গোচৰত ৰাম ৰহিমক ২০ বছৰৰ কাৰাদণ্ড বিহিছিল। ইয়াৰ উপৰি ২০১৯ চনত সাংবাদিক ৰামচন্দ্ৰ ছত্রপতিৰ হত্যাকাণ্ডৰ গোচৰতো তেওঁক যাৱজ্জীৱন কাৰাদণ্ড দিয়া হৈছিল। অৱশ্যে ২০০২ চনৰ ডেৰাৰ প্ৰাক্তন মেনেজাৰ ৰঞ্জিত সিং হত্যাকাণ্ডৰ গোচৰত ২০২৪ চনৰ মে’ মাহত পঞ্জাব আৰু হাৰিয়ানা উচ্চ ন্যায়ালয়ে ৰাম ৰহিমসহ আন চাৰিজন অভিযুক্তক দোষমুক্ত ঘোষণা কৰে। আদালতৰ মতে চিবিআইৰ সেই তদন্তত যথেষ্ট বিসংগতি আছিল।
বাৰে বাৰে পেৰোল লাভ কৰাক লৈ ৰাম ৰহিমক লৈ বিভিন্ন মহলত বিতৰ্কৰ সৃষ্টি হৈছে। বিশেষকৈ কোনো ডাঙৰ নিৰ্বাচন বা উৎসৱৰ আগে আগে তেওঁক এনেদৰে মুক্তি দিয়া কাৰ্যই বহু প্ৰশ্নৰ অৱতাৰণা কৰিছে। যোৱা বছৰৰ আগষ্ট মাহতো তেওঁ ৪০ দিনৰ বাবে কাৰাগাৰৰ পৰা বাহিৰলৈ আহিছিল। বাৰে বাৰে লাভ কৰা এই ৰেহাইক লৈ শিখ সংগঠনসমূহৰ লগতে ভুক্তভোগীৰ পৰিয়াল সমূহেও তীব্ৰ আপত্তি দৰ্শাই আহিছে।
