সুস্থ এক গণতন্ত্ৰ বা চৰকাৰ প্ৰতিষ্ঠা কৰিবলৈ বিৰোধীৰ সক্ৰিয়তাৰ নিশ্চয়কৈ প্ৰয়োজন আছে।
যিকোনো এখন চৰকাৰ কিবা কাম কৰোতে তাত হোৱা ভুলবোৰ আঙুলিয়াই দিবলৈ নিশ্চয়কৈ বিৰোধীৰ প্ৰয়োজন। তথা তেনে পদ্ধতিৰে স্বাধীনোত্তৰ কালৰ পৰা শাসক পক্ষ আৰু বিৰোধীৰ ভুমিকা চলি আহিছে।
কিন্তু ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাৰ এক মন্তব্যই যেন সুস্থ গণতন্ত্ৰত বিৰোধীৰ প্ৰয়োজনীয়তা একেবাৰে নুই কৰিব পেলাইছে।
হিমন্ত বিশ্ব শৰ্মাৰ মতে এই চৰকাৰৰ ৫ বছৰীয়া শাসনকালত বিৰোধীৰ প্ৰয়োজনীয়তা একেবাৰে নাই।
‘যিহেতু আমি সকলো জাতি-ধৰ্ম-বৰ্ণৰ মানুহৰ উন্নয়নৰ হকে কাম কৰিম গতিকে ৫ বছৰ বিৰোধীত বহি কি কৰিব? সকলোৱে একেলগে আমাৰ লগত আহি কাম কৰক। সকলো সমষ্টিৰে সম উন্নয়ন কৰিম যিহেতু বিৰোধীতদ বহি তেওঁলোকৰ কি লাভ হ’ব?’
মুখ্যমন্ত্ৰীৰ এনেধৰণৰ তুলুঙা তথা তৰল বক্তব্যই নিশ্চয়কৈ ভাৰতৰ গণতান্ত্ৰিক ব্যৱস্থাটোক একপ্ৰকাৰৰ কুঠাৰঘাত কৰিছে।
কিয়নো গণতান্ত্ৰিক দেশ হিচাপে নিৰ্বাচন অনুষ্ঠিত কৰি ভোটদানৰ জৰিয়তে জন প্ৰতিনিধি নিৰ্বাচিত কৰে তথা সংখ্যাৰ ওপৰত ভিত্তি কৰি শাসক বা বিৰোধীৰ স্থান নিৰ্ধাৰিত হয়। তেনে অৱস্থাত মুখ্যমন্ত্ৰী ড০ হিমন্ত বিশ্ব শৰ্মাৰ এনে মন্তব্যই ‘এক দেশ এক দল’ নীতিৰে যেন পোষকতা কৰিছে।
মুখ্যমন্ত্ৰী ড০ হিমন্ত বিশ্ব শৰ্মাৰ এনে মন্তব্যৰ পাছতে তেওঁক উভটি ধৰিছে প্ৰদেশ কংগ্ৰেছৰ মিডিয়া বিভাগৰ অধ্যক্ষা ববিতা শৰ্মাই।
নৰ্থ ইষ্ট নাওৰ সাংবাদিকৰে সৈতে হোৱা টেলিফোনিক বাৰ্তালাপত ববিতা শৰ্মাই কয় ‘এগৰাকী মুখ্যমন্ত্ৰীৰ মুখত এনেধৰণৰ মন্তব্য শোভা নাপায়। আমাৰ দেশখন একনায়কত্ববাদী দেশ নহয়। গণতান্ত্ৰিক দেশত বিৰোধী থাকিবই। ৰাইজৰ কামসমূহ সঠিক ৰূপত উন্নয়ন হৈছে নে নাই সেয়া বিচাৰ কৰিবলৈ বিৰোধীৰ প্ৰয়োজন।‘
‘কোনেও নিজ মুখে ক’ব নোৱাৰে যে তেওঁলোক সুযোগ্য শাসক। যদি তেনেকুৱাই হ’লহেঁতেন নিশ্চয়কৈ ভাৰতত ইমানবোৰ ৰাজনৈতিক দল নাথাকিলহেঁতেন। মুখ্যমন্ত্ৰীৰ বিৰোধীক লৈ কৰা মন্তব্য তুলুঙা আৰু এগৰাকী মুখ্যমন্ত্ৰীয়ে তেনেকুৱা ধৰণৰ মন্তব্য কৰাটো উচিত নহয়।‘ শৰ্মাই এইদৰে কয়।