কাজিৰঙা ৰাষ্ট্ৰীয় উদ্যানৰ বাবে অতি গুৰুত্বপূৰ্ণ বুলি বিবেচিত নগাঁও বন সংমণ্ডলৰ বাঘচেৰ সংৰক্ষিত বনাঞ্চল আজি আনুষ্ঠানিকভাৱে কাজিৰঙা ৰাষ্ট্ৰীয় উদ্যান কৰ্তৃপক্ষক হস্তান্তৰ কৰা হয়৷
আজি অসম চৰকাৰৰ বন বিভাগে আনুস্থানিক ভাৱে এই ঘোষণা কৰা বুলি কাজিৰঙাৰ সঞ্চলক পি শিৱকুমাৰে জানিবলৈ দিছে৷
ইয়াৰ বাবে মুখ্যমন্ত্ৰী হিমন্ত বিশ্ব শৰ্মা, বনমন্ত্ৰী পৰিমল শুক্লবৈদ্য, স্বাস্থ্য মন্ত্ৰী কেশৱ মহন্ত আৰু কৃষি মন্ত্ৰী অতুল বৰাক ধন্যবাদ জনাইছে সঞ্চালকগৰাকীয়ে৷
কাজিৰঙা ৰাষ্ট্ৰীয় উদ্যান কৰ্তৃপক্ষক এই হস্থান্তৰণক সেউজ প্ৰতিশ্ৰুতি বুলি অভিহিত কৰিছে শিৱ কুমাৰে৷
১৯১৯ চনত ৩,৩৬৭ হেক্টৰ পৰিসৰৰ কাজিৰঙা আৰু কাৰ্বি আংলংৰ মাজত অৱস্থিত বাঘচেৰ বনাঞ্চলক সংৰক্ষিত বনাঞ্চল হিচাবে ঘোষণা কৰা হৈছিল৷ ২০১৭ চনত বাঘচেৰ বনাঞ্চলত মেনচাং নামৰ একমাত্ৰ বন শিৱিৰ এটা স্থাপন কৰা হৈছিল৷
কাজিৰঙা ৰাষ্ট্ৰীয় উদ্যানৰ বন্যপ্ৰাণী আৰু চোৰাং চিকাৰীক প্ৰতিহত কৰিবলৈ কাজিৰঙাৰ বাবে বাঘচেৰ অত্যন্ত গুৰুত্বপূৰ্ণ বুলি বিবেচিত হৈ আহিছিল আৰু বাঘচেৰ সংৰক্ষিত বনাঞ্চলক কাজিৰঙাৰ কৰ্তৃপক্ষক হস্থান্তৰ কৰিব লাগে বুলি দীৰ্ঘ দিনৰ পৰা আলোচিত হৈ আহিছিল৷
কাজিৰঙা ৰাষ্ট্ৰীয় উদ্যান কৰ্তৃপক্ষৰ নিয়ন্ত্ৰণত নথকাৰ বাবে গঁড় চিকাৰীয়েও বাঘচেৰ সংৰক্ষিত বনাঞ্চলৰ ব্যৱহাৰ কৰি আহিছিল৷
আজি কৰা নিৰ্দেশৰ পিচত গোলাঘাট জিলাৰ পানবাৰী আৰু নগাঁও জিলাৰ কুকুৰাকাটা সংৰক্ষিত বনাঞ্চলৰ পিচতেই বাঘচেৰ সংৰক্ষিত বনাঞ্চল কাজিৰঙাৰ নিয়ন্ত্ৰনাধীন হ’ল।
