নিজৰ অভিলেখ নিজেই ভংগ কৰিলে বৈভৱ সূৰ্যবংশীয়ে। মাত্ৰ ১৪ বছৰ বয়সতে আই পি এলত গুজৰাট টাইটানছৰ বিৰুদ্ধে ৩৮টা বলত ১০১ ৰান সংগ্ৰহ কৰি সকলোকে স্তম্ভিত কৰি তুলিছিল বিহাৰৰ এইগৰাকী ক্ৰিকেটাৰে। এইবাৰ ভাৰতৰ এই ‘বিস্ময়কৰ প্ৰতিভা’ই ৩২টা বলতে শতক অৰ্জন কৰে।
বৈভৱ এতিয়া দোহাত। এছিয়ান ক্ৰিকেট কাউন্সিলৰ এছিয়া কাপ ৰাইজিং ষ্টাৰ্ছ প্ৰতিযোগিতাত খেলিবলৈ গৈছে। শুকুৰবাৰৰ পৰা আৰম্ভ হৈছে এছিয়া কাপ ৰাইজিং ষ্টাৰ্ছ প্ৰতিযোগিতা।
ইণ্ডিয়া ‘এ’ দলে সংযুক্ত আৰব আমিৰশ্বাহীৰ বিৰুদ্ধে খেলিছিল। প্ৰথম দিনাই ২২ গজত তেওঁৰ বেটত ৰানৰ জোৱাৰ উঠিল। বৈভৱে ১৫টা বিশাল ছয় মাৰে।
শুকুৰবাৰে দোহাত টছত জয়লাভ কৰাৰ পাছত ইণ্ডিয়া এ দলে বেটিং কৰাৰ সিদ্ধান্ত লৈ ২০ অভাৰত ৪টা উইকেট হেৰুৱাই ২৯৭ ৰান সংগ্ৰহ কৰে। অৱশ্যে দ্বিতীয় অভাৰত ভাৰতে এটা উইকেট হেৰুৱাইছিল। ৬ টা বলত ১০ ৰান সংগ্ৰহ কৰি ৰান আউট হয় প্ৰিয়ংশ আৰ্য্য।
ইয়াৰ পিছতে ৩ নম্বৰত বেটিং কৰিবলৈ ওলাই অহা নমন ধীৰে ইনিংছৰ নিয়ন্ত্ৰণ লয়। এটা দিশ ধৰি ৰাখিলে। আনহাতে, অ’পেন কৰিবলৈ নমা বৈভৱে ধুমুহাৰ সৃষ্টি কৰি ৩২টা বলতে শতক অৰ্জন কৰে।
২৩টা বলত ৩৪ ৰান সংগ্ৰহ কৰি আউট হয় নমন। তেওঁ ৩টা চাৰি আৰু ২টা ছয় কোবায়। তাৰ পাছত অধিনায়ক জিতেশ শৰ্মাই ৩২টা বলত ৮৩ ৰান সংগ্ৰহ কৰে।
কিন্তু বৈভৱে সকলোকে নিষ্প্ৰভ কৰি তুলিলে। ৱেষ্ট এণ্ড পাৰ্ক আন্তঃৰাষ্ট্ৰীয় ক্ৰিকেট ষ্টেডিয়ামত তেওঁ ৪২টা বলত ১৪৪ ৰান সংগ্ৰহ কৰে।
ৰাজস্থান ৰয়েলছে যোৱা বছৰ মেগা নিলামত বৈভৱক ১১ কোটি টকাত ক্ৰয় কৰিছিল। এই দাম ৩০ লাখৰ পৰা কোটি কোটি টকালৈ বৃদ্ধি পাব বুলি কোনেও কল্পনা কৰিব পৰা নাছিল। বৈভৱে ইণ্ডিয়া এ দলৰ হৈ খেলিবলৈ নামি মাত্ৰ ৩২টা বলতে শতক অৰ্জন কৰি নিজকে এক অনন্য প্ৰতিভাৰ অধিকাৰী বুলি প্ৰমাণ কৰিলে।
