প্ৰাক্তন প্ৰধানমন্ত্ৰী অটল বিহাৰী বাজপেয়ীৰ দেহাৱসানৰ বাতৰি বিয়পি পৰাৰ লগে লগে সমগ্ৰ দেশৰ লগতে অসমতো শোকৰ বন্যা বোৱা পৰিলক্ষিত হয়।
বাজপেয়ীৰ বিয়োগত গভীৰ শোক প্ৰকাশ কৰিছে মুখ্যমন্ত্ৰী সৰ্বানন্দ সোণোৱালে। এক প্ৰেছ বিবৃতিযোগে সোণোৱালে কয়, ‘প্ৰাক্তন প্ৰধানমন্ত্ৰীগৰাকীৰ অসম তথা উত্তৰ-পূৰ্বাঞ্চলৰ প্ৰতি আছিল বিশেষ অনুৰাগ। তেখেতৰ কাৰ্যকালতে ড’নাৰ মন্ত্ৰালয় সৃষ্টি কৰি উত্তৰ-পূৰ্বাঞ্চলৰ সামগ্ৰিক বিকাশৰ দিশটোক তৰান্বিত কৰাৰ ক্ষেত্ৰত বিশেষ পদক্ষেপ গ্ৰহণ কৰিছিল’।
মুখ্যমন্ত্ৰী সোণোৱালে অটল বিহাৰী বাজপেয়ীৰ বিয়োগত ৰাষ্ট্ৰই এগৰাকী যুগদ্ৰষ্টা, স্বপ্নদ্ৰষ্টা, নিৰ্ভীক নিষ্ঠাবান আৰু সৰ্বোপৰি এগৰাকী মানৱ দৰদী নেতাক হেৰুৱালে বুলি উল্লেখ কৰি তেওঁৰ বিদেহী আত্মাৰ চিৰশান্তি কামনা কৰে।
‘ভাৰতীয় ৰাজনীতিৰ উজ্জ্বল নক্ষত্ৰ, অসম হিতৈষী বাজপেয়ী ডাঙৰীয়াই স্বাধীনোত্তৰ ভাৰতবৰ্ষৰ ইতিহাসত যুগদ্ৰষ্টাৰ ভূমিকাৰে আধুনিক ভাৰতৰ সোপান ৰচিছিল’ বুলি এক প্ৰেছ বিবৃতিত উল্লেখ কৰি বাজপেয়ীৰ মৃত্যুত শোক প্ৰকাশ কৰে ৰাজ্যিক বিজেপিৰ সভাপতি ৰঞ্জিত কুমাৰ দাসে।
প্ৰাক্তন প্ৰধানমন্ত্ৰীজনৰ মৃত্যুত শোক প্ৰকাশ ককৰিছে সদৌ অসম ছাত্ৰ সন্থায়ো। সংবাদ মাধ্যমলৈ প্ৰেৰণ কৰা এক বিবৃতিত আছু নেতৃত্বই কয়, ‘অটল বিহাৰী বাজপেয়ী এগৰাকী জনপ্ৰিয় নেতা আছিল আৰু তেওঁ সদায়েই গণতান্ত্ৰিক মূল্যবোধৰ প্ৰতি সন্মান আৰু আস্থা ৰাখি দেশক নেতৃত্ব দিছিল।‘
আছুৰ নেতৃত্বই লগতে কয় যে অটল বিহাৰী বাজপেয়ীয়ে অসম আন্দোলনৰ প্ৰতি পূৰ্ণ সহাঁৰি আগবঢ়াইছিল আৰু অসমৰ আন্দোলনকাৰী ৰাইজৰ কাষত আহি ঠিয় দিছিল। তেওঁ ‘অসম চুক্তি’ৰ প্ৰতি সহাঁৰি জনাই বিদেশী নাগৰিকৰ সমস্যাটো সমাধান হোৱাৰ পোষকতা কৰা বুলিও ছাত্ৰ সন্থাৰ নেতৃত্বই উল্লেখ কৰে।
অসম গণ পৰিষদৰ সভাপতি অতুল বৰা, প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত, কাৰ্যকৰী সভাপতি কেশৱ মহন্তইয়ো বাজপেয়ীৰ মৃত্যুত শোক প্ৰকাশ কৰিছে। ইতিমধ্যে প্ৰয়াত প্ৰধানমন্ত্ৰীজনক শেষ শ্ৰদ্ধা নিবেদন কৰিবলৈ অতুল বৰা আৰু কেশৱ মহন্তই দিল্লীলৈ ৰাওনা হৈছে।
‘বাজপেয়ীৰ মৃত্যুত আমাৰ দেশে এজন সুদক্ষ নেতাক হেৰুৱালে। তেওঁ আছিল একেধাৰে এজন গণতন্ত্ৰৰ প্ৰকৃত বিশ্বাসী, আগশাৰীৰ কবি, লেখক, সুবক্তা আৰু এজন সুযোগ্য সাংসদ’, এইদৰে কয় প্ৰাক্তন মুখ্যমন্ত্ৰী তৰুণ গগৈয়ে। গগৈয়ে বাজপেয়ীলৈ গভীৰ শ্ৰদ্ধা জ্ঞাপন কৰে।
প্ৰাক্তন প্ৰধানমন্ত্ৰীজনৰ দেহাৱসানত শোক প্ৰকাশ কৰি বিদেহী আত্মাৰ চিৰশান্তি কামনা কৰিছে অসম প্ৰদেশ কংগ্ৰেছৰ সভাপতি ৰিপুন বৰা আৰু অসম বিধান সভাৰ বিৰোধী দলপতি দেৱব্ৰত শইকীয়ায়ো।
বাজপেয়ীৰ মৃত্যুত শোক প্ৰকাশ কৰিছে এ আই ইউ ডি এফে। দলটোৰ সভাপতি মৌলানা বদৰুদ্দিন আজমলে কয়, ‘তেখেতৰ মৃত্যুত ভাৰতবৰ্ষই এজন সুযোগ্য লোক হেৰুৱালে। তেওঁ এজন সুদক্ষ ৰাজনীতিবিদ তথা দূৰদৰ্শী আছিল। বাজপেয়ীৰ ভিজন মতে ভাৰতবৰ্ষত আজিও বহুতো উন্নয়নমূলক কাম চলি আছে।‘
একেদৰে, বাজপেয়ীলৈ গভীৰ শ্ৰদ্ধাঞ্জলি নিবেদন কৰিছে সদৌ অসম ট্ৰাইবেল সংঘ, জনজাতি সংগঠনসমুহৰ সমন্বয়ৰক্ষী সমিতি, দুৰ্নীতি বিৰোধী যুৱ শক্তি, অসমকে ধৰি ৰাজ্যৰ বিভিন্ন সংগঠনে।
