টকিঅ’ অলিম্পিকত মল্লযুঁজত ভাৰতৰ সম্ভাৱনাক তুলি ধৰিলে বজৰং পুনিয়াই।
ইয়াৰ পূৰ্বে পুৰুষৰ ফ্ৰী-ষ্টাইল মল্লযুঁজৰ ৬৫ কেজি শাখাতৰ ছেমিফাইনেলত পৰাজিত হৈ সোণ আৰু ৰূপৰপদকৰ পৰা আঁতৰিছিল পুনিয়া।
কিন্তু অৱশেষত ব্ৰঞ্জ জয় কৰি দেশবাসীৰ বাবে আশাৰ বতৰা কঢ়িয়াই আনিলে বজৰং পুনিয়াই।
ব্ৰঞ্জ পদক বাউটত বজৰঙে ৮-০ ব্যৱধানত পৰাজিত কৰে বিশ্ব চেম্পিয়নশ্বিপৰ ৰূপৰ পদক বিজয়ী কাজাখাস্তানৰ মল্লযুঁজাৰু দৌলত নিয়াজবেকভক।
কাজাখাস্তানৰ মল্লযুঁজাৰুগৰাকী বজৰঙৰ বাবে একেবাৰে অপৰিচিত নাছিল। কিয়নো দুমাহ পূৰ্বে বজৰঙে তেওঁক পৰাস্ত কৰিছিল।
অৱশ্যে, ২০১৯চনৰ বিশ্ব চেম্পিয়নশ্বিপত দৌলতৰ বিৰুদ্ধে ছেমিফাইনেলত পৰাজিত হৈছিল বজৰং।
এইবাৰ অলিম্পিকত সেই পৰাজয়ৰ মধুৰ প্ৰতিশোধ ল’লে বজৰং পুনিয়াই।
ব্ৰঞ্জ মেডেল বাউটৰ ফাৰ্ষ্ট পিৰিয়ডত ২-০ পইন্টত বজৰং আগবাঢ়ি থাকে। তেওঁ দুবাৰ এক পইন্টকৈ সংগ্ৰহ কৰে। ছেকেণ্ড পিৰিয়ডতো পইন্ট সংগ্ৰহ কৰিব নোৱাৰিলে দৌলতে। বজৰঙে ছেকেণ্ড পিৰিয়ডত আৰু ৬পইন্ট সংগ্ৰহ কৰে।