ৰাজ্যব্যাপী কা’ বিৰোধী আন্দোলন চলি থকাৰ মাজতে নাগ্ৰীজুলি আৰক্ষী চকীৰ অন্তৰ্গত বিমলানগৰ শান্তি আশ্ৰমত আজি এখন শান্তি সমিতি গঠন কৰা হয়। তামুলপুৰ মহকুমাৰ সহকাৰী আয়ুক্ত হৃদয় কুমাৰ দাসক সভাপতি, ছাত্র নেতা কুমুদ ডেকাক কাৰ্যকৰী সভাপতি, মাধৱ ছেত্ৰী আৰু পৰিমল শীলক যুটীয়া সম্পাদক হিচাপে হিচাপে লৈ উক্ত সমিতি গঠন কৰা হয়।
এই উদ্দেশ্যে আয়োজিত সভাত অংশগ্ৰহণ কৰি বাক্সা জিলাৰ আৰক্ষী অধীক্ষক প্ৰতীক বিজয় থুৱেৰে আন্দোলনৰ সময়ত কোনও যাতে হাতত আইন তুলি নলয় সেই ক্ষেত্ৰত ছাত্র সংগঠন সমূহৰ নেতা-কৰ্মীৰ লগতে অন্যান্য দল সাংগঠনৰ নেতৃত্বক আহ্বান জনায়। অন্যথা আৰক্ষীয়ে আইন ভংগকাৰীৰ বিৰুদ্ধে কঠোৰ ব্যৱস্থা ল’বলৈ বাধ্য হ’ব বুলি জানিবলৈ দিয়ে।
উল্লেখ্য যে যোৱা ২৫ ডিচেম্বৰত ভাৰত-ভূটান সীমান্তৰ বগামাটিত বনভোজ খাবলৈ অহা দল আৰু একাংশ স্থানীয় লোকৰ মাজত ভুল বুজাবুজিৰ সৃষ্টি হোৱাত এক অপ্ৰিতিকৰ পৰিস্থিতিৰ সৃষ্টি হৈছিল যদিও স্থানীয় দল-সংগঠনৰ তৎপৰাতত পৰিস্থিতিৰ উপশম ঘটিছিল।
তাৰ পৰিপ্ৰেক্ষিততে আজি গুৱাবাৰীৰ বিমলানগৰ শান্তি আশ্ৰমত আছু, গোর্খা ছাত্র সন্থা, এবছু, বাঙালী যুৱ ছাত্ৰ ফেডাৰেশ্বনকে ধৰি কেইবাটাও দল সংগঠনৰ উদ্যাগত আৰু তামুলপুৰ মহকুমা প্ৰশাসন আৰু আৰক্ষী প্ৰশাসনৰ সহযোগত আজি শান্তি সমিতি গঠন কৰা হয়।
সভাত তামুলপুৰৰ সহকাৰী আয়ুক্ত হৃদয় কুমাৰ দাস, তামুলপুৰ মহকুমা আৰক্ষী বিষয়া অসীমা কলিতা, তামুলপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া শান্তি আশ্ৰমৰ স্বামীজী, বাক্সা জিলা আছুৰ সভাপতি গোবিন্দ শৰণীয়া, সদৌ অসম বাঙালী যুৱ ছাত্ৰ ফেডাৰেশ্বনৰ সম্পাদক অধীৰ আৰ্য্য, বাক্সা জিলা বাঙালী যুৱ ছাত্ৰ ফেডাৰেশ্বনৰ সম্পাদক পৰিমল শীল, বাক্সা জিলা গোর্খা ছাত্র সন্থাৰ সাধাৰণ সম্পাদক মাধৱ ছেত্ৰী, কোঁচ ৰাজবংশী ছাত্র সন্থাৰ নেতা নয়ন তালুকদাৰ, নাগ্ৰীজুলি আঞ্চলিক এবছুৰ উপ সভাপতি ৰেবেন বড়োকে আদি কৰি কেইবাটাও দল সংগঠনৰ নেতা কৰ্মী, সমাজকৰ্মী চক্ৰ বাহাদুৰ চৌহান, যুৱ সমাজকৰ্মী ভজন দাস, খকণ বিশ্বাস আদি উপস্থিত থাকে।
