বৈদ্যুতিকৰণৰ বাবে কেন্দ্ৰীয় চৰকাৰে বিভিন্ন আঁচনি গ্ৰহণ কৰাৰ পাছতো আজি পৰ্যন্ত বিদ্যুৎ সংযোগ নহ’ল গোৱালপাৰা জিলাৰ মাটিয়া ৰাজহ চক্ৰৰ অন্তৰ্গত বলদমাৰি বালাৰভিটা গাঁৱত।
দেশৰ প্ৰত্যেকখন গাঁৱতে যাতে বিদ্যুতৰ সংযোগ হয় তাৰ বাবে কেন্দ্ৰীয় চৰকাৰে সৌভাগ্য, দীনদয়াল উপাধ্যায় গ্ৰাম জ্যোতি যোজনাৰ দৰে অভিলাষী আঁচনি গ্ৰহণ কৰিছিল। কিন্তু এই আঁচনি সমূহে গাঁওখনক ঢুকি পোৱা নাই।
উল্লেখ্য যে বিভাগীয় কৰ্তৃপক্ষই কিছু বছৰ আগতেই গাঁওখনত বিদ্যুতৰ খুটা পুতিছিল যদিও আজিলৈ নহ’ল বিদ্যুৎ সংযোগ।
‘চাৰি বছৰ আগতে কেইবাটাও খুটা পুতিছিল আৰু কেইটামান খুটাৰ সৈতে তাঁৰো সংলগ্ন কৰিছিল। তেতিয়া আমাৰ ছাত্ৰ-ছাত্ৰী সকলে আশা কৰিছিল যে গাঁওখনৰ লগতে বিদ্যালয়ত অতি শীঘ্ৰে বিদ্যুৎ সংযোগ হ’ব আৰু গৰমৰ দিনত বিদ্যালয়ত ফেনৰ বতাহত পঢ়িব পাৰিব’। বালাৰভিটা নিম্ন প্ৰাথমিক বিদ্যালয়ৰ প্ৰধান শিক্ষক আবু চামাই এইদৰে কয় নৰ্থ-ইষ্ট নাওক।
‘দেশৰ প্ৰত্যেকখন গাঁৱতে বিদ্যুৎ সংযোগ কৰা হোৱা বুলি দাবী কৰিলে মই আঁচৰিত হওঁ কিয়নো গোৱালপাৰা চহৰৰ পৰা মাত্ৰ ১০ কিলোমিটাৰ দূৰত অৱস্থিত বালাৰভিটাৰ দৰে গাঁৱতে আজি পৰ্যন্ত বিদ্যুৎ সংযোগ নহ’ল’। প্ৰধান শিক্ষক গৰাকীৰ মন্তব্য।
প্ৰধান শিক্ষক গৰাকীয়ে গাঁওখনত বিদ্যুৎ সংযোগ কৰিবলৈ সংশ্লিষ্ট বিভাগক উদ্দেশ্যি বহুবাৰ আবেদন জনোৱাৰ পাছতো বিভাগে কোনো ব্যৱস্থা গ্ৰহণ নকৰাৰো অভিযোগ উত্থাপন কৰিছে।
‘এতিয়াও গাঁওবাসীয়ে বিদ্যুতৰ পোহৰ দেখাই নাই তেতিয়াহ’লে কেনেকৈ প্ৰধান মন্ত্ৰী নৰেন্দ্ৰ মোদীৰ ‘ডিজিটেল ইণ্ডিয়া’ৰ সপোন বাস্তৱত পৰিণত হ’ব’। গাঁও পঞ্চায়ত সদস্য আইনাল হকে এই প্ৰশ্ন উত্থাপন কৰিছে।
ইফালে কি কাৰণত গাঁওখনত বিদ্যুৎ সংযোগ কৰা হোৱা নাই সেই বিষয়ে জিলাখনৰ এ পি ডি চি এলৰ বিষয়াৰ পৰা জানিব বিচৰাত এগৰাকী বিষয়াই কয়, ‘কিবা কিবি ভুলৰ বাবে গাঁওবাসী বঞ্চিত হৈ আছিল কিন্তু মই কথা দিছো গাঁওখনত অতি শীঘ্ৰে বিদ্যুতৰ ব্যৱস্থা কৰা হ’ব’।
উল্লেখ্য যে বালাৰভিটাৰ দৰে এতিয়াও বিভিন্ন গাঁৱত বিদ্যুৎ সংযোগ হ’বলৈ বাকী আছে। কিন্তু ২০১৮ চনতে প্ৰধান মন্ত্ৰী নৰেন্দ্ৰ মোদীয়ে দেশত এশ শতাংশই বৈদ্যুতিকৰণ হোৱা বুলি ঘোষণা কৰি থৈছিল।
মোদীৰ ঘোষণা মিছা বুলি প্ৰমাণিত হৈছিল তেতিয়াই যেতিয়া দেশৰ ৩১ মিলিয়ন ঘৰত বিদ্যুতৰ সংযোগ নোহোৱা বুলি বিভিন্ন সংবাদ মাধ্যমত বাতৰি প্ৰকাশ হৈছিল।
