তামিলনাডুত শিক্ষা ক্ষেত্ৰৰ বাবে এক গুৰুত্বপূৰ্ণ সিদ্ধান্ত। চেন্নাইৰ কোলাথুৰত চৰকাৰী কলা আৰু বিজ্ঞান শাখাৰ মহাবিদ্যালয় নিৰ্মাণৰ বাবে শ্ৰী সোমনাথস্বামী মন্দিৰৰ মাটি ব্যৱহাৰৰ পথ প্ৰসস্ত হ’ল। শুকুৰবাৰে উচ্চতম ন্যায়ালয়ে মাদ্ৰাজ উচ্চ ন্যায়ালয়ৰ ৰায়ক সমৰ্থন কৰি আবেদনকাৰী টি আৰ ৰমেশে দাখিল কৰা গোচৰ খাৰিজ কৰে।
উল্লেখ্য যে ২০২৪ চনৰ অক্টোবৰ মাহত মাদ্ৰাজ উচ্চ ন্যায়ালয়ে মন্দিৰৰ ডেৰ-দুই একৰ মাটি ২৫ বছৰৰ বাবে লিজত দি শিক্ষানুষ্ঠান নিৰ্মাণৰ প্ৰস্তাৱ বৈধ বুলি ঘোষণা কৰিছিল। আবেদনকাৰীয়ে মন্দিৰৰ মাটি ব্যৱহাৰৰ প্ৰতি আপত্তি জনাই কয় যে ইয়াত মন্দিৰৰ কল্যাণৰ বাবে ভাড়া কেনেকৈ ব্যৱহাৰ কৰা হ’ব তাৰ স্পষ্ট ব্যাখ্যা নাই। কিন্তু উচ্চতম ন্যায়ালয়ে আজি স্পষ্টকৈ কয় যে উচ্চ ন্যায়ালয়ৰ ৰায় শুদ্ধ আৰু ইয়াত নতুনকৈ হস্তক্ষেপৰ প্ৰয়োজন নাই।
এই ৰায়ৰ পিছতে তামিলনাডুৰ এইচ আৰ এণ্ড চি মন্ত্ৰী পি কে ছেকাৰবাবুৱে কৃতজ্ঞতা প্ৰকাশ কৰি কয়—“ডি এম কে চৰকাৰ ক্ষমতালৈ অহাৰ পিছৰে পৰা ইতিমধ্যে ৩৫০৩টা মন্দিৰ পুনৰ প্ৰতিষ্ঠা কৰা হৈছে। ২০২৬ চনৰ জানুৱাৰী মাহলৈকে এই সংখ্যা ৪০০০ত উপনীত হ’ব।”
যদিও চৰকাৰে এই পদক্ষেপক জনকল্যাণমূলক বুলি বৰ্ণনা কৰিছে, বিৰোধীয়ে ভিন্ন মত প্ৰকাশ কৰিছে। তেওঁলোকে কৈছে—ভক্তসকলে দান কৰা মন্দিৰৰ মাটি ধৰ্মীয় কাৰ্যৰ বাহিৰে অন্য উদ্দেশ্যত ব্যৱহাৰ কৰাটো অনুচিত। উল্লেখযোগ্য যে প্ৰস্তাৱিত মহাবিদ্যালয়খন নিৰ্মাণ হ’ব কোলাথুৰত, যিটো মুখ্যমন্ত্ৰী এম কে ষ্টেলিনৰ বিধানসভা সমষ্টি।
