পাকিস্তানত আন এক ভয়ংকৰ সন্ত্ৰাসবাদী আক্ৰমণৰ ঘটনা সংঘটিত হৈছে। এইবাৰ পাকিস্তানী সেনাৰ কনভয়ত আক্ৰমণৰ দায়িত্ব স্বীকাৰ কৰিলে বেলুচ লিবাৰেচন আৰ্মীয়ে। দেওবাৰে বেলুচিস্তানৰ ৰাজধানী কুৱেটাৰ পৰা টাফটান অভিমুখে গৈ আছিল কনভয়টো। সেই সময়ত বেলুচ উগ্ৰপন্থীয়ে কনভয়ত আক্ৰমণ চলায়। তেওঁলোকে ৯০ জন লোকক হত্যা কৰা বুলি দাবী কৰে। অৱশ্যে পাকিস্তান প্ৰশাসনৰ সূত্ৰ অনুসৰি এই আক্ৰমণত ৭ জন লোক নিহত হয়। আহত হৈছে ২১ জন লোক।
পাকিস্তান প্ৰশাসনৰ এক বিবৃতিত কোৱা হৈছে যে, “কুৱেটাৰ পৰা টাফটানলৈ যোৱা সেনাৰ কনভয়ক আক্ৰমণ কৰা হৈছে। এই কনভয়ত আছিল ৭খন বাছ আৰু দুখন গাড়ী। তেওঁলোকক লক্ষ্য কৰি লৈছে উগ্ৰপন্থীয়ে। কনভয়ত থকা এখন বাছত আই ই ডি বিস্ফোৰক ভৰ্তি এখন বাহনে খুন্দা মাৰে। আত্মঘাতী আক্ৰমণ বুলি অনুমান কৰা হৈছে। তদুপৰি কনভয়ৰ বাহনত ৰকেট গ্ৰেনেড নিক্ষেপ কৰা হয়।”
আহতসকলক শীঘ্ৰে চিকিৎসাৰ বাবে সেনাৰ হেলিকপ্টাৰেৰে চিকিৎসালয়লৈ লৈ যোৱা হৈছে। নিৰীক্ষণৰ বাবে নিয়োগ কৰা হৈছে ড্ৰ’ন।
ইফালে, বেলুচ লিবাৰেচন আৰ্মীয়ে এক বিবৃতিত কয় যে, “মাজিদ ব্ৰিগেডে সেনাৰ কনভয়ক আক্ৰমণ কৰে। নাস্কি অঞ্চলৰ আৰ চি ডি হাইৱেৰ ৰকছ মিলৰ সমীপত সংঘটিত হয় এই আক্ৰমণ। কনভয়ত আঠখন বাছ আছিল। ইয়াৰ ভিতৰত এখন বাছ সম্পূৰ্ণৰূপে ধ্বংস কৰা হৈছে।”
বিবৃতিটোত লগতে কোৱা হৈছে যে আক্ৰমণৰ পিছত বেলুচ লিবাৰেশ্যন আৰ্মীৰ ফাতেহ স্কোয়াডে আন এখন বাছ ঘেৰাও কৰে। সকলো পাকিস্তানী জোৱানক হত্যা কৰা হৈছে বুলি দাবী কৰে। উগ্ৰপন্থী সংগঠনটোৱে মুঠ ৯০ জন লোকক হত্যা কৰা বুলি জানিবলৈ দিয়ে।
উল্লেখ্য যে যোৱা মঙলবাৰে পুৱা ৯ বজাত কুৱেটা ষ্টেচনৰ পৰা জাফৰ এক্সপ্ৰেছ ৰাওনা হৈছিল। পঞ্জাৱ প্ৰদেশৰ মাজেৰে ১৬০০ কিলোমিটাৰ যাত্ৰা কৰি পেছাৱৰলৈ যাবলগীয়া আছিল। ৩০ ঘণ্টীয়া যাত্ৰা ৩০ টা ষ্টেচনত ৰোৱাৰ কথা আছিল। মঙলবাৰে দিনৰ প্ৰায় ১ বজাত বোলান পাছৰ সমীপত জাফৰ এক্সপ্ৰেছ বেলুচ উগ্ৰপন্থীয়ে হাইজেক কৰে।
