কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পাছত ভাৰত-পাকিস্তানৰ সংঘাতে এক নতুন মাত্ৰা লাভ কৰিছে। কটকটীয়া নিৰাপত্তাৰক্ষীৰে আগুৰি ধৰিছে সীমান্ত। ভাৰতৰ সম্ভাৱ্য আক্ৰমণক লৈ চিন্তিত পাকিস্তান। এই বাবে উত্থান ঘটিছে বাংলাদেশৰ। বিডিআৰ আয়োগৰ মুৰব্বী তথা বাংলাদেশৰ প্ৰাক্তন সেনাৰ মুৰব্বী মেজৰ জেনেৰেল (অৱসৰপ্ৰাপ্ত) এ এল এম ফজলুৰ ৰহমানে অন্তৱৰ্তীকালীন চৰকাৰক “ভাৰতৰ সাতখন ৰাজ্য দখল” কৰিবলৈ পৰামৰ্শ দিয়ে।
বাংলাদেশৰ প্ৰাক্তন মেজৰ জেনেৰেল এএলএম-এ শেহতীয়াকৈ ভাৰতৰ পহলগাঁৱত সংঘটিত সন্ত্ৰাসবাদী আক্ৰমণৰ পাছত ভাৰতে পাকিস্তানত আক্ৰমণ কৰিলে বাংলাদেশে ভাৰতৰ উত্তৰ-পূবৰ ৰাজ্যসমূহ দখল কৰিব লাগে বুলি পৰামৰ্শ দিছে। চীনৰ সৈতে যৌথ সামৰিক পদক্ষেপ লোৱাৰ কথাও তেওঁ কয়।
তেওঁ ফেচবুক পোষ্টত এই উত্তেজক মন্তব্য কৰে, যিটোৱে ইতিমধ্যে বিতৰ্কৰ সৃষ্টি কৰিছে। তেওঁ লিখিছে, “যদি ভাৰতে পাকিস্তানক আক্ৰমণ কৰে তেন্তে বাংলাদেশে ভাৰতৰ উত্তৰ-পূবৰ সাতখন ৰাজ্য দখল কৰিব লাগে।”
তেওঁ লগতে কয় যে এই বিষয়ত চীনৰ সৈতে আলোচনা আৰম্ভ কৰাটো গুৰুত্বপূৰ্ণ।
উল্লেখ্য যে, ফজলুৰ ৰহমান বৰ্তমান অন্তৱৰ্তীকালীন মুখ্য উপদেষ্টা মহম্মদ ইউনুছৰ নেতৃত্বত চলি থকা চৰকাৰৰ ঘনিষ্ঠ বুলি জনা যায়। ২০২৪ চনৰ ডিচেম্বৰ মাহত ইউনুছ চৰকাৰে তেওঁক ২০০৯ চনৰ বিডিআৰ বিদ্ৰোহৰ হত্যাকাণ্ডৰ তদন্তৰ বাবে গঠন কৰা ৰাষ্ট্ৰীয় স্বতন্ত্ৰ আয়োগৰ অধ্যক্ষ হিচাপে নিযুক্তি দিয়ে।
কিন্তু বাংলাদেশৰ বৈদেশিক মন্ত্ৰালয়ে এক বিবৃতিত কয় যে, ‘মেজৰ জেনেৰেল (অৱসৰপ্ৰাপ্ত) ৰহমানৰ মন্তব্যই বাংলাদেশ চৰকাৰৰ স্থিতি বা নীতি প্ৰতিফলিত নকৰে। চৰকাৰে এনে কোনো বক্তব্যক সমৰ্থন নকৰে।’
বৈদেশিক পৰিক্ৰমা মন্ত্ৰালয়ে আৰু কয় যে বাংলাদেশ সদায় নিজৰ “সাৰ্বভৌমত্ব, ভূখণ্ডৰ অখণ্ডতা, পাৰস্পৰিক সন্মান আৰু শান্তিপূৰ্ণ সহাৱস্থানৰ নীতি”ত অটল। ঢাকা ট্ৰিবিউনৰ এক প্ৰতিবেদন অনুসৰি চৰকাৰে এনে ব্যক্তিগত মতামতক ৰাষ্ট্ৰীয় স্থিতি বুলি নাভাবিবলৈ সকলোকে অনুৰোধ জনাইছে।
