বাংলাদেশৰ প্ৰাক্তন প্ৰধানমন্ত্ৰী বেগম খালেদা জিয়াৰ দেহাৱসান ঘটিছে। তেওঁৰ বয়স আছিল ৮০ বছৰ। বিগত কিছুদিন ধৰি অসুস্থ বিএনপি নেতাগৰাকীৰ শাৰীৰিক অৱস্থা সংকটজনক হৈ পৰিছিল। ৰাজধানী ঢাকাৰ এখন চিকিৎসালয়ৰ চি চি ইউ (ক’ৰ’নাৰী কেয়াৰ ইউনিট)ত তেওঁ চিকিৎসাধীন হৈ আছিল। মঙলবাৰে পুৱা চিকিৎসালয়খনতে তেওঁ শেষ নিশ্বাস ত্যাগ কৰে ।
খালেদাৰ জিয়াৰ কিডনীৰ সমস্যাটো বহুত পুৰণি আছিল। যোৱা ২৩ নৱেম্বৰত শ্বাস-প্ৰশ্বাসজনিত সমস্যাৰ বাবে তেওঁক চিকিৎসালয়ত ভৰ্তি কৰোৱা হৈছিল। পৰীক্ষাৰ অন্তত হাওঁফাওঁৰ সংক্ৰমণ আৰু নিউমোনিয়া ধৰা পৰিছিল।
সূত্ৰ অনুসৰি বয়সৰ বাবে পৰিস্থিতি অতি জটিল হৈ পৰিছিল। কাৰণ ইতিমধ্যে তেওঁৰ শৰীৰত একাধিক সমস্যা হৈছিল। এটাৰ চিকিৎসা কৰিলে আনটোৰ ওপৰত বিৰূপ প্ৰভাৱ পৰিছিল। খালেদাৰ বৃক্কৰ কাৰ্য্যক্ষমতাও যথেষ্ট হ্ৰাস পাইছিল। ফলত একেৰাহে চাৰিদিন ডায়েলাইছিছ কৰিব লগা হয়। শুকুৰবাৰলৈকে খালেদাই কোনো কথা কোৱা নাছিল। শনিবাৰে তেওঁৰ অৱস্থাৰ সামান্য উন্নতি ঘটিছিল।
বাংলাদেশৰ ৰাজনীতিত হাছিনা যেনেকৈ শ্বেখ মুজিবুৰ ৰহমানৰ কন্যা হিচাপে প্ৰতিষ্ঠা হৈছিল, খালেদাও জিয়াউৰ ৰহমানৰ পত্নী হিচাপে পৰিচিত আছিল। স্বামীৰ মৃত্যুৰ পিছত খালেদাই নিজৰ পৰিচয় নিজেই গঢ়ি তুলিছিল। বাংলাদেশ জাতীয়তাবাদী পাৰ্টিৰ বাঘজৰী হাতত লৈছিল। ১৯৯১ চনত খালেদা বাংলাদেশৰ প্ৰথম মহিলা প্ৰধানমন্ত্ৰী হিচাপে পৰিগণিত হয়।
খালেদা জিয়াই দুবাৰ বাংলাদেশৰ প্ৰধানমন্ত্ৰী হিচাপে কাৰ্যনিৰ্বাহ কৰিছে। প্ৰথমবাৰ ১৯৯১ চনৰ পৰা ১৯৯৬ চনলৈ। দ্বিতীয় আৰু শেষবাৰ ২০০১ চনৰ পৰা ২০০৬ চনলৈ। মহিলাৰ শিক্ষাৰ প্ৰসাৰৰ ক্ষেত্ৰত খালেদাৰ চৰকাৰৰ ভূমিকাক বহুতে স্বীকাৰ কৰে।
অৱশ্যে তেওঁৰ কাৰ্যকালত দুৰ্নীতিৰ অভিযোগো উত্থাপন হৈছে। ২০১৮ চনত খালেদাক স্বেচ্ছাসেৱী সংগঠনৰ দুৰ্নীতিৰ অভিযোগত ১৭ বছৰৰ কাৰাদণ্ড বিহা হৈছিল। তাৰ পিছৰে পৰা তেওঁ কেইবাবাৰো অসুস্থ হৈ পৰিছে।
প্ৰাক্তন প্ৰধানমন্ত্ৰীগৰাকীক চলিত বৰ্ষৰ আৰম্ভণিতে উন্নত চিকিৎসাৰ বাবে লণ্ডনলৈ বিমানেৰে লৈ যোৱা হৈছিল। এইবাৰো এনে পৰিকল্পনা কৰা হৈছিল। কিন্তু বিএনপি নেতাগৰাকীৰ শাৰীৰিক অৱস্থা সুস্থিৰ নোহোৱাত দায়িত্ব ল’ব পৰা নগ’ল।
