ইউনাইটেড ফ’ৰাম অৱ বেংক ইউনিয়নে (ইউ এফ বি ইউ) ২৪ আৰু ২৫ মাৰ্চত দুদিনীয়া দেশজোৰা ধৰ্মঘটৰ আহ্বান জনাইছে। এই ধৰ্মঘটৰ জৰিয়তে তেওঁলোকে বেংকিং খণ্ডত পৰ্যাপ্ত নিযুক্তি, অস্থায়ী কৰ্মীসকলৰ নিয়মীয়াকৰণ আৰু পাঁচদিনীয়া কৰ্ম সপ্তাহ কাৰ্যকৰী কৰাৰ দাবী জনাইছে।
ইউ এফ বি ইউ হৈছে ৰাজহুৱা খণ্ডৰ বেংক, ব্যক্তিগত বেংক, বিদেশী বেংক, সমবায় বেংক আৰু আঞ্চলিক গ্ৰাম্য বেংকৰ আঠ লাখৰো অধিক কৰ্মচাৰী আৰু বিষয়াক প্ৰতিনিধিত্ব কৰা ৯টা বেংক ইউনিয়নৰ সন্মিলিত সংস্থা।
অল ইণ্ডিয়া বেংক অফিচাৰ্ছ কনফেডাৰেচনৰ (এআইবিঅ’চি) উপ-সভাপতি পংকজ কাপুৰে কয় যে, “২২ মাৰ্চৰ পৰা চাৰি দিনৰ বাবে বেংকিং সেৱা ব্যাহত থাকিব। ২২ মাৰ্চৰ পৰা চাৰিদিনৰ বাবে বেংকিং পৰিসেৱা বন্ধ থাকিব। ২৩ মাৰ্চ বেংক বন্ধ (দেওবাৰ) আৰু ২৪-২৫ মাৰ্চ ধৰ্মঘট। ফলত ক্লিয়াৰিং হাউচ, নগদ ধনৰ লেনদেন, ৰেমিটেন্স, এডভান্স আদি সকলো ২২ মাৰ্চৰ পৰা চাৰিদিনৰ বাবে সকলো বন্ধ থাকিব।” এই ধৰ্মঘটৰ ফলত সাধাৰণ ৰাইজৰ বেংকিং কাম-কাজত সমস্যাৰ সৃষ্টি হ’ব পাৰে।
ইউ এফ বি ইউৰ দাবীসমূহৰ ভিতৰত আছে সকলো স্তৰতে পৰ্যাপ্ত নিযুক্তি, অস্থায়ী কৰ্মচাৰীৰ নিয়মীয়াকৰণ, পাঁচ দিনীয়া কৰ্ম সপ্তাহ, চাকৰিৰ সুৰক্ষাৰ প্ৰতি ভাবুকি কঢ়িয়াই অনা শেহতীয়া ডি এফ এছ/চৰকাৰী নিৰ্দেশনা প্ৰত্যাহাৰ কৰা যিয়ে কৰ্মচাৰীৰ মাজত বিভাজন আৰু বৈষম্যৰ সৃষ্টি কৰে আৰু ৰাজহুৱা খণ্ডৰ বেংকৰ স্বায়ত্তশাসনক ক্ষতিগ্ৰস্ত কৰে।
তদুপৰি উত্তেজিত গ্ৰাহকৰ আক্ৰমণ আৰু নিৰ্যাতনৰ পৰা বেংক কৰ্মচাৰীক সুৰক্ষা প্ৰদান, পি এছ বিত কৰ্মী/অফিচাৰ ডাইৰেক্টৰ পদ পূৰণ, আই বি এৰ সৈতে অমীমাংসিত হৈ থকা সমস্যা সমাধান আৰু চৰকাৰী কৰ্মচাৰীৰ দৰে গ্ৰেচুইটি আইন সংশোধন কৰি আয়কৰৰ পৰা ৰেহাই দিয়াৰ দাবী উত্থাপন কৰা হৈছে।
ইউনিয়নৰ বিবৃতিত লগতে কোৱা হৈছে, “কৰ্মচাৰীসকলক কম খৰচত প্ৰদান কৰা কল্যাণমূলক সুবিধাসমূহৰ ওপৰত আয়কৰ আদায় কৰাটো উচিত নহয়।” ইয়াৰ উপৰিও চৰকাৰে আইডিবিআই বেংকত নূন্যতম ৫১% ইকুইটি কেপিটেল বজাই ৰাখিবলৈ, পিএছবিৰ নীতিগত বিষয়ত ডিএফএছৰ অত্যধিক হস্তক্ষেপ বন্ধ কৰিবলৈ, স্থায়ী চাকৰিৰ আউটচ’ৰ্চিং বন্ধ কৰিবলৈ আৰু বেংকিং উদ্যোগত অন্যায় শ্ৰম প্ৰথাৰ অন্ত পেলাবলৈ দাবী জনায়।
ইউ এফ বি ইউৰ প্ৰেছ বিজ্ঞপ্তিটোত কোৱা হৈছে যে গ্ৰাহকক সন্তোষজনক সেৱা প্ৰদান কৰিবলৈ আৰু বৰ্তমানৰ কৰ্মচাৰীসকলৰ ওপৰত অতিৰিক্ত কামৰ বোজা হ্ৰাস কৰিবলৈ শাখাসমূহত পৰ্যাপ্ত কৰ্মচাৰীৰ প্ৰয়োজন।
তেওঁলোকে উল্লেখ কৰে যে, “আৰ বি আই, বীমা কোম্পানী আৰু চৰকাৰী খণ্ডকে ধৰি সমগ্ৰ বিত্তীয় খণ্ডই সপ্তাহত পাঁচ দিন কাম কৰে। আনকি আই টিকে ধৰি বহু ব্যক্তিগত খণ্ডতো ইয়াক কাৰ্যকৰী কৰা হয়। সেয়েহে আমি বেংকতো পাঁচদিনীয়া কৰ্মদিনৰ দাবী জনাইছো। ভাৰতীয় বেংকে এবছৰ পূৰ্বে চৰকাৰক এই পৰামৰ্শ দিছিল যদিও চৰকাৰৰ অনুমোদন এতিয়াও বাকী আছে। আমি আৰু পলম নকৰাকৈ ইয়াক কাৰ্যকৰী কৰিবলৈ দাবী জনাইছো।”
তদুপৰি, চৰকাৰৰ শেহতীয়া একপক্ষীয় নিৰ্দেশনা প্ৰত্যাহাৰ কৰাৰ দাবী উত্থাপন হৈছে, যেনে কৰ্মচাৰীৰ কৰ্মক্ষমতাৰ মাহেকীয়া পৰ্যালোচনা আৰু ইউনিয়নৰ লগত আলোচনা নকৰাকৈ উদ্গনিমূলক আঁচনিৰ পৰিৱৰ্তন। এই দাবীসমূহৰ সমাধানৰ বাবে ইউ এফ বি ইউয়ে ২৩ মাৰ্চৰ মাজনিশাৰ পৰা ২৫ মাৰ্চৰ মাজনিশালৈকে দুদিনীয়া ধৰ্মঘটৰ আহ্বান জনাইছে।
ইউ এফ বি ইউৰ সাধাৰণ সম্পাদক ৰূপম ৰায় স্বাক্ষৰিত এক বিবৃতিত কোৱা হৈছে যে আমি ধৰ্মঘট কৰিবলৈ বাধ্য হৈছো কাৰণ এই সমস্যা সমাধানৰ বাবে মেনেজমেন্ট বা চৰকাৰ আগবাঢ়ি অহা নাই। যিহেতু এই ধৰ্মঘট আই পি এলৰ উদ্বোধনী মেচ (২২ মাৰ্চ)ৰ ঠিক পিছতেই হৈছে, সেয়েহে বেংকিং সেৱাত ইয়াৰ প্ৰভাৱ আৰু অধিক বৃদ্ধি পোৱাৰ সম্ভাৱনা আছে।
