চৰকাৰে ১০টা বেংকক একত্ৰীকৰণৰ বাবে কৰা ঘোষণাৰ বিৰুদ্ধে বেংক য়ুনিয়নে দুদিনৰ বাবে ৰাষ্ট্ৰজোৰা ধৰ্মঘটৰ কথা সদৰী কৰিছে।
বেংক য়ুনিয়নে ২৬ আৰু ২৭ ছেপ্টেম্বৰত ধৰ্মঘটৰ কথা ঘোষণা কৰিছে। ইয়াৰ পাছতে ২৮ তাৰিখে মাহটোৰ চতুৰ্থ শনিবাৰ আৰু ২৯ তাৰিখ দেওবাৰ।
আনহাতে, ৩০ তাৰিখ সোমবাৰ হৈছে বেংকৰ হাফ য়াৰ্লি বন্ধৰ বাবে বেংকৰ কামকাজ বন্ধ থাকিব।
এইদৰে মাহটোৰ শেহৰ ৫টা দিন বেংক বন্ধ হ’ব পাৰে। ২৬ আৰু ২৭ ছেপ্টেম্বৰত হ’বলগীয়া ধৰ্মঘট ৪ টা বেংক য়ুনিয়নে একেলগে ঘোষণা কৰিছে।
ইণ্ডিয়ান বেংক এছোচিয়েশ্যনক য়ুনিয়নৰ ফালৰ পৰা দিয়া জাননীত কোৱা হৈছে যে তেওঁলোকে বেংকৰ একত্ৰীকৰণৰ বিৰুদ্ধে ধৰ্মঘট কৰিব।
যোৱা ৩০ আগষ্টত চৰকাৰৰ ফালৰ পৰা ৰাজহুৱা খণ্ডৰ ১০ টা বেংকৰ একত্ৰীকৰণ কৰি ৪টা বেংক কৰাৰ ঘোষণা কৰা হৈছিল।
চৰকাৰৰ এনে পদক্ষেপৰ ফলত বেংক য়ুনিয়নে চাকৰিৰ প্ৰতি ভাবুকিৰ সৃষ্টি কৰা বুলি শংকিত হৈছে।
অৱশ্যে, এইক্ষেত্ৰত বিত্ত মন্ত্ৰী নিৰ্মলা সীতাৰমনে স্থিতি স্পষ্ট কৰিছে যে বেংকৰ একত্ৰীকৰণৰ ফলত কাৰো চাকৰি নাযায়।
আনহাতে, য়ুনিয়নে জানিবলৈ দিয়ে মতে তেওঁলোকে নৱেম্বৰ দ্বিতীয় সপ্তাহতো অনিৰ্দিষ্টকালীন ধৰ্মঘটত বহিব পাৰে।
অল ইণ্ডিয়া বেংক অফিচাৰ্ছ কনফেডাৰেশ্যন(AIBOC), অল ইণ্ডিয়া বেংক অফিচাৰ্ছ এছোচিয়েশ্যন(AIBOA), ইণ্ডিয়ান নেশ্যনেল বেংক অফিচাৰ্ছ কংগ্ৰেছ INBOC) আৰু নেশ্যনেল অৰ্গেনাইজেশ্যন অফ বেংক অফিচাৰ্ছ (NOBO) য়ে একেলগে ধৰ্মঘটৰ জাননী দিছে।
বেংক য়ুনিয়নে সপ্তাহত ৫টা কৰ্ম দিন কৰা আৰু নগদ লেনদেন তথা নিয়মিত কামৰ সময় হ্ৰাস কৰাৰো দাবী তুলিছে।
