নাগৰিকত্ব (সংশোধন) আইন চমুকৈ ‘কা’ৰ বিৰোধিতা কৰা বাবে বৰপেটাৰ লোকসভাৰ সাংসদ আব্দুল খালেকক ‘হোৱাটচএপ’ৰ জৰিয়তে প্ৰাণে মৰাৰ ভাবুকি দিয়াক লৈ তীব্ৰ প্ৰতিক্ৰিয়াৰ সৃষ্টি হৈছে।
পৃথিৱীৰ সৰ্ববৃহৎ গণতান্ত্ৰিক দেশ ভাৰতবৰ্ষৰ এগৰাকী সাংসদক এনেদৰে প্ৰাণে মৰাৰ ভাবুকি দিয়া বিষয়তো সঁচাকৈয়ে চিন্তনীয় বুলি একাংশ লোকে মত ব্যক্ত কৰিছে৷
বৰপেটা জিলা কংগ্ৰেছৰ মুখপাত্ৰ বলভদ্ৰ দাসে এই ঘটনা সন্দৰ্ভত তীব্ৰ প্ৰতিক্ৰিয়া প্ৰকাশ কৰি হোৱাটছএপ বা ফেইচবুকত বিৰূপ মন্তব্য দিয়া কেইবাজনো লোকক ইতিমধ্যে আৰক্ষীয়ে আটক কৰিছে বুলি জানিবলৈ দিয়ে।
ৰাজ্যৰ সাম্প্ৰতিক পৰিস্থিতিত এগৰাকী সাংসদক এনেদৰে হোৱাটছএপত ভাবুকি দিয়াটো স্পৰ্শকাতৰ বিষয় হিচাপেও অভিহিত কৰে কংগ্ৰেছৰ মুখপাত্ৰ গৰাকীয়ে।
আনহাতে, যদিহে বৰপেটাৰ সাংসদ গৰাকীক ভাবুকি দিয়া লোকজনক আটক কৰি দৃষ্টান্তমূলক শাস্তি প্ৰদান কৰা নহয় তেন্তে চৰকাৰৰ সমৰ্থনপুষ্ট লোকে সাংসদ গৰাকীক প্ৰাণে মৰাৰ ভাবুকি দিয়া বুলি ৰাইজে বুজিবলৈ বাধ্য হব বুলিও তেওঁ কয়৷
দোষীক ৰক্ষণাবেক্ষণ দিয়াৰ বিপৰীতে সামাজিক পৰিবেশ বিনষ্ট কৰিব পৰা এনেধৰণৰ কাম কৰাসকলক উপযুক্ত শাস্তি প্ৰদান কৰি উদাহৰণ দাঙি ধৰিবলৈ বিজেপি চৰকাৰক প্ৰত্যাহ্বান জনাই জিলা কংগ্ৰেছৰ মুখপাত্ৰ গৰাকীয়ে।