অসমীয়া চলচিত্ৰ জগতত নিজস্ব অভিনয় শৈলীৰে দৰ্শকৰ চিৰপৰিচিত অভিনেত্ৰী চেতনা দাসক বৰপেটা আঞ্চলিক ছাত্ৰ সন্থাই ২০১৯ বৰ্ষৰ ‘বৰপেটা বঁটা’ৰ বাবে নিৰ্বাচিত কৰিছে। অসমীয়া নতুন বছৰৰ পহিলা ব’হাগত বৰপেটা আঞ্চলিক ছাত্ৰ সন্থাই আনুষ্ঠানিক ভাবে অভিনেত্ৰীগৰাকীক বঁটা প্ৰদান কৰিব।
প্ৰতিবছৰে বৰপেটা আঞ্চলিক ছাত্ৰ সন্থাই অসমৰ সাহিত্য, সংস্কৃতি, ৰাজনীতি, বিজ্ঞান, সমাজ জীৱনলৈ বিশেষ বৰঙণি আগবঢ়াই অহা ব্যক্তিসকলক পহিলা বহাগত সন্মান স্বৰূপে বৰপেটা বঁটা প্ৰদান কৰি আহিছে।
উল্লেখযোগ্য যে, ১৯৫৪ চনৰ ৪ নৱেম্বৰত তেতিয়াৰ অসমৰ ৰাজধানী শ্বিলঙত জন্মলাভ কৰা চেতনা দাসে জ্যোতি প্ৰসাদ আগৰৱালাৰ ৰচিত শোণিত কুৱৰী নামৰ নাটকখনৰ যোগেৰে অভিনয় জীৱনৰ পাতনি মেলিছিল। শোণিতপুৰৰ দৰং মহাবিদ্যালয়ত অধ্যায়ন কৰা দাসে পাছলৈ অভিনয় জগততে আত্মনিয়োগ কৰে।
মূলত হাস্যধৰ্মী চৰিত্ৰত অভিনয় কৰি অসমীয়া ৰাইজৰ হৃদয়ত স্থান পোৱা অভিনেত্ৰীগৰাকীয়ে অভিনয় কৰা কেইখনমান উল্লেখযোগ্য চলচিত্ৰ হ’ল- বণৰীয়া ফুল, অভিযান, কল্লোল, অগ্নিস্নান, পাপৰি, কোলাহ’ল, ফিৰিঙতি, অদাহ্য, হিয়া দিয়া নিয়া ইত্যাদি।
চেতনা দাসে অভিনয় জীৱনত বিশিষ্ট চলচিত্ৰ পৰিচালক ভৱেন্দ্ৰনাথ শইকীয়া, জাহ্নু বৰুৱাৰ লগতো একেলগে কাম কৰিছে।
