অতি শীঘ্ৰে এক বৃহৎ দুৰ্য্যোগৰ পিনে আগবাঢ়িছে অসম আৰু অৰুণাচল প্ৰদেশ। তিব্বতৰ য়াৰলুং চাংপ’ত সৃষ্টি হোৱা কৃত্ৰিম বান্ধটো শুকুৰবাৰে আবেলি ভাগি গৈছে আৰু পৰৱৰ্তী কেইঘণ্টামানৰ ভিতৰতে চিয়াং আৰু ব্ৰহ্মপুত্ৰত পানীৰ বিশাল ঢল অহাৰ আশংকা কৰা হৈছে।
শুকুৰবাৰে গধূলি পাছিঘাটৰ পৰা অৰুণাচল প্ৰদেশৰ জল সম্পদ বিভাগে নৰ্থ ইষ্ট নাও-ক জনোৱা মতে তিব্বতৰ পৰা অহা খবৰ অনুসৰি কৃত্ৰিম বান্ধটো শুকুৰবাৰে ভাৰতীয় সময় আবেলি ২.৩০ বজাত ভাগি গৈছে।
পানীৰ প্ৰথমটো ঢলে শুকুৰবাৰে ৰাতিৰ ভিতৰত অৰুণাচল প্ৰদেশৰ আপাৰ চিয়াং জিলাৰ টুটিং পৰ্য্যন্ত পোৱাৰ সম্ভাৱনা আছে, আৰু প্ৰতি ছেকেণ্ডত ৮০ হাজাৰ কিউবিক মিটাৰ পৰিমাণৰ পানী নামনিলৈ প্ৰৱাহিত হৈ আছে। “এইটো আমাৰ নৈসমূহৰ বাবে বিশাল পৰিমাণৰ পানী,” বিষয়াজনে জনালে।
অৰুণাচল প্ৰদেশৰ জল সম্পদৰ বিষয়াজনৰ মতে পানীৰ এই বিশাল ঢলে ৰাতি ২ বজাত পাছিঘাট আৰু ৪ বজাত ডিব্ৰুগড় পাবহি পাৰে।
নৈখন বৈ অহা উপত্যকাত পাহাৰ খহি যোৱাৰ ফলত বৃ্হস্পতিবাৰে পুৱা এই বান্ধটোৰ সৃষ্টি হৈছিল। শেহতীয়াকৈ কোনো ভূমিকম্পৰ খবৰ পোৱা হোৱা নাই আৰু ভূমিস্খলনটো স্বাভাৱিক বুলিয়ে জানিব পৰা গৈছে।
লগতে পঢ়ক– য়াৰ্লুং চাংপোত ভূমিস্খলন
তিব্বতৰ পৰা পোৱা খবৰ অনুসৰি বান্ধটো আটাইতকৈ বহল অংশত ৩৫০০ মিটাৰ দীঘল আৰু ২৫০০ মিটাৰ বহল আছিল, আৰু ই তিব্বতৰ নেক্সিয়া জলবিদ্যুৎ কেন্দ্ৰৰ পৰা ১৭ কি. মি. নামনিত।
চীনা প্ৰশাসনে বৃহস্পতিবাৰে মেনলিং কাউণ্টিৰ এখন গাঁৱৰ পৰা ৬ হাজাৰ লোকক ইতিমধ্যে স্থানান্তৰ কৰিছে। বিভাগীয় তথ্য মতে কৃত্ৰিম বান্ধটোত ৭০০ মিলিয়ন কিউবিক মিটাৰ পানী জমা হৈছিল।
অৰুণাচল প্ৰদেশৰ জল সম্পদ বিভাগৰ জ্যেষ্ঠ অভিযন্তা দিবাং তায়েঙে পাছিঘাটত বাহৰ পাতিছে আৰু অহৰহ পৰিস্থিতিৰ নজৰ ৰাখিছে।
“হ’ব পৰা ক্ষয়-ক্ষতিৰ পৰিমাণ আমি এই অৱস্থাতে অনুমান কৰিব পৰা নাই,” ২০০৮ চনত হোৱা বান্ধতকৈ য়াৰলুং চাংপ’ত এইবাৰ সৃষ্ট বান্ধটো বহুত বিশাল আৰু পানীৰ পৰিমাণো বহু বেছি বুলি উল্লেখ কৰি তায়েঙে জনালে।
