সুখবৰ! বৰ্ষাপাৰাত পুনৰ আন্ত:ৰাষ্ট্ৰীয় ক্ৰিকেট মেচ, বিপক্ষ অষ্ট্ৰেলিয়া
ৰাজ্যৰ ক্ৰিকেটপ্ৰেমীসকলৰ বাবে সুখবৰ। স্ব-ৰাজ্যত পুনৰ আন্ত:ৰাষ্ট্ৰীয় মেচ উপভোগৰ সুযোগ লাভ কৰিব অসমৰ ক্ৰিকেটপ্ৰেমীসকলে। স্ব-চক্ষুৰে দেখাৰ সুযোগ পাব আন্ত:ৰাষ্ট্ৰীয় ক্ৰিকেটত দপদপনি তুলি থকা তাৰকা-মহাতাৰকাক।
বিচিচিআই- ৰ শেহতীয়া ঘোষিত সূচীয়ে নিশ্চিত কৰিছে ৰাজ্যৰ ক্ৰিকেট প্ৰেমীসকলৰ বাবে এই সুখবৰ। বিচিচিআই- ৰ সূচী অনুসৰি, চলিত বৰ্ষৰ ২৮ নৱেম্বৰত মহানগৰীৰ বৰ্ষাপাৰা ষ্টেডিয়ামত অনুষ্ঠিত হ’ব ভাৰত-অষ্ট্ৰেলিয়াৰ টি-২০ আন্তঃৰাষ্ট্ৰীয় মেচ।
সীমিত অভাৰৰ শৃংখলাৰ বাবে ভাৰত ভ্ৰমণ কৰিবলগীয়া অষ্ট্ৰেলিয়াই টি-২০ শৃংখলাৰ তৃতীয়খন মেচত বৰ্ষাপাৰাত ঘৰুৱা দল ভাৰতৰ বিপক্ষে প্ৰতিদ্বন্দিতা আগবঢ়াব। উক্ত ভ্ৰমণত অষ্ট্ৰেলিয়াই তিনিখনীয়া এদিনীয়া শৃংখলা আৰু পাঁচখনীয়া টি-২০ শৃংখলাত ভাগ ল’ব।
ইফালে অসম ক্ৰিকেট সন্থাই এক বিবৃতি যোগে আগন্তুক মেচখনৰ বিষয়ে সদৰী কৰি এই সুযোগ দিয়াৰ বাবে বিচিচিআইক ধন্যবাদ জনায়। মেচখন সফলতাৰে অনুষ্ঠিত কৰিবলৈ যৎপৰোনাস্তি চেষ্টা কৰাৰ প্ৰতিশ্ৰুতি দিয়ে অসম ক্ৰিকেট সন্থাই।
উল্লেখ্য যে, ২০২৪ চনত অনুষ্ঠিত হ’বলগীয়া আই চি চি পুৰুষ ক্ৰিকেট বিশ্বকাপৰ মূল গ্ৰুপ মেচ বৰ্ষাপাৰা ষ্টেডিয়ামত অনুষ্ঠিত হ’ব বুলি চৰ্চা চলিছিল যদিও আই চি চি- ৰ প্ৰকাশিত সূচীত মেচ অনুষ্ঠিত কৰাৰ পৰা বঞ্চিত হৈছিল বৰ্ষাপাৰা ষ্টেডিয়াম।
বিশ্বকাপৰ মেচ উপভোগৰ পৰা বঞ্চিত হৈ পৰাৰ বাবে কিছু পৰিমাণে ক্ষুদ্ধ হৈছিল ৰাজ্যৰ ক্ৰিকেটপ্ৰেমীসকল। বিশ্বকাপৰ মূল মেচৰ পৰিৱৰ্তে দুখনমান ৱাৰ্ম আপ মেচ আয়োজনৰহে স্বত্ব লাভ কৰিছিল অসম ক্ৰিকেট সন্থাই।
উল্লেখ্য যে, বৰ্ষাপাৰা ক্ৰিকেট ষ্টেডিয়ামত এইপৰ্যন্ত তিনিখন এদিনীয়া আৰু ছয়খন টি-২০ আন্ত:ৰাষ্ট্ৰীয় মেচ অনুষ্ঠিত হৈছে। লক্ষণীয়ভাৱে ২০১৭ চনত ভাৰত আৰু অষ্ট্ৰেলিয়াৰ মাজতে বৰ্ষাপাৰাত অনুষ্ঠিত হৈছিল প্ৰথমখন আন্ত:ৰাষ্ট্ৰীয় মেচ। উক্ত মেচখনত জয়ী হৈছিল ভ্ৰমণকাৰী দলটো।