যিটো সময়ত গুৱাহাটী মহানগৰীক স্মাৰ্ট চিটি হিচাবে গঢ় দিয়াৰ বাবে চৰকাৰে কোটিটকীয়া পৰিকল্পনা কৰিছে সেই সময়তে একাংশ লোকৰ কেতবোৰ অবিবেচক কাণ্ডই বহতৰে চকু কপালত তুলিছে।
পথ নিৰ্মাণৰ নামত প্ৰশাসনৰে একাংশ লোকে কৰা এনে অবিবেচক কাৰ্ম-কাণ্ডৰ বাবেই এতিয়া মহানগৰীৰ বহু বাসিন্দাই যমৰ যাতনা ভোগ কৰিবলগীয়া হৈছে।
শেহতীয়াকৈ পথ নিৰ্মাণৰ নামত মহানগৰীৰ বৰঠাকুৰ মিল ৰোডত পথৰ মাজতে শিল দমাই থোৱাৰ কথাই সকলোকে স্তম্ভিত কৰিছে।
বৰঠাকুৰ মিল ৰোডৰ ৭ নৃ বাইলেনত পথ নিৰ্মাণৰ বাবে ঠিকাদাৰে পথৰ মাজতেই শিল দমাই থোৱাৰ ফলত পথটোৰে ডাঙৰ চাৰিচকীয়া বাহনতো বাদেই দুচকীয়া বাহনো পাৰ হৈ যোৱাটো একপ্ৰকাৰ অসম্ভৱ হৈ পৰিছে।
অঞ্চলটোত বাস কৰা লোকসকলৰ হ’ব পৰা অসুবিধাৰ কথা চিন্তা নকৰি এনেদৰে পথৰ মাজতে শিল দমাই থোৱা সংশ্লিষ্ট লোকৰ বিৰুদ্ধে ব্যৱস্থা গ্ৰহণৰ দাবী উত্থাপন কৰিছে স্থানীয় ৰাইজে।
পথৰ ওপৰতে শিল দমাই থোৱাৰ ফলত জৰুৰীকালীন অৱস্থাত পথটোৰে কোনো এম্বুলেন্স অথবা অগ্নিনিৰ্বাপক বাহিনীৰ গাড়ীও প্ৰৱেশ কৰিব নোৱাৰিব।
অঞ্চলটোৰ বাসিন্দাসকলে এইবুলি মন্তব্য কৰিছে যে চৰকাৰে তেওঁলোকক পথ নিৰ্মাণ অথবা মেৰামতি কৰি দিবলৈ ওলাই কোনো দয়া কৰা নাই।কাৰণ নাগৰিকসকলে চৰকাৰক নিয়মীয়াভাবে কৰ আদায় দি আহিছে।
পথৰ মাজত দমাই ৰখা শিল শীঘ্ৰে আঁতৰ কৰি পথটো যাতায়াতৰ সূচল কৰি তুলিবলৈ অঞ্চলটোৰ বাসিন্দাসকলে দাবী জনাইছে।