প্ৰধানমন্ত্ৰী মোদীৰ কান্ধুলিলুটি! একালত BBCকো প্ৰশংসাৰে ওপচাই পেলাইছিল মোদীয়ে!

কংগ্ৰেছ নেতা তথা প্ৰাক্তন কেন্দ্ৰীয় মন্ত্ৰী জয়ৰাম ৰমেশে প্ৰধানমন্ত্ৰী নৰেন্দ্ৰ মোদীয়ে কেনেকৈ লুটি বাগৰ মাৰিব পাৰে তাৰ অন্য এক উকৃষ্ট প্ৰমাণ টুইটাৰত ফাদিল কৰিছে। প্ৰধানমন্ত্ৰী নৰেন্দ্ৰ মোদীয়ে দেশৰ প্ৰধানমন্ত্ৰী হোৱাৰ পূৰ্বে BBCক প্ৰশংসাৰে ওপচাই পেলোৱা এক ভিডিঅ’ টুইটাৰ আপলোড কৰি কটাক্ষ কৰিছে, “ক’ত হেৰাই গ’ল সেইদিনবোৰ!”

উল্লেখ্য যে BBCএ নিৰ্মাণ কৰা দুটা খণ্ডৰ এখন তথ্যচিত্ৰত তেতিয়াৰ গুজৰাটৰ মুখ্যমন্ত্ৰী নৰেন্দ্ৰ মোদীক ২০০২ চনৰ গুজৰাটৰ গোধ্ৰা হিংসাত্মক কাণ্ডৰ বাবে প্ৰত্যক্ষভাৱে দায়ী বুলি দাবী কৰিছিল। ইয়াৰ পাছতে ভাৰত চৰকাৰে তথ্যচিত্ৰখন ততালিকে ভাৰতত নিষিদ্ধ কৰে। তথ্যচিত্ৰখন নিষিদ্ধ কৰাতে ক্ষান্ত নাথাকি ১৪ ফেব্ৰুৱাৰীত কেন্দ্ৰীয় চৰকাৰে ভাৰতস্থিত BBCৰ দুটাকৈ কাৰ্যালয়ত আয়কৰ বিভাগক কৰ ফাঁকিৰ তদন্তৰ বাবে তালাচী চলাবলৈ নিৰ্দেশ দিয়ে। আয়কৰ বিভাগে দিল্লী আৰু মুম্বাইস্থিত BBCৰ দুয়োটা কাৰ্যালয়তে তালাচী চলাই কৰ্মচাৰীসকলৰ মোবাইল ফ’নো জব্দ কৰে।

মঙলবাৰে পুৱা প্ৰায় ১১ বজাৰ পৰা BBCৰ কাৰ্যালয়ত আৰম্ভ হোৱা আয়কৰ বিভাগৰ এই তালাচী ১২ ঘণ্টাৰো অধিক সময় ধৰি চলে। BBCৰ দিল্লী আৰু মুম্বাইৰ কাৰ্যালয়ত আয়কৰ বিভাগে চলোৱা তালাচীৰ বাবে কংগ্ৰেছে বিজেপিক আক্ৰমণৰ লক্ষ্য কৰি লৈছে। একে সময়তে কংগ্ৰেছ নেতা প্ৰাক্তন কেন্দ্ৰীয় মন্ত্ৰী জয়ৰাম ৰমেশে প্ৰধানমন্ত্ৰী মোদীৰ এটা পুৰণি ভিডিঅ’ টুইটাৰত শ্বেয়াৰ কৰিছে কটাক্ষ কৰিছে, যিটো ভিডিঅ’ত প্ৰধানমন্ত্ৰী মোদীয়ে BBC প্ৰশংসাৰে ওপচাই পেলাইছিল।

जाने कहां गए वो दिन pic.twitter.com/ZaF805Z91j

— Jairam Ramesh (@Jairam_Ramesh) February 14, 2023

এই ভিডিঅ’টোত প্ৰধানমন্ত্ৰীয়ে কৈছে, “আমাৰ দেশত যেতিয়া আকাশবাণী, দূৰদৰ্শন, বাতৰি কাকতৰ সীমিত প্ৰচলন আছিল, তেতিয়া সাধাৰণ মানুহে কি কৈছিল? তেওঁলোকে কৈছিল যে আমি BBCত এই কথা শুনিছো। মানে তেওঁ আমাৰ দেশৰ অল ইণ্ডিয়া ৰেডিঅ’ক বিশ্বাস নকৰে, দূৰদৰ্শনক বিশ্বাস কৰা নহয়, বাতৰি কাকতবোৰে ইমান টকা খৰচ কৰিছে, ইয়াকো বিশ্বাস নকৰে। তেওঁলোকে কৈছিল যে আমি বিবিচিত শুনিছো, এইটোৱেই বিশ্বাসযোগ্য। চৰকাৰৰ প্ৰতিষ্ঠানসমূহৰ ওপৰত জনতাই বিশ্বাস হেৰুৱাই পেলোৱাটো এটা ডাঙৰ বিপদ বুলি মই ভাবো।”

খবৰ অনুসৰি BBCৰ বিত্ত বিভাগত একাউণ্টৰ কিছু নথি পৰীক্ষা কৰি থকা হৈছে। গুজৰাটৰ দাঙ্গা আৰু প্ৰধানমন্ত্ৰী নৰেন্দ্ৰ মোডীক লৈ বিবিচিয়ে ‘ইণ্ডিয়া: দ্য মোডী প্ৰশ্ন’ নামৰ তথ্যচিত্ৰ প্ৰকাশ কৰাৰ কেইসপ্তাহমানৰ পিছতে আয়কৰৰ ৰোষত পৰিছে BBC।