পুনবাৰ গো-ৰক্ষকৰ দলে বৰ্বৰতাৰে হাতুৰীৰে আক্ৰমণ কৰি আহত কৰিছে এজন লোকক।
দেশৰ ৰাজধানী দিল্লীৰ গুৰগাঁৱত সংঘটিত হৈছে এই জঘন্য কাণ্ডটো।
ঘটনাৰ বিৱৰণী অনুসৰি শুকুৰবাৰে পুৱা গুৰগাঁৱৰ ঝকঝকৰ চহৰাঞ্চলৰ ৰাজপথতে গো-ৰক্ষকৰ দলে আগুৰি এজন লোকক হাতুৰিৰে সৰ্বশৰীৰতে মৰিয়াই মৰিয়াই আক্ৰমণ কৰে।
গো-ৰক্ষকৰ দলে এখন বাহনত চালকজনে গো-মাংস নিয়াৰ সন্দেহত ৮ কিলোমিটাৰ পথ অনুসৰণ কৰি উক্ত অঞ্চলত বাহনখনৰ পৰা নমাই চালকজনক ৰাজপথতে আক্ৰমণ কৰে।
চালকজনক পথাচাৰীৰ সন্মুখতে পথত পেলাই সৰ্বশৰীৰত হাতুৰীৰে আক্ৰমণ কৰা সমগ্ৰ দৃশ্য ইতিমধ্যে ভাইৰেল হৈ পৰিছে।
ভিডিঅ’টোত দেখা গৈছে যে ৰাজপথত গুৰুলা গুৰুলকৈ হাতুৰীৰে প্ৰহাৰ কৰি থকা দেখিও কোনো লোকে আক্ৰান্ত লোকগৰাকীক উদ্ধাৰ বা সহায় কৰা নাই। আনকি আৰক্ষীৰো উপস্থিতি দেখা গৈছে ভাইৰেল হোৱা ভিডিঅ’টোত।
ইফালে খবৰ অনুসৰি খোদ আৰক্ষীৰ লোক উপস্থিত থাকোঁতেও আক্ৰমণকাৰী গো-ৰক্ষকৰ দলে আহত চালকজনক চিকিৎসালয়ত ভৰ্তি কৰোৱাৰ পৰিৱৰ্তে এখন গাঁওলৈ নি তাতো তেওঁক প্ৰহাৰ কৰা হয়।
গাঁওখনতো চালকজনক পুনৰ আৰক্ষীৰ সন্মুখতে আক্ৰমণ কৰে গো-ৰক্ষকৰ সদস্যই। আৰক্ষীয়ে আক্ৰান্ত চালকজনক উদ্ধাৰ কোনো পদক্ষেপ নোলোৱা বুলি পুনৰ অভিযোগ উঠিছে।
আৰক্ষীৰ সন্মুখতে আক্ৰমণৰ ঘটনা সংঘটিত কৰাৰ পিছতো বৰ্তমানলৈকে আৰক্ষীয়ে আক্ৰমণকাৰী গো-ৰক্ষকৰ সদস্যক গ্ৰেপ্তাৰ কৰিবলৈ সক্ষম হোৱা নাই।
জানিব পৰা মতে মাংস কঢ়িওৱা বাহনখন আৰক্ষীয়ে বাজেয়াপ্ত কৰি মাংসসমূহ চিনাক্তকৰণৰ কাৰণে পৰীক্ষাগাৰলৈ প্ৰেৰণ কৰিছে।
আৰক্ষীৰ মতে উক্ত মাংসখিনি গো-মাংস বুলি প্ৰমাণিত হ’লে ইয়াৰ বিৰুদ্ধে তদন্ত আৰম্ভ কৰিব আৰক্ষীয়ে।
আনহাতে বাহনখনৰ চালকে দাবী কৰিছে যে তেওঁৰ বাহনখত গো-মাংস পৰিবহণ কৰা নাছিল, সেই মাংসখিনি ম’হ মাংসহে আছিল।