কেন্দ্ৰীয় চৰকাৰৰ নতুন নিযুক্তি আঁচনি অগ্নিপথৰ বিৰুদ্ধে দেশজুৰি চলি থকা আন্দোলনৰ মাজতে কৃষক সংঘৰ প্ৰতিপত্তি থকা কেইবাখনো ৰাজ্যৰ খাপ পঞ্চায়তে অগ্নিপথ আঁচনিৰ অধীনত নিযুক্তিৰ বাবে আবেদন কৰিব খোজা যুৱক-যুৱতীসকলক এক কঠোৰ সকীয়নি প্ৰদান কৰিছে।
খাপ পঞ্চায়তৰ মুৰব্বী তথা কৃষক সংঘৰ নেতা সকলে কেন্দ্ৰীয় চৰকাৰৰ অগ্নিপথ আঁচনিৰ অধীনত অগ্নিবীৰ হ’ব খোজা যুৱক-যুৱতীসকলক সামাজিকভাৱে পৃথক কৰা হ’ব বুলি ঘোষণা কৰিছে।
বুধবাৰে হাৰিয়ানাৰ ৰোহতক জিলাৰ চাম্পলা চহৰত খাপ পঞ্চায়তৰ এখন সমূহীয়া বৈঠক অনুষ্ঠিত হয়। এই বৈঠকত হাৰিয়ানা, ৰাজস্থান, হিমাচল প্ৰদেশ আৰু পঞ্জাৱৰ বিভিন্ন খাপৰ প্ৰতিনিধিসকলে অংশগ্ৰহণ কৰিছিল।
খাপ পঞ্চায়তৰ প্ৰতিনিধিসকলৰ লগতে এই ৰাজ্যকেইখনৰ ছাত্ৰ সংগঠনসমূহৰ একাংশ সদস্যয়ো বৈঠকখনত উপস্থিত থাকে।
এই বৈঠকতে অগ্নিপথৰ বিৰুদ্ধে কঠোৰ স্থিতি গ্ৰহণ কৰি খাপ মুৰব্বী তথা কৃষক নেতাসকলে অগ্নিপথৰ অধীনত নিযুক্তিৰ বাবে আবেদন কৰা যুৱক-যুৱতীসকলক সামাজিকভাৱে পৃথক কৰিব বুলি সিদ্ধান্ত গ্ৰহণ কৰে।
‘অগ্নিবীৰ’ৰ আঁচনিৰ জৰিয়তে দেশৰ যুৱ প্ৰজন্মক শ্ৰমিক হিচাপে নিয়োগ কৰাৰ পৰ্ব আৰম্ভ কৰা হৈছে বুলি অভিযোগ কৰি কৃষক সংঘ আৰু খাপ পঞ্চায়তে এই আঁচনিখন বৰ্জন কৰিছে বুলি ঘোষণা কৰে।
সেয়েহে খাপ পঞ্চায়তৰ অন্তৰ্গত কোনো যুৱক-যুৱতীয়ে এই আঁচনিৰ অধীনত নিযুক্তিৰ বাবে আবেদন কৰিলে তেওঁলোককো সামাজিকভাৱে পৃথক কৰা হ’ব বুলি খাপ পঞ্চায়তে স্পষ্ট কৰি দিয়ে
অৱশ্যে যুৱক-যুৱতীসকলক সামাজিকভাৱে পৃথক কৰিলেও বৰ্জন কৰা নহয় বুলিয়ো খাপৰ নেতৃত্বই উল্লেখ কৰে। বৰ্জন আৰু পৃথক কৰাৰ মাজত পাৰ্থক্য আছে বুলি উল্লেখ কৰি খাপৰ নেতা সকলে কয় যে যদিও অগ্নবীৰসকলক বৰ্জন কৰা নহয়, তথাপি খাপ পঞ্চায়তৰ অন্তৰ্গত সম্প্ৰদায় সমূহে এনে লোকসকলৰ পৰা দূৰত্বত অৱস্থান কৰিব।
তদুপৰি অগ্নিপথ আঁচনিক কৃষক আৰু যুৱ বিৰোধী বুলি অভিহিত কৰি অগ্নিপথক সমৰ্থন কৰা কৰ্পোৰেট হাউচ আৰু ৰাজনীতিবিদসকলক সম্পূৰ্ণৰূপে বৰ্জন কৰাৰ আহ্বান জনায় খাপ পঞ্চায়তে।
লগতে অগ্নিপথ আঁচনিৰ বিৰুদ্ধে আন্দোলনৰ সময়ত প্ৰতিবাদকাৰীসকলৰ বিৰুদ্ধে ৰুজু হোৱা গোচৰ তাৎক্ষণিকভাৱে প্ৰত্যাহাৰ কৰিবলৈও সমবেত সকলোৱে দাবী জনায়।
স্মৰ্তব্য যে প্ৰতিৰক্ষা বিভাগত ঠিকাভিত্তিক নিযুক্তিৰ বিৰোধিতা কৰি অগ্নিপথ বাতিলৰ দাবীত সমগ্ৰ দেশতে ৰাজপথত নামি পৰিছে সামৰিক বিভাগত নিযুক্তি প্ৰত্যাশী যুৱক-যুৱতীসকল। যুৱ প্ৰজন্মৰ এই নায্য আন্দোলনৰ প্ৰতি সমৰ্থন আগবঢ়াই আন্দোলন ঘোষণা কৰিছে কৃষক সংগঠন সমূহেও।
ইতিমধ্যে ঐতিহাসিক কৃষক আন্দোলনৰ সফল নেতৃত্ব দিয়া সংযুক্ত কিষাণ মৰ্চাই অগ্নিপথৰ বিৰুদ্ধে দেশব্যাপী প্ৰতিৰোধ গঢ়ি তোলা হ’ব বুলি ঘোষণা কৰিছে।
অৱশ্যে ইয়াৰ পিছতো কেন্দ্ৰীয় চৰকাৰে কোনোপধ্যেই অগ্নিপথ বাতিল নহয় বুলি ঘোষণা কৰিছে আৰু আন্দোলনটো ব্যৰ্থ কৰিবৰ বাবে একাধিক ব্যৱস্থা নতুনকৈ সংযোজন কৰিছে।
কিন্তু চৰকাৰৰ এই সকলো টোপ অস্বীকাৰ কৰি একমাত্ৰ আঁচনি বাতিলৰ দাবীত আন্দোলন অব্যাহত ৰাখিছে সেনাত নিযুক্তি প্ৰত্যাশী যুৱক-যুৱতীসকলে।