অসমৰ ইতিহাসত নজিৰ সৃষ্টিকাৰী গো-মাংসকেন্দ্ৰিক গণ-উন্মাদনাৰ বলি হৈ দেশজুৰি চৰ্চিত হোৱা চৌকত আলীৰ ঘৰলৈ গৈ বুধবাৰে ৰঙালী বিহুৰ শুভেচ্ছা জ্ঞাপন কৰে বিশ্বনাথ জিলাৰ উপায়ুক্ত আৰু আৰক্ষী অধীক্ষকে।
উপায়ুক্ত পৱিত্ৰ ৰাম খাউণ্ড আৰু আৰক্ষী অধীক্ষক ৰাকেশ ৰোচন দক্ষিণ চতিয়াৰ ভোজমাৰী গাওঁস্থিত চৌকত আলীৰ ঘৰত উপস্থিত হৈ স্বাস্থ্যৰ বুজ লোৱাৰ লগতে বিহুৱানৰূপে তেওঁক এখন গামোচাও আগবঢ়ায়।
উপায়ুক্ত খাউণ্ডে ভুক্তভোগী ৭০ বছৰীয়া আলীৰ ঘৰৰ পৰাই বিশ্বনাথ চাৰিআলিৰ মহকুমা চিকিৎসা আৰু স্বাস্থ্য বিষয়াগৰাকীক ফোনত যোগাযোগ কৰি আলীৰ চিকিৎসাৰ উপযুক্ত তদাৰকীৰ বাবেও নিৰ্দেশ দিয়ে।
লগতে পঢ়ক– অসমত গৰু-গাহৰিৰ ৰাজনীতি বন্ধ কৰক, অসমীয়া হৈ থাকিবলৈ দিয়ক: জিতেন দত্ত
আনহাতে ঘটনাটোত জৰিত প্ৰায়সকল “দুৰ্বৃত্ত”কে ইতিমধ্যে আটক কৰা বুলি উল্লেখ কৰি আৰক্ষী অধীক্ষক ৰোচনে আৰক্ষীৰ ফালৰ পৰা আলীক সম্পূৰ্ণ ন্যায় প্ৰদানৰ নিশ্চিতি দিয়ে।
সাক্ষাৎকালত বিশ্বনাথৰ তথ্য আৰু জনসংযোগ বিষয়া প্ৰশান্ত কুমাৰ বৰাও উপস্থিত আছিল।
দেশজুৰি তোলপাৰ লগোৱা ঘটনাটোত জৰিত থকাৰ অভিযোগত অসম আৰক্ষীয়ে ইতিমধ্যে ছজন লোকক গ্ৰেপ্তাৰ কৰিছে।