দেশৰ কোটি কোটি কেন্দ্ৰীয় চৰকাৰৰ কৰ্মচাৰী তথা পেঞ্চনভোগীৰ স্বাৰ্থৰ প্ৰতি লক্ষ্য ৰাখি কেন্দ্ৰীয় চৰকাৰে চৰকাৰী কৰ্মচাৰীসকলৰ ভ্ৰমণ বানচ (TA) ক্লেইম কৰাৰ সময়সীমা বৃদ্ধিৰ সিদ্ধান্ত লৈছে।
কেন্দ্ৰীয় চৰকাৰে এইবাৰ ভ্ৰমণ বানচৰ বাবে দাবী কৰাৰ সময়সীমা ৬০ দিনৰ পৰা ১৮০ দিনলৈ বৃদ্ধি কৰিছে।
চলিত বৰ্ষৰ ১৫ জুনৰ পৰাই এই নিয়ম কাৰ্যকৰী হৈছে। যোৱা ২০১৮ চনৰ মাৰ্চ মাহত কেন্দ্ৰ চৰকাৰে ছুটী লোৱাৰ সন্দৰ্ভত ভ্ৰমণ বানচ দাবীৰ সময়সীমা এবছৰৰ পৰা হ্ৰাস কৰি ৬০ দিন কৰিছিল।
ইয়াৰ পাছতে সময়সীমা বৃদ্ধিৰ বাবে বহু চৰকাৰী কাৰ্যালয়ে চৰকাৰক অনুৰোধ কৰিছিল। অৱশেষত সেয়া চৰকাৰে সিদ্ধান্ত ল’লে।
বিত্ত মন্ত্ৰ্যালয়ে জানিবলৈ দিছে যে এজন অৱসৰপ্ৰাপ্ত কেন্দ্ৰীয় কৰ্মচাৰীয়ে অৱসৰ গ্ৰহণৰ পাছত পৰিয়ালৰ সৈতে এঠাইৰ পৰা আন ঠাইলৈ গৈ পুনৰ প্ৰতিষ্ঠিত হোৱা কঠিন কাম আৰু ইয়াৰ বাবে ক্লেইম জমা দিয়াৰ সময়সীমা অতি কম আছিল। সেয়া এতিয়া ৬০ দিনৰ ঠাইত ১৮০ দিন কৰা হৈছে।
ইয়াৰ ফলত অৱসৰ গ্ৰহণ কৰিবলগীয়া কেন্দ্ৰীয় চৰকাৰৰ কৰ্মচাৰীসকলে তেওঁলোকৰ ভ্ৰমণৰ ৬মাহৰ ভিতৰত ভ্ৰমণ বানচৰ বাবে দাবী জনাব পাৰিব। অৱশ্যে, ফুৰিবলৈ যোৱা, বদলি বা প্ৰশিক্ষণৰ বাবে এই দাবীৰ সময়সীমা ৬০ দিনেই থাকিব।
আনহাতে, মৰগীয়া বানচৰ বাবে কেন্দ্ৰীয় চৰকাৰৰ কৰ্মচাৰীসকলে আৰু কেইদিনমান অপেক্ষা কৰিব লাগিব। অহা ২৬জুনত মৰগীয়া বানচক লৈ নেশ্যনেল কাউন্সিল এফ জে চি এমৰ আৰু ফাইনেন্স মন্ত্ৰ্যালয় তথা পাৰ্ছনেল এণ্ড ট্ৰেইনিং ডিপাৰ্চমেন্টৰ বিষয়াসকলৰ মাজত আলোচনা অনুষ্ঠিত হ’ব।
উক্ত বৈঠকত কেন্দ্ৰীয় চৰকাৰৰ কৰ্মচাৰী তথা কেন্দ্ৰীয় চৰকাৰৰ পেন্সনভোগীসকলৰ সপ্তম দৰমহা আয়োগৰ অনুসৰি বকেয়া মৰগীয়া বানচ আৰু ডিআৰ সম্পৰ্কত আলোচনা হ’ব বুলি জানিব পৰা গৈছে।
বিত্তমন্ত্ৰ্যালয়ৰ সূত্ৰসমূহে প্ৰকাশ কৰা মতে অহা ১ জুলাইৰ পৰা কেন্দ্ৰীয় চৰকাৰে মৰগীয়া বানচ বা DAবৃদ্ধি কৰিব যদিও চৰকাৰী কৰ্মচাৰীসকলে কোনো এৰিয়া নাপাব।