ভাৰতৰ আপত্তি সত্ত্বেও চীনে দেওবাৰে (১২ জানুৱাৰী) শাক্সগাম উপত্যকাৰ ওপৰত নিজৰ দাবী পুনৰবাৰ দাঙি ধৰিছে। লক্ষনীয় যে চীনে শ্বাক্সগামত নিৰ্মাণৰ কাম চলাই আছে। এই ক্ষেত্ৰত ভাৰতে আপত্তি কৰিছিল। এই সন্দৰ্ভত চীনে পুনৰ দেওবাৰে কয় যে অঞ্চলটোত তেওঁলোকৰ আন্তঃগাঁথনি প্ৰকল্পসমূহ ‘একেবাৰে যুক্তিসংগত’।
ইপিনে, চীনৰ কমিউনিষ্ট পাৰ্টিৰ প্ৰতিনিধিয়ে দিল্লীস্থিত বিজেপিৰ মুখ্য কাৰ্যালয়ত বৈঠকত উপস্থিত হোৱাৰ দিনটোতে চীনে এই মন্তব্য প্ৰকাশ কৰে। চীনৰ কমিউনিষ্ট পাৰ্টিৰ দলটোত ভাৰতত থকা চীনৰ ৰাষ্ট্ৰদূত আৰু চীন চৰকাৰৰ এজন ৰাজ্যিক মন্ত্ৰীও আছিল।
ইয়াৰ পূৰ্বে ৯ জানুৱাৰীত ভাৰতে শাক্সগাম উপত্যকাত চীনৰ আন্তঃগাঁথনি প্ৰকল্পক সমালোচনা কৰি কয় যে উপত্যকাটো ভাৰতীয় ভূখণ্ডৰ অন্তৰ্গত আৰু ভাৰতে নিজৰ স্বাৰ্থ ৰক্ষাৰ বাবে প্ৰয়োজনীয় ব্যৱস্থা গ্ৰহণ কৰাৰ অধিকাৰ আছে। অৱশ্যে ভাৰতৰ সেই আপত্তিত চীনৰ গা নলৰিল। উল্লেখ্য যে ১৯৬৩ চনত পাকিস্তানে ভাৰতৰ ভূখণ্ডৰ পৰা ৫১৮০ বৰ্গ কিলোমিটাৰ ভূমি ভাৰতৰ ভূখণ্ডৰ পৰা চীনলৈ অবৈধভাৱে হস্তান্তৰ কৰিছিল।
যোৱা ৯ জানুৱাৰীত বৈদেশিক পৰিক্ৰমা মন্ত্ৰালয়ৰ সাপ্তাহিক সংবাদমেলত মুখপাত্ৰ ৰণধীৰ জয়ছৱালে কৈছিল- ‘শাক্সগাম উপত্যকা ভাৰতীয় ভূখণ্ড। ১৯৬৩ চনত স্বাক্ষৰিত তথাকথিত চীন-পাকিস্তান ‘সীমা চুক্তি’ক আমি কেতিয়াও স্বীকৃতি দিয়া নাই। আমি ধাৰাবাহিকভাৱে এই চুক্তিখন অবৈধ বুলি কৈ আহিছো। তথাকথিত চীন-পাকিস্তান অৰ্থনৈতিক কৰিডৰ (CPEC) ভাৰতীয় ভূখণ্ডৰ মাজেৰে পাৰ হৈ যোৱাৰ বাবে আমি স্বীকৃতি নিদিওঁ। পাকিস্তানে অবৈধ আৰু বলপূৰ্বকভাৱে সেই অঞ্চল দখল কৰিছে। সমগ্ৰ কেন্দ্ৰীয় শাসিত অঞ্চল জম্মু-কাশ্মীৰ আৰু লাডাখ ভাৰতৰ এক অবিচ্ছেদ্য অংগ। পাকিস্তান আৰু চীন কৰ্তৃপক্ষক বহুবাৰ বিষয়টো স্পষ্ট কৰি দিয়া হৈছে।’
প্ৰসংগক্ৰমে ছি জিনপিঙৰ সপোনৰ ‘বেল্ট এণ্ড ৰোড ইনিচিয়েটিভ’ প্ৰকল্পটো কেইবাবছৰ পূৰ্বে আৰম্ভ হৈছিল। ইয়াৰ তলত আছে চীন-পাকিস্তান অৰ্থনৈতিক কৰিডৰ। এই অৰ্থনৈতিক কৰিড’ৰটো চীনৰ পৰা পাকিস্তানৰ বেলুচিস্তান প্ৰদেশৰ গাদাৱাৰ বন্দৰলৈ গিলগিট-বাল্টিস্তান আৰু পাকিস্তান অধিকৃত কাশ্মীৰ হৈ গৈছে।
আনহাতে, কৰিডৰৰ এটা ফাল মধ্য এছিয়ালৈ গৈছে। অৱশ্যে ভাৰতৰ সাৰ্বভৌমত্বক সন্মান নকৰাকৈ চীনে এই প্ৰকল্পত কাম কৰিছে। এই পৰিবেশত ভাৰতে এই প্ৰকল্পৰ আৰম্ভণিৰে পৰা বিৰোধিতা কৰি আহিছে। ২০১৭ চনত যেতিয়া প্ৰথম বেল্ট এণ্ড ৰোড ফ’ৰাম অনুষ্ঠিত হৈছিল তেতিয়া ভাৰতে এই প্ৰকল্পৰ বিৰোধিতা কৰি এক বিবৃতি প্ৰকাশ কৰিছিল।
