আন্তুম নাকভি—যোৱা বছৰ ভাৰতৰ বিৰুদ্ধে টি-২০ শৃংখলাত অভিষেক ঘটালে হয়তো এই নামটো এতিয়ালৈকে বিশ্ব ক্ৰিকেটৰ বাবে চিনাকি হৈ পৰিলহেঁতেন। কিন্তু জিম্বাবুৱেৰ দলত থকাৰ পিছতো নাগৰিকত্বৰ সন্দৰ্ভত জটিলতাৰ বাবে তেতিয়া তেওঁ খেলিব পৰা নাছিল।
সেই জটিলতা বহুদিন আগতে সমাধান হৈছে। জিম্বাবুৱেৰ নাগৰিকত্ব লাভ কৰিছে নাকভিয়ে। আজি বিয়লি আৰম্ভ হ’বলগীয়া আফগানিস্তানৰ বিৰুদ্ধে হাৰাৰে টেষ্টত তেওঁৰ অপেক্ষাৰ অন্ত পৰিব পাৰে। অৱশেষত আন্তঃৰাষ্ট্ৰীয় ক্ৰিকেটত যাত্ৰা আৰম্ভ কৰিব পাৰে ২৬ বছৰীয়া বেটিং অলৰাউণ্ডাৰগৰাকীয়ে।
স্বীকৃতিপ্ৰাপ্ত ক্ৰিকেটত নাকভিৰ শেষৰ তিনিটা ইনিংছ-১৫৮, ৬৮, ১০৮ ৰানৰ। বেটিঙত এনে প্ৰদৰ্শনৰ পিছত জিম্বাবুৱে ক্ৰিকেটৰ নিৰ্বাচকসকলে তেওঁক পুনৰ দলত মাতিবলৈ অস্বীকাৰ কৰিব নোৱাৰিলে। এতিয়া তেওঁৰ বাবে জিম্বাবুৱেৰ টেষ্ট কেপ পিন্ধাটো যেন সময়ৰ কথা।
নাকভিৰ পূৰ্বে ১৩৭ গৰাকী ক্ৰিকেটাৰে জিম্বাবুৱেৰ হৈ টেষ্ট খেলিছে। কিন্তু তেওঁৰ বিষয়ে ইমান আলোচনাৰ কাৰণ তেওঁৰ বহুজাতিক পটভূমি। যদিও নাকভিৰ জন্ম বেলজিয়ামত, পিতৃ পাকিস্তানী আৰু মাতৃ ভাৰতীয় মূলৰ। অৱশ্যে তেওঁ অষ্ট্ৰেলিয়াত ডাঙৰ-দীঘল হৈছে আৰু এতিয়া জিম্বাবুৱেৰ হৈ খেলিব!
নাকভিৰ ককা-আইতাক বহু আগতেই পাকিস্তান এৰি বেলজিয়ামলৈ প্ৰব্ৰজন কৰিছিল। তেওঁৰ পিতৃৰ জন্ম হৈছিল ইউৰোপীয় দেশত। মাকৰ জন্মও বেলজিয়ামত। অৱশ্যে তেওঁৰ মাতৃ ভাৰতীয় মূলৰ। যেতিয়া নাকভিৰ বয়স ৪ বছৰ আছিল, তেতিয়া তেওঁৰ পৰিয়াল বেলজিয়াম এৰি অষ্ট্ৰেলিয়ালৈ গুচি যায়।
নাকভিয়ে ছিডনীৰ দ্য হিলছ স্প’ৰ্টছ হাইস্কুলত অধ্যয়ন কৰিছিল। তাৰ পৰাই তেওঁ ক্ৰিকেট খেলিবলৈ আৰম্ভ কৰে। তেওঁ এজন দক্ষ পাইলটো। তেওঁৰ কমাৰ্চিয়েল এয়াৰলাইন পাইলটৰ অনুজ্ঞাপত্ৰও আছে।
কিন্তু ক্ৰিকেটৰ প্ৰতি নাকভিৰ আকৰ্ষণ ইমানেই বেছি আছিল যে তেওঁ উৰণ এৰি সম্পূৰ্ণৰূপে খেলৰ ওপৰত গুৰুত্ব দিছিল। ঘৰুৱা ক্ৰিকেট খেলিবলৈ তেওঁ অষ্ট্ৰেলিয়াৰ ডাৰউইনলৈ গুচি যায়। সেইখিনিতে তেওঁ জিম্বাবুৱেৰ প্ৰাক্তন ক্ৰিকেটাৰ ছলমন মেয়াৰক লগ পাইছিল। মায়াৰেই নাকভিক জিম্বাবুৱেলৈ গৈ ক্ৰিকেট কেৰিয়াৰ গঢ়িবলৈ উৎসাহিত কৰিছিল। তেওঁৰ পৰামৰ্শ অনুসৰি নাকভি জিম্বাবুৱেলৈ গ’ল। সৰু ভায়েক আৱাদ নাকভিকো লগত লৈ গ’ল।
২০২৩ চনত জিম্বাবুৱেৰ ঘৰুৱা দল মিড ৱেষ্ট ৰাইনোছৰ হৈ প্ৰথম শ্ৰেণীৰ অভিষেক ঘটা নাকভিয়ে প্ৰথমখন মেচতে শতক অৰ্জন কৰাৰ লগতে বলিঙতো ৫টা উইকেট দখল কৰি শিৰোনাম দখল কৰিছিল। পৰৱৰ্তী মেচতো তেওঁ শতক অৰ্জন কৰে।
২০২৪ চনৰ আৰম্ভণিতে তেওঁ জিম্বাবুৱেৰ ক্ৰিকেট জগতত আলোড়নৰ সৃষ্টি কৰিছিল। প্ৰতিযোগিতামূলক ক্ৰিকেটত ত্ৰিশতক অৰ্জন কৰা জিম্বাবুৱেৰ যিকোনো দলৰ পৰা তেওঁ প্ৰথমজন ক্ৰিকেটাৰ হিচাপে পৰিগণিত হৈছিল।
কেইবাবছৰ ধৰি জিম্বাবুৱেৰ ক্ৰিকেটৰ আটাইতকৈ ডাঙৰ তাৰকা হৈছে ছিকন্দৰ ৰাজা। নাকভিয়েও ৰাজাৰ দৰে হোৱাৰ ইচ্ছা প্ৰকাশ কৰিছে। সীমিত অভাৰৰ ঘৰুৱা ক্ৰিকেটতো নাকভিৰ অভিলেখ বেয়া নহয়। তালিকা ‘এ’ৰ ২২খন খেলত ৬টা শতক আৰু ৫টা অৰ্ধশতক অৰ্জন কৰিছে।
যোৱা বছৰ তেওঁ বাংলাদেশৰ মালিকানাধীন ফ্ৰেঞ্চাইজি জোবাৰ্গ বাংলা টাইগাৰ্ছৰ হৈ জিম্বা-আফ্ৰ’ টি-১০ লীগত ৰাজাৰ সতীৰ্থ হিচাপে খেলিছিল; তাত খিতাপো লাভ কৰে।
এইবাৰ তেওঁৰ নেতৃত্বত ৰাইনোছ দেশৰ টি-২০ লীগত অপৰাজিত চেম্পিয়ন হৈ পৰিল। প্ৰতিযোগিতামূলক ক্ৰিকেটত এতিয়ালৈকে তেওঁ ৮৬টা উইকেট দখল কৰিছে। এনে এজন ব্যক্তিক ইমান দিনে জাতীয় দলৰ পৰা আঁতৰাই ৰখাটো যথেষ্ট আচৰিত কথা।
এছিয়া, ইউৰোপ, ওচেনিয়া, আফ্ৰিকা – আন্তুম নাকভি সম্ভৱতঃ চাৰিখন মহাদেশৰ সৈতে সম্পৰ্ক থকা প্ৰথমজন ক্ৰিকেটাৰ।
অৱশ্যে ফুটবলত এনেকুৱা বহুজাতিক খেলুৱৈ আছে। সুপৰিচিতসকলৰ ভিতৰত এই মুহূৰ্তত এটা নাম উল্লেখ কৰিব লাগিব – ৰিয়েল মাদ্রিদৰ চেণ্টাৰবেক ডেভিদ আলাবা।
আলাবাৰ জন্ম অষ্ট্ৰিয়াত, পিতৃ নাইজেৰিয়ান-মাতৃ ফিলিপাইনছ আৰু পূৰ্বপুৰুষ কংগোত থাকে। অৱশ্যে তেওঁ বেছিভাগ সময়তে মেক্সিকান খাদ্য খায়। তেওঁৰ কেৰিয়াৰৰ বেছিভাগ সময় জাৰ্মানীত কটায়। তেওঁ এগৰাকী জাৰ্মান মহিলাৰ সৈতেও বিবাহিত। ৰিয়েল মাদ্রিদত থকা সময়খিনিৰ বাবেই এতিয়া আলাবা স্পেইনত থাকে৷ কিন্তু তেওঁৰ পত্নী আৰু সন্তান ইংলেণ্ডত থাকে। নাকভি-আলাবাতকৈ ‘গ্ল’বেল প্লেয়াৰ’ৰ উত্তম উদাহৰণ কোন হ’ব পাৰে!
