অহা ৬ আগষ্টত অনুষ্ঠিত হ’বলগীয়া দেশৰ উপ-ৰাষ্ট্ৰপতি নিৰ্বাচনৰ বাবে পশ্চিম বংগৰ ৰাজ্যপাল জগদ্বীপ ধনখড়ক প্ৰাৰ্থী হিচাপে প্ৰক্ষেপ কৰিছে শাসনাধিষ্ঠ এন ডি এ- ই। আজি বিজেপিৰ ৰাষ্ট্ৰীয় সভাপতি জে পি নাড্ডাই আনুষ্ঠানিকভাৱে এই ঘোষণা কৰে।
নড্ডাই এখন সংবাদমেলত কয়, “সকলো ধৰণৰ বিবেচনা আৰু পৰামৰ্শৰ পিছত আমি কৃষক সন্তান জগদ্বীপ ধনখড়ক উপ-ৰাষ্ট্ৰপতিৰ নিৰ্বাচনৰ বাবে এন ডি এৰ প্ৰাৰ্থী হিচাপে ঘোষণা কৰাৰ সিদ্ধান্ত লৈছো।”
ধনখড়ক প্ৰশংসা কৰি নড্ডাই ইতিমধ্যে ধনখড়ে নিজকে জনসাধাৰণৰ ৰাজ্যপাল হিচাপে আত্মপ্ৰতিষ্ঠা কৰিছে বুলি মন্তব্য কৰে।
আনহাতে প্ৰধানমন্ত্ৰী মোদীয়ে টুইটযোগে ধনখড়ৰ প্ৰতি সমৰ্থন জনায়। মোদীয়ে টুইটটোত উল্লেখ কৰে যে ধনখড়ৰ সংবিধান সম্পৰ্কে যথেষ্ট জ্ঞান আছে আৰু আইনী বিষয়ৰ প্ৰতিও ভালদৰে জ্ঞাত।
ৰাষ্ট্ৰৰ প্ৰগতিক আগুৱাই নিয়াৰ উদ্দেশ্যে ধনখড়ে উচ্চ সদনৰ কাৰ্যক্ৰমক যথোপযুক্ত নিৰ্দেশনা দিব বুলি মোদীয়ে মন্তব্য কৰে।
উল্লেখ্য যে ধনখড়ে ২০১৯ চনৰ জুলাইত পশ্চিম বংগৰ ৰাজ্যপাল হিচাপে দায়িত্ব গ্ৰহণ কৰিছিল। ইয়াৰ পিছতে পৰা বংগৰ মুখ্যমন্ত্ৰী মমতা বেনাৰ্জী আৰু তৃণমূল কংগ্ৰেছৰ সৈতে বিবাদৰ বাবে প্ৰায়ে বাতৰিৰ শিৰোনাম দখল কৰিছে।
ধনখড়ে ৰাজ্য চৰকাৰৰ বিৰুদ্ধে চৰম তোষণ, সাম্প্ৰদায়িক পৃষ্ঠপোষক আৰু মাফিয়া চিণ্ডিকেটৰ পৰা ধন দাবী কৰা বুলি অভিযোগ কৰি আহিছে। তৃণমূল চৰকাৰে বংগত গণতন্ত্ৰৰ প্ৰতি ভাবুকিৰ সৃষ্টি কৰা বুলিও ধনখড়ে অভিযোগ কৰি আহিছে।
আনহাতে ৰাজ্যখনৰ শাসকীয় তৃণমূল কংগ্ৰেছৰ সদস্যসকলে ধনখড়ক সাম্প্ৰদায়িক বুলি অভিহিত কৰি আহিছে।
স্মৰ্তব্য যে অহা ১০ আগষ্টত ভাৰতৰ বৰ্তমানৰ উপ-ৰাষ্ট্ৰপতি এম ভেংকায়া নাইডুৰ কাৰ্যকাল সমাপ্ত হ’ব। দেশৰ পৰৱৰ্তী উপ-ৰাষ্ট্ৰপতি পদৰ বাবে অহা ৬ আগষ্টত নিৰ্বাচন অনুষ্ঠিত হ’ব।
নিৰ্বাচন আয়োগে কৰা ঘোষণা অনুসৰি একেদিনাই নিৰ্বাচনৰ ভোটগণনাও অনুষ্ঠিত হ’ব।
