আজি দিচপুৰ প্ৰেছ ক্লাবত এখন সংবাদমেল সম্বোধন কৰি বাঙালী যৌথ সমন্বয় সমিতিৰ সভাপতি তথা ন-বিজেপি নেতা সুকুমাৰ বিশ্বাসে কৃষক মুক্তি সংগ্ৰাম সমিতিৰ উপদেষ্টা অখিল গগৈক তীব্ৰ সমালোচনা কৰে আৰু কেইবাটাও প্ৰত্যাহ্বান জনায়।
বিশ্বাসে সংবাদমেলত দাবী কৰে যে অখিল গগৈয়ে নাগৰিকত্ব সংশোধনী বিধেয়কখন গৃহীত হ’লে বাংলাদেশৰ পৰা নতুনকৈ ১ কোটি ৭০ লাখ হিন্দু বাংলাদেশী আহিব বুলি কৈ আছে।
কেবৰ বিৰুদ্ধে এক সবল স্থিতি গ্ৰহণ কৰি অহা গগৈক প্ৰত্যাহ্বান জনাই বিশ্বাসে কয়, “অখিল গগৈয়ে তথ্য সহকাৰে যদি ১ কোটি ৭০ লাখ মানুহ বাংলাদেশৰ পৰা নতুনকৈ আহিব বুলি প্ৰমাণ দিব পাৰে, তেন্তে তেওঁক অসমৰ মুখ্য মন্ত্ৰী পাতি দিম। আমি অখিল গগৈক ভোট দিম।”
তথ্যৰ অবিহনেই এইবোৰ কথা কৈ অসমখন অশান্ত কৰি ৰখাৰ যি চক্ৰান্ত সেয়া অসমৰ ৰাইজে কেতিয়াও মানি নলয় বুলি দাবী কৰি “এই কাৰণেই অখিল গগৈৰ পজিশ্যন তললৈ গৈ আছে” বুলি মন্তব্য বিশ্বাসৰ।
ইপিনে, অখিল গগৈয়ে “কেব”খন গৃহীত হ’লে অসমীয়া ভাষা-সংস্কৃতি বিনষ্ট হ’ব বুলি কৰা মন্তব্যৰো বিৰোধিতা কৰে বিশ্বাসে।
“১৯৪৮-তো বাঙালীসকল আহিছে, ’৭১ৰ আগতো আহিছে। তেওঁলোকে অসমীয়া ভাষা-সংস্কৃতিক কিবা অনিষ্ট কৰিছে নেকি? অসমীয়া ভাষা-সংস্কৃতি গ্ৰহণ কৰি তেওঁলোকে অসমক উজ্জীৱিতহে কৰিছে। বাঙালীসকলৰ যদি সেই মানসিকতা থাকিলহেঁতেন যে আমি গৈ আমাৰ ভাষাৰ প্ৰভাৱ খটুৱাম, স্থানীয় ভাষাৰ প্ৰতি ভাবুকি কঢ়িয়াই আনিম, তেনেহ’লে ’৪৭-ৰ পৰা ’৭১লৈকে অহা ৪০ লাখ লোকে কিয় ভাষা লৈ আন্দোলন কৰা নাই? আমি কিবা ভাষা লৈ আন্দোলন কৰিছো নেকি?”, বিশ্বাসৰ মন্তব্য।
বিশ্বাসে বিতৰ্কিত বিধেয়কখন আনিবলৈ লোৱা কেন্দ্ৰীয় চৰকাৰৰ সিদ্ধান্তক আদৰণি জনায় আৰু বিৰোধীক ইয়াৰ অচিলাত অপ্ৰীতিকৰ পৰিস্থিতি সৃষ্টি নকৰিবলৈ সকীয়াই দিয়ে।
তেওঁ কয়, “লোকসভা অধিৱেশনত “কেব”খন পাছ হোৱাৰ সময়ত বিৰোধীয়ে যাতে কোনোপধ্যে ৰাজ্যত সাম্প্ৰদায়িক সংঘৰ্ষৰ সৃষ্টি কৰিব নোৱাৰে তাৰ বাবে সকলো সজাগ থাকিব লাগে। “কেব”খন ন্যায়সংগত বিধি। ৰাজনৈতিক পাকচক্ৰত পৰি ভাৰত দ্বি-খণ্ডিত হোৱাৰ সময় ভুক্তভোগী হৈ সাধাৰণ লোকসকল আহিছে। তেওঁলোক তাৰ বাবে দায়ী নহয়।”
““কেব”ৰ জৰিয়তে ভুক্তভোগীসকলে ৭২ বছৰৰ পাছত ন্যায় পাবলৈ ওলাইছে। ইয়াক স্বাগতম জনাইছো। “কেব”ৰ জৰিয়তে ১৯৭১ চনৰ পূৰ্বে যিসকল ভাৰত বা অসমত প্ৰৱেশ কৰিছে সেইসকলে নাগৰিকত্ব পাব, তেওঁলোকৰ এইটো ন্যায্য অধিকাৰ। ভাৰত তেওঁলোকৰ উৎপত্তিস্থল, গতিকে তেওঁলোকে ভাৰতীয় নাগৰিকত্ব লাভ কৰিব”, সংবাদমেলত বিশ্বাসে কয়।
বিশ্বাসে এই মন্তব্য কৰাৰ পাছতে আমাৰ সাংবাদিকে ’৭১ৰ পাছত অসমলৈ অহা হিন্দু বাঙালীৰ সংখ্যা কিমান বুলি সোধাত তেওঁ সুৰ সলাই ’৭১ৰ পাছত এজনো হিন্দু বাঙালী অসমলৈ অহা নাই বুলি কয়।
“’৭১-ৰ পাছত এজনো মানুহ আমি বিচাৰি পোৱা নাই। এজনো বাঙালী হিন্দু লোকে ’৭১-ৰ পাছত অসমত প্ৰৱেশ কৰা নাই। তথাপি কাল্পনিক সংখ্যা লৈ কিছু সংখ্যকে সাম্প্ৰদায়িক সংঘৰ্ষ লগোৱাৰ চেষ্টা কৰি আছে”, সাংবাদিকৰ প্ৰশ্নৰ উত্তৰত বিশ্বাসে কয়।
