দিনৰ পোহৰতে ব্যস্ত পথত বাছখন চলাই আহিছিল চালকজনে। হঠাৎ পিছলৈ ঘূৰি চালে, যেন কাৰোবাক মাতিব বিচাৰিছে। কিন্তু তাৰ আগতেই তেওঁৰ মৃগীত (চিজাৰ)আক্ৰান্ত হ’বলৈ ধৰিলে। তেওঁৰ হাতখন ষ্টিয়াৰিঙৰ পৰা পিছলি গ’ল, আৰু বাছখনে নিয়ন্ত্ৰণ হেৰুৱাই আগবাঢ়ি গৈ থাকিল, সন্মুখৰ গাড়ীবোৰত খুন্দা মাৰিলে।
কিছুসময়ৰ পাছত হেণ্ডিমেনে কোনোমতে বাছখন ৰখাই দিয়ে। কিন্তু তেতিয়ালৈকে বেংগালুৰুৰ ৰাজপথত এক বৃহৎ দুৰ্ঘটনা সংঘটিত হৈ গৈছিল। আহত হয় কেইবাজনো লোক। এই ঘটনাৰ ভিডিঅ’ ছচিয়েল মিডিয়াত ভাইৰেল হৈ পৰিছে।
জানিব পৰা মতে, বাছখন কেম্পেগৌড়া আন্তঃৰাষ্ট্ৰীয় বিমানবন্দৰৰ পৰা বানশংকৰী অভিমুখে গৈ আছিল। চিন্নাস্বামী ষ্টেডিয়ামৰ সমীপৰ পথত নিয়ন্ত্ৰণ হেৰুৱায় বাছখনে। ফলত ৩খন অটো-ৰিক্সা, ৩খন গাড়ী আৰু কেইখনমান বাইকত খুন্দা মাৰে।
জানিব পৰা মতে, বাইকসমূহৰ চালককে ধৰি অটোৰ একাংশ যাত্ৰীও আহত হয়। বাছখনৰ সন্মুখৰ অংশ ক্ষতিগ্ৰস্ত হয়। অটোখন বিধ্বস্ত হৈ পৰে। স্কুটি আৰু গাড়ীবোৰো ক্ষতিগ্ৰস্ত হয়।
প্ৰত্যক্ষদৰ্শীয়ে কয় যে ট্ৰেফিক চিগনেলত অধিক যান-জঁট হ’লে দুৰ্ঘটনাটো আৰু ভয়াৱহ হৈ পৰিলেহেঁতেন।
খবৰ লাভ কৰি ঘটনাস্থলীত উপস্থিত হয় আৰক্ষী। তেওঁলোকে কয় যে চিজাৰৰ সময়ত চালকজনে ভুলবশতঃ এক্সিলেটৰটো টিপিছিল, যাৰ বাবে বাছৰ গতি বৃদ্ধি পাইছিল আৰু দ্ৰুতগতি লৈছিল। দুৰ্ঘটনা সংঘটিত হোৱাৰ সময়ত বাছখনত প্ৰায় ১৫ জন যাত্ৰী আছিল।
আহতসকলক চিকিৎসালয়ত ভৰ্তি কৰোৱা হৈছে যদিও কোনো লোক গুৰুতৰভাৱে আহত হৈছে নে নাই সেয়া এতিয়াও নিশ্চিত হোৱা নাই। ঘটনা সন্দৰ্ভত তদন্ত অব্যাহত আছে। স্থানীয় লোকৰ সময়মতে উপস্থিতি আৰু ক্ষীপ্ৰ উদ্ধাৰ অভিযানৰ বাবে বৃহৎ বিপৰ্যয় ৰোধ কৰিব পৰা গ’ল বুলি আৰক্ষীয়ে জানিবলৈ দিয়ে।
