ভাকুটকুট-চিনেমাখনৰ নামটোৱেই সূচায় ইয়াত হাস্যমধুৰ উপাদান থাকিব বুলি। হয়,বৰ্তমান অসমৰ ভিন্ন ছবিগৃহত চলি থকা এখন নতুন অসমীয়া ছবি ভাকুটকুট। ভাকুটকুটৰ কাহিনী আৰু চিত্ৰনাট্য লিখিছে চিন্ময় শৰ্মাই। পৰিচালনাও কৰিছে চিন্ময় শৰ্মায়েই। ছাই ক্ৰিয়েটিভ ফিল্মছ আৰু গ্ৰীণ গ্ৰাছ ফিল্মছৰ নিবেদন ভাকুটকুটে মুক্তি লাভ কৰে গত ৬ মাৰ্চ ২০২৬ তাৰিখে।
ছবিৰ আৰম্ভণি হয় এটি বাংগালুৰুত থকা পৰিয়াল তেজপুৰলৈ অহাৰ দৃশ্যৰে। বাংগালুৰুত থকা অৱসৰপ্ৰাপ্ত সেনা বিষয়া(মৃদুল চুতীয়া)ৰ তেজপুৰত থকা বায়েকৰ ঘৰলৈ পত্নী আৰু দুগৰাকী কন্যা সহ আহে কিছুদিন থকাকৈ। মৃদুল চুতীয়াৰ বায়েক প্ৰতিভা চৌধুৰীৰ বিৰাট হাবিয়াস নিজ পুত্ৰ ইন্দুকল্প(ইন্দু-কৌশিক নাথ)ৰ যেনেকৈ নহওক বিয়াখন পাতি দিয়াৰ। ইন্দুৰ বিয়া পাতিবলৈ ভায়েকক বায়েকে টাউনৰ মাটি এটুকুৰাৰ প্ৰসংগ আনি কিছু দ্বায়িত্ব দিয়ে। এতিয়া ভায়েক-ভাইবোৱাৰীয়েক মিলি কি ব্যৱস্থা হাতত লয় তাকে লৈয়েই কাহিনীভাগ আগবাঢ়ে। গাওঁখনৰ ডেকা কেইজনমানৰ এটা আড্ডা বহে। তাৰে মাজত ধীৰাজ(মনোজ বৰকটকী)এজন। ধীৰাজৰ আকৌ দীৰ্ঘদিনীয়া প্ৰেম ৰতন(দ্বীপজ্যোতি কাকতি)ৰ জীয়েক ৰাধিকাৰ লগত। গাঁৱত ইন্দুৰ ছোৱালী বিচাৰি সবাৰে আলোচনা বিলোচনা চলে। ইন্দু কিছু পৰিমাণে মানসিকভাৱে বাধাগ্ৰস্ত। তালৈ ছোৱালী দিব কোনে!!তাৰমাজত প্ৰেম,সম্পৰ্কৰ মাজৰ তিক্ততা,চল-কপট আদি সকলোবোৰৰ মাজেদি কাহিনী আগুৱাই। মুঠতে ইন্দুৰ বিয়া হ’ব কাৰ লগত তাক লৈয়েই সকলো ঘটনা-পৰিঘটনা। ছবিখনৰ আৰম্ভণি ভাল লগা,এক সজীৱ অনুভৱ দিয়ে। কাহিনীভাগ আৰম্ভণিৰ পৰায়েই গতিশীল। হাস্যৰসৰ উপস্থাপন আছে ভাকুটকুটত। আৰু এইয়া স্বতঃস্ফূৰ্ত হাস্যৰস,জোৰকৈ হঁহোৱাবৰ চেষ্টা কৰা হোৱা নাই। ছবিখনৰ চিনেমে’টগ্ৰাফীৰ কাম সুন্দৰ। লগতে চকুত লগাকৈ সুন্দৰ আলোকশিল্পৰ কাম। ধীৰাজ আৰু ৰাধিকাৰ প্ৰেম কাহিনীটো ভাল লগা হোৱাৰ লগতে পৰ্দাত দুয়োৰে ৰসায়ন সুন্দৰ। আৱহ-সংগীত পৰিস্থিতি সাপেক্ষ বা একেমুখে খাপ খাই পৰা বিধৰ বুলিব লাগিব। ভাকুটকুটত মানসিক স্বাস্থ্যৰ দৰে সংবেদনশীল বিষয় এটাক খুবেই স্পৰ্শকাতৰতাৰে উপস্থাপন কৰা হৈছে পৰিচলকে। অনৰ্থক হাস্যৰসৰ ব্যৱহাৰ কৰি ইয়াক তুলুঙা বা অতিৰঞ্জিত কৰা হোৱা নাই। বহু বিষয়েই চুই গৈছে কাহিনীকাৰ,পৰিচালকে। ভ্ৰাম্যমাণ থিয়েটাৰৰ শিল্পীৰ সমস্যাৰ পৰা আৰম্ভ কৰি,পৰিয়ালৰ আত্মীয়ই যে আত্মীয়ক ঠগ-প্ৰবঞ্চনা কৰিব পাৰে,আত্মীয় বা পিতৃয়েই যে কন্যাক বোজা বুলি ভাবিব পাৰে-পইচাৰ বাবে কিমানলৈকে মানুহ যাব পাৰে-এই সকলো তিক্ত সঁচা ছবিখনত ডাঙি ধৰা হৈছে। মাথোঁ ছবিখনৰ তৰংগ শীৰ্ষ(ক্লাইমেক্স)অলপ সালসলনি ঘটাব পাৰিলেহেঁতেন পৰিচালক,কাহিনীকাৰে। অন্তলৈ অলপ লৰালৰিকৈ সামৰা যেন অনুভৱ হ’ল।
অভিনয়ৰ ক্ষেত্ৰত প্ৰথমেই নাম ল’ব লাগিব ইন্দুৰ ভূমিকাত অভিনয় কৰা কৌশিক নাথৰ অনবদ্য অভিনয়ৰ কথা। ধীৰাজৰ চৰিত্ৰত অভিনয় কৰা মনোজ বৰকটকীয়ে চৰিত্ৰটোৰ সম্পূৰ্ণ সদব্যৱহাৰ কৰিছে। তেওঁৰ অভিনয় স্বাভাৱিক। লগতেই মৃদুল চুতীয়া,দ্বীপজ্যোতি কাকতি,ডৰথী ভৰদ্বাজৰ আৰু বাকীসকলৰো অভিনয় সুন্দৰ। ভাকুটকুট চাবলৈ পৰিয়ালৰ সকলোৱেই লগ লাগি যাব পাৰিব,চাই মুঠেও নিৰাশ নহয়।
mail- [email protected]
