শনিবাৰে জম্মু-কাশ্মীৰৰ আৱন্তিপুৰৰ পৰা পুনৰ আৰম্ভ হয় কংগ্ৰেছ দলৰ ভাৰত জোডো যাত্ৰা। ৰাহুল গান্ধীৰ সৈতে এই যাত্ৰাত যোগদান কৰে পিডিপিৰ মুৰব্বী মেহবুবা মুফতিয়ে। আনহাতে, কংগ্ৰেছৰ সভাপতি মল্লিকাৰ্জুন খাৰ্গে কেন্দ্ৰীয় গৃহমন্ত্ৰী অমিত শ্বাহলৈ পত্ৰ লিখি জম্মু-কাশ্মীৰত ভাৰত জোডো যাত্ৰাৰ বাবে পৰ্যাপ্ত নিৰাপত্তা নিশ্চিত কৰাৰ আহ্বান জনাইছে।
উল্লেখ্য, শুকুৰবাৰে ৰাহুল গান্ধীৰ নিৰাপত্তাত ত্ৰুটি হোৱাৰ পিছত কিছু সময়ৰ বাবে যাত্ৰা স্থগিত ৰখা হৈছিল। ৰাহুল গান্ধীৰ নিৰাপত্তাৰ ত্ৰুটিৰ পিছত আৰক্ষীয়ে তেওঁক গাড়ীত লৈ যাবলগীয়াৰ পৰিস্থিতিৰ সৃষ্টি হয়।
ইয়াৰ পিছত কংগ্ৰেছৰ সভাপতি খৰ্গেই কেন্দ্ৰীয় গৃহমন্ত্ৰী অমিত শ্বাহলৈ এখন পত্ৰ লিখি যাত্ৰাকালত ৰাহুল গান্ধীৰ যাৱতীয় নিৰাপত্তা প্ৰদানৰ দাবী জনায়। কংগ্ৰেছে অভিযোগ কৰে যে কাজিগুণ্ডত হোৱা পদযাত্ৰাৰ সময়ত জম্মু-কাশ্মীৰ আৰক্ষীয়ে জনসমাগমৰ প্ৰতি লক্ষ্য ৰাখি ৰাহুল গান্ধীৰ আশে-পাশে নিৰাপত্তা প্ৰত্যাহাৰ কৰিছিল।
এই সংক্ৰান্ততে কংগ্ৰেছৰ সভাপতি মল্লিকাৰ্জুন খাৰ্গে গৃহমন্ত্ৰীলৈ প্ৰেৰণ কৰা পত্ৰত লিখিছে, “‘অহা ২ দিনত যাত্ৰাত বিপুল জনসমাগম হোৱাৰ সম্ভাৱনা আছে। ৩০ জানুৱাৰীত শ্ৰীনগৰত অনুষ্ঠিত হ’বলগীয়া এই অনুষ্ঠানতো ভিৰ হ’ব পাৰে। যদি আপুনি ব্যক্তিগতভাৱে হস্তক্ষেপ কৰি কৰ্তৃপক্ষক পৰ্যাপ্ত নিৰাপত্তা প্ৰদানৰ পৰামৰ্শ দিয়ে তেন্তে মই কৃতজ্ঞ হ’ম।”
