অসম প্ৰদেশ কংগ্ৰেছ কমিটিৰ প্ৰাক্তন সভাপতি ভূপেন বৰাই সোমবাৰে আনুষ্ঠানিকভাৱে ভাৰতীয় জাতীয় কংগ্ৰেছৰ পৰা পদত্যাগ কৰাৰ কথা ঘোষণা কৰে। পদত্যাগৰ প্ৰকৃত কাৰণ সন্দৰ্ভত তেওঁ বৰ্তমান মৌনতা অৱলম্বন কৰিছে যদিও এই পদক্ষেপে ৰাজ্যৰ ৰাজনৈতিক মহলত জোকাৰণি সৃষ্টি কৰিছে।
সংবাদ মাধ্যমৰ আগত বৰাই কয়, “মই কিয় দলৰ পৰা পদত্যাগ কৰিলোঁ, সেই কথা এই মুহূৰ্তত প্ৰকাশ নকৰোঁ। মই মোৰ পদত্যাগ পত্ৰ দলীয় হাই কমাণ্ডলৈ প্ৰেৰণ কৰিছোঁ। বৰ্তমান মোৰ চৰকাৰী আৱাসত কেইবাগৰাকীও জ্যেষ্ঠ কংগ্ৰেছ নেতা উপস্থিত আছে। উপযুক্ত সময়ত মই সকলো কথা ৰাজহুৱা কৰিম।”
পদত্যাগৰ খবৰ বিয়পি পৰাৰ লগে লগেই বিভিন্ন বিৰোধী ৰাজনৈতিক দলে বৰাক আদৰণি জনাইছে। ৰাইজৰ দলৰ সভাপতি অখিল গগৈয়ে ৰাজহুৱাকৈ বৰাক আদৰণি জনাই কয় যে তেওঁলোকৰ দলৰ দুৱাৰ বৰাৰ বাবে সদায় খোলা আছে। একেদৰে অসম জাতীয় পৰিষদৰ সভাপতি লুৰীণজ্যোতি গগৈয়েও বৰাৰ সৈতে ব্যক্তিগতভাৱে যোগাযোগ কৰি তেওঁৰ দলত যোগদান কৰিবলৈ আমন্ত্ৰণ জনাইছে। ইপিনে, বৰাৰ পৰৱৰ্তী পদক্ষেপক লৈ চৰ্চা চলি থকাৰ মাজতে তেওঁ উল্লেখ কৰে যে মুখ্যমন্ত্ৰীয় বৰ্তমানলৈকে তেওঁৰ সৈতে কোনো যোগাযোগ কৰা নাই।
ভূপেন কুমাৰ বৰাই কোনো পোনপটীয়া অভিযোগ উত্থাপন কৰা নাই যদিও তেওঁৰ ইংগিত অনুসৰি, বিৰোধী মিত্ৰজোঁটৰ বুজাবুজিৰ প্ৰক্ৰিয়াক কেন্দ্ৰ কৰি সৃষ্টি হোৱা আভ্যন্তৰীণ সংঘাতৰ বাবেই তেওঁ এই সিদ্ধান্ত ল’বলৈ বাধ্য হৈছে। বিশেষকৈ মিত্ৰজোঁটৰ আলোচনা প্ৰক্ৰিয়াত সাংসদ ৰকিবুল হুছেইনৰ অন্তৰ্ভুক্তিয়ে দলৰ ৰাজ্যিক গোটত সংঘাতৰ সৃষ্টি কৰা বুলি চৰ্চা চলিছে। বৰাই এই সন্দৰ্ভত কোনো স্পষ্টীকৰণ দিয়া নাই যদিও তেওঁৰ নীৰৱতাই ৰাজনৈতিক মহলত ৰহস্য ঘনীভূত কৰি তুলিছে।
২০২১ চনৰ পৰা ২০২৪ চনলৈ এপিচিচি (APCC)ৰ সভাপতি হিচাপে কাৰ্যনিৰ্বাহ কৰা বৰা কংগ্ৰেছৰ এগৰাকী অন্যতম শক্তিশালী নেতা আছিল। ২০০৬ চনৰ পৰা ২০১৬ চনলৈ দুবাৰকৈ বিহপুৰীয়া সমষ্টিৰ বিধায়ক হিচাপে কাৰ্যনিৰ্বাহ কৰা বৰাই দলৰ পুনৰুজ্জীৱিতকৰণত গুৰুত্বপূৰ্ণ ভূমিকা পালন কৰিছিল।
বৰাৰ পদত্যাগৰ সমান্তৰালভাৱে পশ্চিম গোৱালপাৰাৰ বিধায়ক আব্দুৰ ৰছিদ মণ্ডলৰো ৰাইজৰ দলত যোগদান নিশ্চিত হৈছে। মণ্ডলে তেওঁৰ পদত্যাগৰ বাবে ৰকিবুল হুছেইনক জগৰীয়া কৰা ঘটনাই কংগ্ৰেছৰ ভিতৰচ’ৰাৰ অৰাজকতাক উদঙাই দিছে।
আনহাতে, অখিল গগৈয়ে বৰা বিজেপিত যোগদান কৰাৰ সম্ভাৱনা নাকচ কৰি কয়, “ভূপেন বৰাই কংগ্ৰেছ ত্যাগ কৰিছে সেয়া সঁচা, কিন্তু তেওঁ বিজেপিত যোগদান নকৰে। তেওঁ বিৰোধী ঐক্যৰ এজন ডাঙৰ নেতা। কেইবাগৰাকীও জ্যেষ্ঠ নেতাই তেওঁক কংগ্ৰেছত থাকিবলৈ পতিয়ন নিয়াবলৈ চেষ্টা কৰি আছে।”
