মঙলবাৰে ন্যায়াধীশ ভূষণ ৰামকৃষ্ণ গাভাইক ভাৰতৰ ৫২ সংখ্যক মুখ্য ন্যায়াধীশ হিচাপে নিযুক্তি দিয়া হয় । ১৪ মে’ত তেওঁ বৰ্তমানৰ মুখ্য ন্যায়াধীশ সঞ্জীৱ খান্নাৰ উত্তৰাধিকাৰী হিচাপে শপত গ্ৰহণ কৰিব তেওঁ ৷
ৰাষ্ট্ৰপতি দ্ৰৌপদী মুৰ্মুৰ সমুখত শপত বাক্য গ্ৰহণ কৰিব গাভাইয়ে। ভূষণ ৰামকৃষ্ণ গাভাইৰ জন্ম হৈছিল ১৯৬০ চনৰ ২৪ নৱেম্বৰত আমৰাৱতীত। ১৯৮৫ চনৰ ১৬ মাৰ্চত তেওঁ বাৰ এছোচিয়েশ্যনত যোগদান কৰে। ২০০৫ চনৰ ১২ নৱেম্বৰত ন্যায়াধীশ বি আৰ গাভা উচ্চ ন্যায়ালয়ৰ স্থায়ী ন্যায়াধীশ হয়। তেতিয়াৰ পৰাই তেওঁ উচ্চতম ন্যায়ালয়ৰ কেইবাখনো সংবিধান বিচাৰপীঠৰ অংশ হৈ আছে।
পূৰ্বতে জম্মু-কাশ্মীৰ ৰাজ্যক বিশেষ মৰ্যাদা প্ৰদান কৰা ৩৭০ অনুচ্ছেদ বাতিলৰ গোচৰৰ পাঁচজনীয়া বিচাৰপীঠৰ সদস্য আছিল তেওঁ।
ৰাজনৈতিক পুঁজিৰ বাবে ব্যৱহাৰ কৰা নিৰ্বাচনী বণ্ড আঁচনিখন বাতিল কৰা ন্যায়াধীশৰ বিচাৰপীঠতো ন্যায়াধীশ গাভাইয়ে গুৰুত্বপূৰ্ণ ভূমিকা পালন কৰিছিল। তেওঁ সেই বিচাৰপীঠৰো সদস্য আছিল যিয়ে ২০১৬ চনৰ ১০০০ আৰু ৫০০ টকীয়া মুদ্ৰাৰ নোটৰ বিমুদ্ৰাকৰণক সমৰ্থন কৰিছিল।
