সামৰণি পৰিল লিডু শাখা সাহিত্য সভাৰ দ্বি-বাৰ্ষিক অধিৱেশন

লিডু শাখা সাহিত্য সভাৰ দ্বি-বাৰ্ষিক অধিৱেশন আৰু কলাগুৰু বিষ্ণু ৰাভা দিৱস তিনিদিনীয়া কাৰ্যসূচীৰে মনবাহাদুৰ গুৰুং সমন্বয় ক্ষেত্ৰ (লিডু ৰেলৱে ৰঙ্গমঞ্চ)ত দেওবাৰে সফলতাৰে সামৰণি পৰে।

প্ৰথমদিনা কাৰ্যসূচী অনুসৰি পুৱা অসম সাহিত্য সভাৰ সাংগঠনিক সম্পাদক সুনীল গুৰুঙৰ উপস্থিতিত শিক্ষাবিদ সোমেশ্বৰ নেওগে সমন্বয় ক্ষেত্ৰ উদ্বোধন কৰাৰ পিছতে শাখাটোৰ ৫২ বছৰ সম্পন্ন হোৱা উপলক্ষে সমসংখ্যক পতাকা উত্তোলনৰে কাৰ্যসূচীৰ শুভাৰম্ভ কৰা হয়।

তাৰপাছতে ৰাভা সংগীত, জ্যোতি সংগীত, ৰবীন্দ্ৰ সংগীত সৃষ্টিমূলক নৃত্য  বিষ্ণু ৰাভাৰ কবিতা আবৃতি প্ৰতিযোগিতা অনুষ্ঠিত হয়। বিয়লি ৪ বজাত লিডু হিন্দু মিলন মন্দিৰ প্ৰেক্ষাগৃহত অনুষ্ঠিত শাখাৰ সাধাৰণ  সভাত বিভিন্ন বিষয়ৰ ওপৰত আলোচনা হোৱাৰ লগতে এখন ১১ জনীয়া কাৰ্যনিৰ্বাহক সমিতি গঠন কৰা হয়। সন্ধিয়া ৮ বজাত নৱল কিশোৰ বুঢ়াগোঁহাই সত্যেন বৰাৰ পৰিচালনাত পাটকাই নাট্য গোষ্ঠীয়ে নিবেদন কৰে ৰূপকোঁৱৰ  জ্যোতি প্ৰসাদ আগৰৱালাৰ নাট ৰূপালীম।

পিছদিনা দিনৰ ১১ বজাত নৱীন লেখক-লেখিকা আৰু শিল্পীৰ অন্তৰঙ্গ অনুষ্ঠান ৰামধেনু অনুষ্ঠিত হয়। যুৱ সাহিত্যিক ৰাজীৱ নিংখীয়ে উদ্বোধন কৰা অনুষ্ঠানটোত দিহানাম, সত্ৰীয়া নৃত্য, বিহু আদি বিভিন্ন অনুষ্ঠান পৰিবেশিত হয়। তাৰপাছতে মহিলা লেখিকা আৰু শিল্পীৰ অন্তৰঙ্গ অনুষ্ঠান আকাশ অনুষ্ঠিত হয়৷

অন্তিম দিনা দিনৰ ১১ বজাত লিডু শাখা সাহিত্য সভাৰ নৱ নিৰ্বাচিত সভানেত্ৰী দিপালী বৰপূজাৰী সিনহাক সু-সজ্জিত বাহনত উঠাই অনুষ্ঠানস্থলীৰ পৰা একুৰি সাংস্কৃতিক দলৰ অংশগ্ৰহণেৰে ৰাষ্ট্ৰীয় ঘাই পথেদি এক বাৰেৰহনীয়া সাংস্কৃতিক শোভাযাত্ৰা উলিওৱা হয়।

আনহাতে  সাধাৰণ সম্পাদক ৰাণাজ্যোতি নেওগে উদ্দেশ্য ব্যাখ্যাত শাখাৰ এটা আটকধুনীয়া ভৱন নিৰ্মাণৰ প্ৰস্তুতি চলাই থকাৰ কথা ব্যক্ত কৰাৰ লগতে স্থানীয় বিধায়ক ভাস্কৰ শৰ্মাই  প্ৰধানমন্ত্ৰী খনিজ খাদান যোজনা আচঁনিৰ জৰিয়তে ২৫ লক্ষ টকা আৱন্তন দিয়াৰ প্ৰতিশ্ৰুতি দিয়া বুলি ৰাইজক জানিবলৈ দিয়ে।

সভাত মুখ্য অতিথি ৰূপে অংশগ্ৰহণ কৰি অসম সাহিত্য সভাৰ সভাপতি পৰমানন্দ ৰাজবংশীয়ে অসমৰ জাতীয় জীৱনলৈ অসম সাহিত্য সভাই আগবঢ়াই অহা অৱদানৰ কথা ব্যক্ত কৰে৷ সভাখনত তিনিচুকীয়া জিলা সাহিত্য সভাৰ সভাপতি গিৰীশ সন্দিকৈ, তিনিচুকীয়া জিলা কবি সন্মিলনৰ সভাপতি ৰঞ্জিত দত্ত, তিনিচুকীয়া জিলা সাংবাদিক সন্থাৰ সভাপতি খৃষি দাসে অংশগ্ৰহণ কৰি বক্তব্য ডাঙি ধৰে।

উক্ত সভাতে গীতা দেৱী নেওগ আৰু অমৰজ্যোতি ফুকনৰ সম্পাদনাত প্ৰকাশিত শাখাৰ পত্ৰিকা নৱ নিবাৰ্চিত সভানেত্ৰী বৰপূজাৰীয়ে আনুষ্ঠানিকভাৱে উন্মোচন কৰে। নিশা বাপী চৰকাৰৰ দ্বাৰা পৰিচালিত আমৰাও মানুষ নামৰ বাংলা নাট মঞ্চস্থ কৰা হয়।