‘হকী’ আমাৰ ৰাষ্ট্ৰীয় খেল নহয়; এগৰাকী শিক্ষকে পোহৰলৈ আনিলে এই সত্য
ভাৰতৰ ৰাষ্ট্ৰীয় খেল বুলি ক’লে হকীৰ কথায়ে মনলৈ আহে। বছৰ বছৰ ধৰি হকীক ৰাষ্ট্ৰীয় খেল হিচাপে মানি অহাৰ পিছত শেহতীয়াকৈ ক্ৰীড়া মন্ত্ৰ্যালয়ে কোনো খেলকে ৰাষ্ট্ৰীয় খেলৰ মান্যতা দিয়া হোৱা নাই বুলি কৰা মন্তব্যই প্ৰতিক্ৰিয়াৰ সৃষ্টি কৰিছে।
মহাৰাষ্ট্ৰৰ ধুলে জিলাৰ এগৰাকী শিক্ষকৰ আৰ টি আই আবেদনৰ উত্তৰত গৃহ মন্ত্ৰ্যালয়ে এই কথা জনায়।
হকীক কেতিয়া ভাৰতৰ ৰাষ্ট্ৰীয় খেল হিচাপে ঘোষণা কৰা হৈছিল তাৰ সবিশেষ জনাৰ বাবেই শিক্ষকগৰাকীয়ে এই আবেদন দাখিল কৰিছিল।
আৰ টি আই আবেদনৰ জৰিয়তে এই কথাটো উদঘাটন কৰা ব্যক্তিগৰাকী ধুলে জিলাৰ চিণ্ডখেড়া মৌজাত অৱস্থিত ভি কে পাটিল ইণ্টাৰনেশ্যনেল স্কুলৰ শিক্ষক ময়ূৰেশ আগৰৱালা বুলি জানিব পৰা গৈছে।
উল্লেখ্য যে শিক্ষকগৰাকীয়ে পঢ়োৱা স্কুলৰ এগৰাকী ছাত্ৰীয়ে হকীক কেতিয়া দেশৰ ৰাষ্ট্ৰীয় খেল হিচাপে ঘোষণা কৰিছে সেই বিষয়ে সোধাৰ পিছতেই তেওঁ ইয়াৰ উত্তৰ বিচাৰি আৰ টি আই আবেদন কৰে।
এই আবেদনৰ উত্তৰত মন্ত্ৰ্যালয়ে কয় যে কোনো খেলকে ৰাষ্ট্ৰীয় খেল হিচাপে এই পৰ্যন্ত ঘোষণা কৰা হোৱা নাই বৰঞ্চ চৰকাৰৰ উদ্দেশ্য হ’ল সকলো খেলকে সঠিক ৰূপত প্ৰচাৰ কৰা।
স্মৰ্তব্য যে, ভাৰতৰ হকী দলটোৱে অলিম্পিকত একেৰাহে ৬টা স্বৰ্ণ অৰ্জন কৰা (১৯২৮ চনৰ পৰা ১৯৫৬ চনৰ ভিতৰত)ৰ পিছৰে পৰা ভাৰতত এই খেলবিধক ৰাষ্ট্ৰীয় খেল হিচাপে মানি অহা হৈছিল।