কংগ্ৰেছৰ অক্ষত দুৰ্গ ৰূপে পৰিচিত প্ৰাক্তন মন্ত্ৰী ৰকিবুল হুছেইনৰ সমষ্টি চামগুৰিত শুকুৰবাৰে তেৰ জনকৈ সংখ্যালঘু নেতাই কংগ্ৰেছ দল ত্যাগ কৰাত কংগ্ৰেছী মহলত ব্যাপক প্ৰতিক্ৰিয়াৰ সৃষ্টি হৈছে।
লাওখোৱা ব্লক কংগ্ৰেছৰ অধীনস্থ ভূৰবন্ধাৰ এই কংগ্ৰেছী নেতা কেইজনে স্বাক্ষৰ কৰি লাওখোৱা ব্লক কংগ্ৰেছৰ সভাপতি জগদীশ সিংহৰ হাতত পদত্যাগ পত্ৰ দাখিল কৰিছে।
চামগুৰি সমষ্টিৰ ভূৰবন্ধাত শুকুৰবাৰে কংগ্ৰেছ দলৰ বহু কেইজন স্থানীয় নেতা-কৰ্মীয়ে এনেদৰে সমূহীয়া ভাৱে কংগ্ৰেছ দলৰ পৰা পদত্যাগ কৰাত চামগুৰি কংগ্ৰেছত এক বৃহৎ গড়াখহনীয়াৰ সৃষ্টি হয় ৷
জানিব পৰা মতে, চামগুৰি সমষ্টিৰ শীৰ্ষ কংগ্ৰেছ নেতৃত্বৰ প্ৰতি অসন্তুষ্টি ব্যক্ত কৰি ভূৰবন্ধা মণ্ডল কংগ্ৰেছ(ই) কমিটিৰ ক্ৰমে ৭ নং বগামুখৰ উপ সভাপতি আমিনুল হক খান, সাধাৰণ সম্পাদক ছাইফ উদ্দিন আহমেদ,কাৰ্য্যকৰী সদস্য নুৰুল আমিন, ৪ নং বগামুখৰ সাধাৰণ সম্পাদক নুৰ ইছলাম,৬ নং বগামুখৰ উপ সভাপতি হাছেন আলী,৫ নং বগামুখৰ সাধাৰণ সম্পাদক আবুজাৰ হুছেইন,৩ নং বগামুখৰ ভূৰবন্ধা মণ্ডল যুৱ কংগ্ৰেছ কমিটিৰ সাধাৰণ সম্পাদক আব্দুল কাদিৰ প্ৰমুখ্যে তেৰজনকৈ স্থানীয় নেতা-কৰ্মীয়ে ব্যক্তিগত অসুবিধাৰ দোহাই দি সমূহীয়া ভাৱে কংগ্ৰেছ দলৰ পৰা পদত্যাগ কৰে ৷
চামগুৰি সমষ্টিৰ অন্তৰ্গত লাওখোৱা ব্লক কংগ্ৰেছ কমিটিৰ সভাপতি জগদীশ সিংহৰ বাসগৃহত উক্ত দল ত্যাগী সদস্য সকল উপস্থিত হৈ পদত্যাগ পত্ৰ দাখিল কৰাৰ লগতে ভূৰবন্ধা মণ্ডল কংগ্ৰেছ কমিটিৰ সভাপতি গৰাকীলৈকো উক্ত পদত্যাগ পত্ৰৰ প্ৰতিলিপি প্ৰেৰণ কৰে বুলি জানিব পৰা গৈছে ৷
বিশেষ সূত্ৰে জানিব পৰা মতে, চামগুৰি সমষ্টিৰ বৰ্তমানৰ বিধায়ক তথা প্ৰাক্তন মন্ত্ৰী ৰকিবুল হুছেইনৰ বিশ্বাস ভাজন তথা নগাঁও জিলা কংগ্ৰেছৰ সম্পাদক মজিবুৰ ৰহমান নামৰ লোকজনৰ মইমতালি আৰু সাংগঠনিক গুৰুত্বহীনতাৰ বাবেই বিগত ২০১৬ চনৰ পৰাই কংগ্ৰেছ দলৰ মজিয়াত এক মতানৈক্যৰ সৃষ্টি হৈ আহিছিল।
ইয়াৰ পৰিপ্ৰেক্ষিততে শুকুৰবাৰে এই সংখ্যালঘু নেতা কেইজনে দলত্যাগ কৰে বুলি সন্দেহ কৰা হৈছে। নিৰ্বাচনৰ সময়ত পূৰ্বতে দল বাগৰা ৰাজনীতি চলি আহিছে যদিও এইবাৰ সংখ্যালঘু নেতাই এনেদৰে পদত্যাগ কৰা ঘটনাই বিশেষ তাৎপৰ্য বহন কৰিছে।