উচ্চতম ন্যায়ালয়ত পুনৰ মুখথেকেচা খালে বিজেপিয়ে। দিল্লীৰ মেয়ৰ বাছনিক লৈ আম আদমি পাৰ্টি আৰু বিজেপিৰ মাজত হোৱা বিবাদত জয়ী হৈছে আম আদমি পাৰ্টি।
শুকুৰবাৰে উচ্চতম ন্যায়ালয়ে কয় যে উপ-ৰাজ্যপালে মনোনীত কৰা দিল্লীৰ পৌৰ নিগমৰ সদস্যসকলে মেয়ৰ নিৰ্বাচনত ভোটদান কৰিব নোৱাৰে।
উল্লেখ্য যে আম আদমী পাৰ্টিয়ে বিজেপিয়ে মনোনীত প্ৰাৰ্থীসকলৰ ভোটেৰে দিল্লী পৌৰ নিগমৰ মেয়ৰ পদটো নিজৰ দখললৈ নিয়াৰ কুঅভিনন্ধী কৰাৰ গুৰুতৰ অভিযোগ উত্থাপন কৰিছিল। ইয়াৰ বাবে যোৱা দুমাহত দিল্লী পৌৰ নিগমৰ মেয়ৰৰ নিৰ্বাচন তিনিবাৰকৈ পিছুৱাই দিয়াবলগীয়া পৰিস্থিতিৰ সৃষ্টি হৈছিল। যোৱা ডিচেম্বৰ মাহত দিল্লীৰ পৌৰ নিগম তথা এমচিডিৰ নিৰ্বাচনত বিজেপিক পৰাস্ত কৰি আপে নিজৰ দখললৈ নিছিল।
কিন্তু লেফটেনেণ্ট গৱৰ্ণৰ ভি কে ছাক্সেনাই মনোনীত কৰা কাউন্সিলৰ সদস্যসকলে মেয়ৰৰ নিৰ্বাচনত ভোটদানৰ চেষ্টা কৰিছিল আৰু আপে ইয়াৰ তীব্ৰ বিৰোধ কৰে। যাৰফলত তিনিবাৰকৈ মেয়ৰৰ নিৰ্বাচন স্থগিত ৰখা হয়।
মনোনীত সদস্যসকলক ভোটদান কৰোৱাই দিল্লী পৌৰ নিগমৰ মেয়ৰৰ পদটো বিজেপিয়ে দখল কৰিবলৈ কুঅভিসন্ধী কৰাৰ বুলি অভিযোগ উত্থাপন কৰি দিল্লীৰ মুখ্যমন্ত্ৰী অৰবিন্দ কেজৰিৱালৰ দলে উচ্চতম ন্যায়ালয়ৰ দ্বাৰস্থ হৈছিল।
শুকুৰবাৰে উচ্চতম ন্যায়ালয়ে এই আবেদনৰ শুনানি গ্ৰহণ কৰি কয় যে মেয়ৰ নিৰ্বাচনত উপ ৰাজ্যপালে মনোনীত কৰা সদস্যসকলে ভোটদান কৰিব নোৱাৰিব।
এই ৰায়ৰ পাছতে দিল্লী মুখ্যমন্ত্ৰী অৰবিন্দ কেজৰিৱালে টুইট কৰি কয় যে উচ্চতম ন্যায়ালয়ৰ এই আদেশে কেনেদৰে লেফটেনেণ্ট গৱৰ্ণৰ আৰু বিজেপিয়ে দিল্লীত অসাংবিধানিক আদেশ প্ৰদান কৰি আহিছে তাকেই বুলি প্ৰমাণ কৰিলে।
“উচ্চতম ন্যায়ালয়ৰ এই নিৰ্দেশ গণতন্ত্ৰৰ জয়। উচ্চতম ন্যায়ালয়ৰ বহুত বহুত ধন্যবাদ। দিল্লীয়ে এতিয়া ডেৰ-দুমাহৰ পিছত মেয়ৰ পাব। এতিয়া প্ৰমাণিত হৈছে যে কেনেকৈ লেফটেনেণ্ট গৱৰ্ণৰ আৰু বিজেপিয়ে একেলগে অবৈধ আৰু অসাংবিধানিক আদেশ গৃহীত কৰিছে।” কেজৰিৱালে টুইটত কয়।
