২২ নৱেম্বৰৰ পূৰ্বে সম্পূৰ্ণ হ’ব বিহাৰ বিধানসভাৰ নিৰ্বাচন। এই ঘোষণা ভাৰতৰ নিৰ্বাচন আয়োগৰ।
যদিও তাৰিখ এতিয়াও চূড়ান্ত হোৱা নাই, তথাপিও নিৰ্বাচন আয়োগে ঘোষণা কৰিছে বিহাৰ বিধানসভা নিৰ্বাচনৰ সম্ভাৱ্য সময়সীমা। দেওবাৰে সংবাদমেলত মুখ্য নিৰ্বাচন আয়ুক্ত জ্ঞানেশ কুমাৰে কয় যে ২২ নৱেম্বৰৰ ভিতৰত বিহাৰ নিৰ্বাচনৰ সকলো প্ৰক্ৰিয়া সম্পূৰ্ণ হ’ব।
দুদিনীয়া ভ্ৰমণসূচীৰে পাটনাত উপস্থিত হৈছে নিৰ্বাচন আয়ুক্ত জ্ঞানেশ কুমাৰ। তেওঁ নিৰ্বাচনৰ প্ৰস্তুতিৰ পৰ্যালোচনা কৰি আছে।
আয়োগৰ সিদ্ধান্ত অনুসৰি বৰ্তমানৰ চৰকাৰৰ কাৰ্যকাল শেষ হোৱাৰ পূৰ্বে বিহাৰত নিৰ্বাচন সম্পূৰ্ণ হ’ব।
মন কৰিবলগীয়া যে চলিত বিহাৰ বিধানসভাৰ কাৰ্যকাল ২২ নৱেম্বৰত শেষ হ’ব। বিধি অনুসৰি তাৰ পূৰ্বে নিৰ্বাচনী প্ৰক্ৰিয়া সম্পূৰ্ণ কৰিব লাগিব। সেই অনুসৰি ৰাজ্যত পূৰ্ণগতিত প্ৰস্তুতি আৰম্ভ হৈছে।
এই দুদিনীয়া ভ্ৰমণৰ সময়ছোৱাত নিৰ্বাচন আয়োগে সকলো ৰাজনৈতিক দলৰ সৈতে বৈঠক সমাপ্ত কৰিছে। সকলো জিলাৰ জিলা দণ্ডাধীশ, আৰক্ষী অধীক্ষক, ডি আই জি, আই জিৰ সৈতে বৈঠক অনুষ্ঠিত কৰিছে। প্ৰথমবাৰৰ বাবে দিল্লীত সকলো বুথ পৰ্যায়ৰ এজেণ্টক প্ৰশিক্ষণ দিয়া হৈছে। বুথ পৰ্যায়ৰ বিষয়াসকলৰ হাতত থাকিব ফটো আইডি কাৰ্ড। তদুপৰি ভোটাৰসকলে ভোটকেন্দ্ৰৰ বাহিৰত ফোন জমা দি ভোটদান কৰিবলৈ যাব লাগিব।
