চমু চাপিছে বিহাৰ বিধানসভা নিৰ্বাচনৰ দিন। ৬ অক্টোবৰত বিধানসভা নিৰ্বাচনৰ সময়সূচী ঘোষণা কৰাৰ পিছৰে পৰা মুঠ ৬৪.১৩ কোটি টকাৰ সুৰা, নগদ ধন, ড্ৰাগছ, আৰু আন্যান্য সামগ্ৰী জব্দ কৰিছে বুলি বিষয়াসকলে সদৰী কৰিছে। সুৰা নিষিদ্ধ এই ৰাজ্যখনত কেৱল ১৪ কোটি টকাৰ ফ্ৰীবিজ, ১৬.৮৮ কোটি টকাৰ মাদক দ্ৰব্য আৰু এন্টিচাইকোটিক, আৰু নগদ ৪.১৯ কোটিকে ধৰি মুঠ ২৩.৪১ কোটি টকাৰ সামগ্ৰী জব্দ হৈছে। ২৪৩ জনীয়া বিহাৰ বিধানসভাৰ বাবে ৬ আৰু ১১ নৱেম্বৰত দুটা পৰ্যায়ত ভোটগ্ৰহণ অনুষ্ঠিত হ’ব আৰু ১৪ নৱেম্বৰত ফলাফল ঘোষণা কৰা হ’ব। তেনে পৰিস্থিতিত বৃহৎ পৰিমাণৰ সুৰাসহ নিচাযুক্ত দ্ৰব্য উদ্ধাৰ হোৱা ঘটনাই চাঞ্চল্যৰ সৃষ্টি কৰিছে।
নিৰ্বাচনী প্ৰচাৰত অসৎ ব্যৱহাৰ ৰোধৰ কৰিবৰ বাবে ৰাজ্যখনত ৬ অক্টোবৰৰ পৰা ৭৫৩ জন লোকক গ্ৰেপ্তাৰ কৰাৰ লগতে ১৩,৫৮৭ টা নন-বেইলেবল ৱাৰেণ্ট জাৰি কৰা হৈছে। উল্লেখ্য যে ভাৰতীয় নিৰ্বাচন আয়োগে ৰাজ্যৰ আৰক্ষী, আবকাৰী, আয়কৰ, শুল্ক, ৰাজহ চোৰাংচোৱা, আৰু বলবৎকাৰী সঞ্চালকালয়সমূহক ধন ক্ষমতাৰ বিৰুদ্ধে সতৰ্কতা বৃদ্ধি কৰিবলৈ নিৰ্দেশ দিছে।
স্বচ্ছ নিৰ্বাচন নিশ্চিত কৰিবলৈ আয়োগে প্ৰথম পৰ্যায়ৰ বাবে ১২১ জন সাধাৰণ পৰ্যবেক্ষক আৰু ১৮ জন আৰক্ষী পৰ্যবেক্ষক, আৰু দ্বিতীয় পৰ্যায়ৰ বাবে ১২২ জন সাধাৰণ আৰু ২০ জন আৰক্ষী পৰ্যবেক্ষক নিয়োগ কৰিছে। পৰ্যবেক্ষকসকলক ভোটকেন্দ্ৰ পৰিদৰ্শন কৰি ভোটাৰৰ অনুকূল পদক্ষেপ ৰূপায়ণৰ দায়িত্ব প্ৰদান কৰিছে।
