সৰিয়হৰ ডুলিতে ওলাইছে ভূত। অপৰাধ নিয়ন্ত্ৰণৰ দায়িত্বত নিয়োজিত আৰক্ষীৰ এগৰাকী উচ্চপদস্থ বিষয়াই নিজেই লৈছে অপৰাধৰ পথ। পাটনা উচ্চ ন্যায়ালয়ৰ প্ৰাক্তন মুখ্য ন্যায়াধীশৰ নামত ভুৱা ৱাটছ্এপ একাউণ্ট খুলি আত্মসমৰ্পণ কৰিছে এইগৰাকী বিষয়াই।
প্ৰকাশিত খবৰ অনুসৰি, প্ৰাক্তন মুখ্য ন্যায়াধীশজনৰ পৰিচয়েৰে ভুৱা ৱাটছ্এপ প্ৰফাইল খুলি চৰকাৰী কাৰ্যবিধি প্ৰভাৱিত কৰিবলৈ চেষ্টা কৰিছিল আদিত্য কুমাৰ নামৰ অভিযুক্ত ভাৰতীয় আৰক্ষী সেৱাৰ বিষয়াগৰাকীয়ে।
মঙলবাৰে পাটনাৰ আদালতৰ সন্মুখত আত্মসমৰ্পণ কৰে কুমাৰে। বিগত এবছৰৰো অধিক সময় ধৰি পলাতক হৈ আছিল আই পি এছ বিষয়াগৰাকী। তেওঁৰ জামিনৰ আবেদন উচ্চতম ন্যায়ালয়ে নাকচ কৰাৰ পিছতে অৱশেষত আত্মসমৰ্পণ কৰে।
আৰক্ষী অধীক্ষক পদত কৰ্মৰত আৰক্ষী বিষয়া কুমাৰে প্ৰাক্তন মুখ্য ন্যায়াধীশ সঞ্জয় কেৰলৰ ফটো প্ৰফাইল পিকচাৰ হিচাপে থকা ভুৱা ৱাটছ্এপ একাউণ্টৰ জৰিয়তে তেতিয়াৰ বিহাৰৰ আৰক্ষী সঞ্চালক প্ৰধান এছ কে সিংঘলক প্ৰতাৰণা কৰিছিল বুলি অভিযোগ উঠিছে।
অভিযোগ অনুসৰি, সুৰা মাফিয়াৰ সৈতে জড়িত থকাৰ অভিযোগত আন অভিযুক্তৰ লগতে কুমাৰৰ নাম জড়িত হৈছিল। এই গোচৰৰ পৰা কুমাৰৰ নাম প্ৰত্যাহাৰৰ বাবে আন এজন অভিযুক্তই ৱাটছ্এপ যোগে আৰক্ষী সঞ্চালক প্ৰধানখৰাকীৰ সৈতে যোগাযোগ কৰিছিল।
নিম্ন আদালতে জামিন আবেদন নাকচ কৰাৰ পিছত কুমাৰে উচ্চতম ন্যায়ালয়ত জামিন আবেদন দাখিল কৰে যদিও শীৰ্ষ আদালতেও আবেদনখন নাকচ কৰে আৰু আই পি এছ বিষয়াজনক আত্মসমৰ্পণ কৰিবলৈ নিৰ্দেশ দিয়ে।
শীর্ষ আদালতে বিহাৰ আৰক্ষীৰ অৰ্থনৈতিক অপৰাধ শাখাক শুনানিৰ পৰৱৰ্তী তাৰিখ অৰ্থাৎ ১২ ডিচেম্বৰত অপৰাধমূলক গোচৰৰ সমগ্ৰ কেছ ডায়েৰী ছীল কভাৰত আদালতত জমা দিবলৈ নিৰ্দেশ দিয়ে।
