বিহাৰৰ জামুই জিলাত শনিবাৰে মাজনিশা এক ভয়ংকৰ ৰে’ল দুৰ্ঘটনা সংঘটিত হয়। আছানছল ৰে’ল সংমণ্ডলৰ অন্তৰ্গত জাচিৱ ডিহ-ঝাঝা মূল ৰে’লপথৰ তেলৱা বজাৰ হাল্টৰ সমীপত এখন চিমেণ্ট ভৰ্তি মালবাহী ৰে’লৰ প্ৰায় ১৬ ৰ পৰা ১৯ টা দবা লাইনচ্যুত হয়।
নিশা প্ৰায় ১১:৩০ বজাৰ পৰা ১২:০০ বজাৰ ভিতৰত বধুৱা নদীৰ ওপৰত থকা ৬৭৬ নং দলঙত এই দুৰ্ঘটনাটো ঘটে। দুৰ্ঘটনাটো ইমানেই ভয়াৱহ আছিল যে ৰে’লখনৰ তিনিটা দবা দলঙৰ ওপৰৰ পৰা নদীৰ বুকুত পৰি যায় আৰু বহুকেইটা দবা দলঙৰ ওপৰতে ওলমি ৰয়। ইয়াৰ ফলত ৰে’লপথৰ যথেষ্ট ক্ষতি হোৱাৰ লগতে চিমেণ্টৰ বেগসমূহ সিঁচৰতি হৈ পৰে। মালবাহী ৰে’ল হোৱাৰ বাবে সৌভাগ্যক্ৰমে এই ঘটনাত কোনো লোক হতাহত হোৱা নাই।
এই দুৰ্ঘটনাৰ ফলত কিউল-জাচিদিহ অংশত ৰে’ল চলাচল সম্পূৰ্ণৰূপে ব্যাহত হৈ পৰিছে। ফলস্বৰূপে, কেইবাখনো যাত্ৰীবাহী ৰে’ল বাতিল কৰাৰ লগতে আন বহুতো ৰে’লৰ পথ সলনি কৰিবলগীয়া হৈছে।
দুৰ্ঘটনাৰ খবৰ লাভ কৰাৰ লগে লগে ৰে’লৱে প্ৰশাসনে তৎক্ষণাত সাহায্যকাৰী ৰে’ল আৰু গধুৰ যন্ত্ৰপাতি ঘটনাস্থলীলৈ প্ৰেৰণ কৰে। আৰ পি এফ (RPF) আৰু কাৰিকৰী বিভাগৰ উচ্চপদস্থ বিষয়াসকলৰ তত্ত্বাৱধানত নিশাই ৰে’লপথ পৰিষ্কাৰ কৰাৰ অভিযান আৰম্ভ কৰা হৈছে। প্ৰাৰম্ভিক তদন্তত কাৰিকৰী বিজুতি অথবা ৰে’লপথৰ (Track) বিসংগতিৰ বাবে এই দুৰ্ঘটনাটো সংঘটিত হোৱা বুলি সন্দেহ প্ৰকাশ কৰিছে। ৰে’ল কৰ্তৃপক্ষই বৰ্তমান যুদ্ধকালীন ক্ষিপ্ৰতাৰে ৰে’লপথ মেৰামতিৰ কাম অব্যাহত ৰাখিছে যাতে ৰে’ল যাতায়ত পুনৰ স্বাভাৱিক কৰি তুলিব পৰা যায়।
