আই এ এছ হ’বলৈ ইউ পি এছ চি চিভিল চাৰ্ভিচেছৰ পৰীক্ষা ‘ক্ৰেক’ কৰাৰ পিছত তেওঁ প্ৰশিক্ষণৰ বাবে সকলো টালি-টোপোলা বান্ধি পিতৃ-মাতৃৰ সৈতে মিছৌৰীত উপস্থিত হৈছিল। কিন্তু যেতিয়া তেওঁ লাল বাহাদুৰ শাস্ত্ৰী নেচনেল একাডেমী অৱ এডমিনিষ্ট্ৰেচন (এল বি এছ এন এ)লৈ গৈ প্ৰশিক্ষণৰ বিষয়ে সোধা-পোছা কৰিলে, তেতিয়া তেওঁ গম পালে যে তেওঁৰ ৰিজাল্ট ভুৱা!
এল বি এছ এন এ কৰ্তৃপক্ষই জনোৱা মতে, শনিবাৰে বিহাৰৰ সাৰণ নিবাসী পুষ্পেশ সিঙে ভুৱা ফলাফল লৈ একাডেমীলৈ প্ৰশিক্ষণৰ বাবে আহিছিল। তদন্তৰ সময়ত বিষয়টো তেওঁলোকৰ দৃষ্টিগোচৰ হোৱাৰ লগে লগে আৰক্ষীক অৱগত কৰা হয়। আৰক্ষী আৰু আই বিয়ে যৌথভাৱে এই ঘটনাৰ তদন্ত আৰম্ভ কৰিছে।
প্ৰাথমিক তদন্তত প্ৰকাশ পাইছে যে পুষ্পেশে গুৰুগ্ৰামৰ এটা ব্যক্তিগত প্ৰতিষ্ঠানত কাম কৰিছিল। কৰ্তৃপক্ষই জনোৱা মতে, ইউ পি এছ চি পৰীক্ষাৰ ভুৱা ফলাফলৰ বলি হৈ তেওঁ প্ৰশিক্ষণৰ বাবে মিছৌৰীলৈ আহিছিল।
পুষ্পেশে দাবী কৰে যে নথি ভেৰিফিকেচনৰ সময়তহে তেওঁৰ ৰিজাল্ট ভুৱা বুলি প্ৰথমে গম পাইছিল। আৰক্ষীৰ জেৰাৰ সময়ত তেওঁ কয় যে গুৰুগ্ৰামত কেইজনমান লোকৰ সৈতে চিনাকি হৈছিল। অভিযোগ অনুসৰি তেওঁলোকে প্ৰথমে অসামৰিক সেৱাৰ পৰীক্ষা আৰু সাক্ষাৎকাৰৰ বাবে নগদ ১৩ হাজাৰ টকা আৰু পিছত ইউ পি আইৰ জৰিয়তে ১৪,৫৬৪ টকা লৈছিল।
পুষ্পেশে কয় যে ইয়াৰ পিছত তেওঁ হোৱাটছএপত ইউ পি এছ চিৰ বাছনিৰ ফলাফল লাভ কৰে। য’ত তেওঁক প্ৰশিক্ষণৰ বাবে মিছৌৰীৰ একাডেমীত উপস্থিত হ’বলৈ নিৰ্দেশ দিয়া হৈছিল।
ইয়াৰ পিছত যেতিয়া তেওঁ অভিভাৱকৰ সৈতে প্ৰশিক্ষণৰ বাবে একাডেমীত উপস্থিত হয়, তেতিয়া কৰ্তৃপক্ষই গম পালে যে পুষ্পেশ ভুৱা ৰিজাল্ট লৈ আহিছে। এই তথ্য লাভ কৰাৰ লগে লগে মিছৌৰী আৰক্ষী, স্থানীয় তদন্তকাৰী সংস্থা আৰু চোৰাংচোৱা ব্যুৰোৰ বিশেষ দল এটাই তাত উপস্থিত হয়। ভুক্তভোগীৰ অভিযোগৰ ভিত্তিত জিৰো এফআইআৰ দাখিল কৰি তদন্ত আৰম্ভ কৰা হৈছে।
