বিহাৰৰ খাগৰীয়া জিলাৰ এজন ব্যক্তিৰ বেংক একাউণ্টত ভুলৱশত সোমাল ৫,৫০,০০০ টকা।
খাগৰীয়া জিলাৰ মানসী পুলিচ চকীৰ অন্তৰ্গত বখতিয়াৰপুৰ গাঁৱৰ ৰঞ্জিত দাস নামৰ এজন ব্যক্তিৰ বেংক একাউণ্টত এই বছৰৰে মাৰ্চ মাহত ভুলৱশত গ্ৰামীণ বেংকৰ পৰা ৫,৫০,০০০ টকাৰ বিশাল ধনৰাশি লেনদেন হয়।
ইয়াৰ পাছতে এই টকা ঘূৰাই দিবলৈ বেংকৰ ফালৰ পৰা ৰঞ্জিত দাসলৈ কেইবাবাৰো জাননী প্ৰেৰণ কৰে। কিন্তু ইয়াৰ পাছতো এই ধনৰাশী ঘূৰাই দিবলৈ অস্বীকাৰ কৰে ৰঞ্জিত দাসে।
‘’ এই টকাখিনি লাভ কৰি মই বহুত আনন্দ পাইছিলো। মই ভাবিছিলো এইয়া প্ৰধান মন্ত্ৰী নৰেন্দ্ৰ মোদীয়ে প্ৰতিশ্ৰুতি ৰক্ষা কৰি আমাৰে ১৫ লাখ টকাৰ প্ৰথমটো কিস্তি হিচাপে আমালৈ আগবঢ়াইছে। সেয়েহে মই গোটেই ধনৰাশী বেংকৰ পৰা উলিয়াই আনি ইতিমধ্যে খৰচ কৰি পেলাইছো। মোৰ বেংক একাউণ্টত বৰ্তমান ইয়াৰ এক টকাও নাই’’- সংবাদ মাধ্যমৰ আগত এইদৰে কয় দাসে।
স্মৰ্তব্য যে,২০১৪ চনৰ লোকসভা নিৰ্বাচনৰ নিৰ্বাচনী প্ৰচাৰত নৰেন্দ্ৰ মোদীয়ে প্ৰতিশ্ৰুতি দিছিল যে,দেশৰ বাহিৰত জমা হৈ থকা সকলো ক’লাধন তেওঁ দেশলৈ ঘূৰাই আনিব আৰু দেশৰ প্ৰতিজন ব্যক্তিৰ বেংক একাউণ্টত ১৫ লাখকৈ টকা ভৰাই দিব।
অৱশ্যে নিৰ্বাচনত জয়ী হৈ এই প্ৰতিশ্ৰুতি পাহৰি পেলালে মোদীয়ে। দেশলৈ ক’লা ধন ঘূৰাই অনা বাদেই,তেখেতৰ প্ৰধানমন্ত্ৰীত্ব কালত কেইবাজনো পুঁজিপতিয়ে ক’লাধনসহ দেশ এৰি পলায়নহে কৰে।
ইতিমধ্যে এই খবৰটো বিয়পি পৰাৰ পাছত বৰ্তমান ই জনগণৰ মাজত খোৰাকৰ সৃষ্টি কৰিছে।
মানসী পুলিচ চকীৰ আৰক্ষী বিষয়া দীপক কুমাৰে জানিবলৈ দিয়া মতে,বেংকৰ বিভাগীয় কৰ্ত্তৃপক্ষৰ অভিযোগৰ ভিত্তিত আৰক্ষীয়ে ইতিমধ্যে ৰঞ্জিত দাসক আটক কৰিছে। বৰ্তমান তেওঁক পুলিচ আৱেষ্টনীত ৰখা হৈছে।
