বিহাৰ বিধানসভা নিৰ্বাচনত অভিলেখ সংখ্যক আসন লাভ কৰি জয়ৰ দিশে আগবাঢ়িছে এন ডি এ মিত্ৰজোঁট। ইয়াৰ ফলত জে ডি ইউক পিছ পেলাই বিহাৰত একক সংখ্যাগৰিষ্ঠ দল হোৱাৰ পথত আগবাঢ়িছে বিজেপি। কিন্তু এই পৰাজয়ে কংগ্ৰেছ আৰু ৰাহুল গান্ধীৰ বাবে এক বৃহৎ ক্ষতি।
নিৰ্বাচনৰ ফলাফলত দেখা গৈছে যে ৰাহুল গান্ধীৰ ‘ভোটাৰ অধিকাৰ যাত্ৰা‘-ই সামৰি লোৱা ১১০খন আসনৰ কোনো এখনতে তেওঁৰ দলৰ পক্ষত ফলাফল যোৱা নাই।
জানিব পৰা মতে, ৰাহুল গান্ধীৰ এই ‘ভোটাৰ অধিকাৰ যাত্ৰা‘ ছাছাৰামৰ পৰা আৰম্ভ হৈ পাটনাতে শেষ হৈছিল। এই যাত্ৰা প্ৰায় ২৫খন জিলা আৰু ১১০খন আসনৰ মাজেৰে পাৰ হৈছিল। এই যাত্ৰাত ৰাহুলে বিহাৰৰ ভিতৰত প্ৰায় ১৩০০ কিলোমিটাৰ পথ অতিক্ৰম কৰিছিল। কিন্তু ভোট গণনাৰ পৰা স্পষ্ট হৈ পৰিছে যে এই যাত্ৰাৰ কোনো ইতিবাচক ফলাফল কংগ্ৰেছৰ বাবে অহা নাই। বৰ্তমান কংগ্ৰেছ দলটোৱে বিহাৰৰ মাত্ৰ দুখন আসন, কিষাণগঞ্জ আৰু মণিহাৰীতহে আগবাঢ়ি আছে।
কংগ্ৰেছে ৰাহুলৰ পূৰ্বৰ যাত্ৰাসমূহৰ সফলতাৰ কথা মনত ৰাখিছিল। কংগ্ৰেছে দাবী কৰিছিল যে ৰাহুলৰ পূৰ্বৰ যাত্ৰাসমূহে ২০২৪ চনৰ লোকসভা নিৰ্বাচন আৰু ২০২৩ চনৰ তেলেংগানা নিৰ্বাচনত তেওঁলোকক ভাল প্ৰদৰ্শন কৰাত সহায় কৰিছিল। ২০২২ চনৰ পৰা ২০২৪ চনৰ ভিতৰত গান্ধীয়ে কৰা দুখন ‘ভাৰত জোডো‘ যাত্ৰাৰ ফলত কংগ্ৰেছে ৪১খন আসন লাভ কৰিছিল। আনকি তেলেংগানাত কংগ্ৰেছে নিৰ্বাচনত জয়ী হৈ চৰকাৰো গঠন কৰিছিল। কিন্তু বিহাৰত ইয়াৰ ফলাফল একেবাৰেই ওলোটা দেখা গৈছে।
বিহাৰ নিৰ্বাচনৰ প্ৰাকমুহূৰ্তত ৰাহুল গান্ধী আৰু কংগ্ৰেছে SIR , ভোট ৰিগিং আদি বিষয়সমূহক প্ৰচাৰৰ মূল বিষয় হিচাপে উত্থাপন কৰিছিল, যিবোৰ বিহাৰৰ স্থানীয় বিষয় নাছিল। তদুপৰি SIR শেষ হোৱাৰ পিছতো বহু বৈধ ভোটাৰৰ নাম আঁতৰোৱা নোহোৱাৰ ফলত এই বিষয়টোও তেনেকৈ গুৰুত্ব লাভ কৰা নাছিল। ইয়াৰ ফলত নিবনুৱা সমস্যা, দলিতৰ ওপৰত অত্যাচাৰ, দুৰ্নীতি আদি মূল স্থানীয় বিষয়সমূহ পিছ পৰি ৰৈছিল। আনহাতে, তেজস্বী যাদৱে শেষ মুহূৰ্তত সকলো পৰিয়ালকে চাকৰি প্ৰদান কৰাৰ যি ঘোষণা কৰিছিল, সেয়াও ৰাইজৰ বাবে বিশেষ বিশ্বাসযোগ্য নাছিল।
বিহাৰ নিৰ্বাচনত প্ৰতিদ্বন্দ্বিতা কৰা অধিকাংশ আসনতে এন ডি এ মিত্ৰজোঁটে জয়লাভ কৰিছে। বিজেপি আৰু জে ডি ইউ দুয়োটা দলেই সৰহ সংখ্যক আসন লাভ কৰে। বৰ্তমান বিজেপিয়ে ৯৫খন আসনত আৰু জে ডি ইউয়ে ৮৫খন আসনত আগবাঢ়ি আছে। ইয়াৰ উপৰিও, মিত্ৰজোঁটৰ আন অংশীদাৰসকলেও নিৰ্বাচনত যথেষ্ট ভাল প্ৰদৰ্শন কৰিছে। চিৰাগ পাছৱানৰ লোক জনশক্তি পাৰ্টি (ৰাম বিলাস) প্ৰতিদ্বন্দ্বিতা কৰা ২৮খন আসনৰ ভিতৰত ২২খন আসনত আগবাঢ়ি আছে। উপেন্দ্ৰ কুশৱাহাৰ আৰ এল এম ৬ খনৰ ভিতৰত ৩ খনত আৰু জীতন ৰাম মাঞ্জীৰ এইচ এ এম ৬ খনৰ ভিতৰত ৫ খন আসনত আগবাঢ়ি আছে।
